Որոնք են օրգանիզմում հեղուկի կուտակման հիմնական պատճառներն ու կանխարգելման լավագույն միջոցները

Ոտքերի, ձեռքերի ու դեմքի այտուցները բավական տարածված ու տհաճ խնդիր են և սովորաբար պայմանավորված են լինում օրգանիզմում ավելորդ հեղուկի կուտակմամբ, սակայն քչերը գիտեն, թե որոնք են հեղուկի կուտակման պատճառները:

Օրգանիզմում հեղուկի կուտակումը կարող է պայմանավորված լինել տարբեր խնդիրներով, որոնց շարքին են դասվում նախադաշտանային համախտանիշը (ПМС), հղիությունը, դաշտանադադարը, նստակյաց կենսակերպն ու որոշ դեղամիջոցների օգտագործումը:

Բացի այդ, հեղուկի կուտակումը կարող է կրել նաև քրոնիկական բնույթ, ինչը խիստ վտանգավոր է: Բանն այն է, որ այս դեպքում խնդիրը կարող է պայմանավորված լինել երիկամների կամ սրտամկանի հետ կապված լուրջ խնդիրներով, ուստի հարկավոր է շատ ուշադիր լինել և անպայման դիմել բժշկին՝ էլ ավելի լուրջ բարդություններից խուսափելու համար:

Սակայն կան նաև բավական արդյունավետ միջոցներ, որոնք կօգնեն կանխել հեղուկի կուտակումն ու այտուցների առաջացումը: Ձեր ուշադրությանն ենք ներկայացնում դրանցից մի քանիսը:

1.      Խուսափել վերամշակում անցած մթերքից

Վերամշակում անցած մթերքը ներկայում շատ տարածված է, սակայն, ցավոք, այն համարվում է օրգանիզմում հեղուկի կուտակման հիմնական պատճառներից մեկը: Բանն այն է, որ այս դեպքում մթերքի պիտանելիության ժամկետը երկարացնելու համար արտադրողները դրանց արհեստական հավելումներ են ավելացնում, որոնք ծանրաբեռնում են կենսական նշանակություն ունեցող օրգանները (օրինակ՝ սրտամկանն ու երիկամները): Նման խնդիրներից խուսափելու համար հարկավոր է սահմանափակել նմանատիպ վնասակար մթերքի գործածությունը կամ առհասարակ բացառել այն սննդակարգից:

2.      Խուսափել մեծ քանակությամբ նատրիումի գործածությունից

Վերոնշյալ վերամշակում անցած մթերքը պարունակում է նաև մեծ քանակությամբ նատրում, ինչը ստիպում է մարդուն ավելի շատ հեղուկ օգտագործել և ծանրաբեռնել երիկամները: Բացի այդ, նատրիումի չարաշահումը հանգեցնում է օրգանիզմում նատրիումի և կալիումի դիսբալանսի, ինչը կարող է դառնալ այտուցների առաջացման և զարկերակային ճնշման բարձրացման պատճառ:

3.      Խուսափել օրգանիզմի ջրազրկումից

Ջուրը շատ կարևոր է օրգանիզմի բոլոր ֆունկցիաների կատարման համար, ուստի երբ մարդը բավարար քանակությամբ ջուր չի խմում, օրգանիզմը սկսում է կուտակել արդեն իսկ ստացած հեղուկը: Սա է պատճառը, որ այտուցներից ու հեղուկի կուտակումից խուսափելու համար հարկավոր է օրվա ընթացքում բավարար քանակությամբ ջուր խմել և թույլ չտալ, որ օրգանիզմը ջրազրկվի:

4.      Հետևել օրգանիզմում վիտամին B6-ի մակարդակին

Օրգանիզմի ջրազրկման պատճառներից մեկը կարող է լինել վիտամին B6-ի դեֆիցիտը: Այս վիտամինը կօգնի նաև ազատվել նախադաշտանային համախտանիշի այնպիսի տհաճ ախտանշաններից, ինչպիսին են հեղուկի կուտակումն ու այտուցների առաջացումը: Սա է պատճառը, որ նախադաշտանային համախտանիշի, հղիության ու դաշտանադադարի ժամանակ կանայք պետք է հարստացնել իրենց սննդակարգը վիտամին B6 պարունակող մթերքով (հավի միս, թունա ձուկ, հնդկահավի միս, բանան, արևածաղկի սերմեր, պիստակ և այլն):

5.      Հետևել օրգանիզմում մագնեզիումի մակարդակին

Մագնեզիումի դեֆիցիտը նույնպես կարող է դառնալ օրգանիզմում հեղուկի կուտակման ու այտուցների առաջացման պատճառ, ուստի այս խնդրից ազատվելու համար կարելի է սննդակարգում ներառել մագնեզիումով հարուստ մթերք: Դրանց շարքին են դասվում ավոկադոն, ընկուզեղենը, ամբողջական հացահատիկը, սպանախը, կանաչ ոլոռը, ինչպես նաև մուգ կանաչ գույն ունեցող բանջարեղենը:

6.      Հետևել օրգանիզմում կալիումի մակարդակին

Անչափ կարևոր հանքանյութ է նաև կալիումը, որը նույնպես կարող է կարգավորել օրգանիզմում հեղուկի կուտակման խնդիրը: Սա է պատճառը, որ հարկավոր է խուսափել կալիումի դեֆիցիտից և օգտագործել այս հանքանյութով հարուստ մթերք (օրինակ՝ ձմերուկ, սեխ, բանան և այլն):

7.      Օգտագործել միզամուղ ազդեցությամբ օժտված թեյեր

Հեղուկի կուտակումից խուսափելու և կուտակված հեղուկն օրգանիզմից հեշտությամբ դուրս բերելու արյունավետ միջոց կարող են լինել նաև միզամուղ ազդեցությամբ օժտված բուսական թուրմերը: Նման ազդեցությամբ օժտված օգտակարներ ու արդյունավետ բույսերի շարքին են դասվում եղինջը, հիբիսկուսը (կարկադե), խատուտիկի արմատը, մաղադանոսի տերևներն ու արմատը, ուստի կարելի է պարբերաբար խմել դրանցով պատրաստված բուժիչ թուրմեր:

Սակայն հարկ է հիշել, որ առողջական լուրջ խնդիրների և ուժեղ ցավերի դեպքում անհրաժեշտ է անպայման խորհրդակցել բժշկի հետ, քանի որ ինքնաբուժությունը կարող է խիստ վնասակար լինել առողջության համար և էլ ավելի վատացնել հիվանդի վիճակը: Բացի այդ, միայն փորձառու մասնագետը կարող է ճիշտ ախտորոշել հիվանդությունն ու նշանակել անհրաժեշտ բուժումը, որը կլինի և՛ արդյունավետ, և՛ անվնաս:

Նյութի աղբյուրը՝ budetezdorovy.ru