Որոնք են միզաքարային հիվանդության առաջացման ամենատարածված պատճառները

Միզաքարային հիվանդությունը բավական տհաճ խնդիր է, որի առաջացման հստակ պատճառները մինչ օրս պարզված չեն, սակայն հետազոտությունները ցույց են տվել, որ այս հարցում լուրջ դեր են կատարում նյութափոխանակության խանգարումները (մասնավորապես՝ ջրի և աղերի բալանսի փոփոխությունն ու արյան քիմիական կազմի փոփոխությունը): Նման խանգարումները կարող են պայմանավորված լինել տարբեր գործոններով, ուստի երիկամներում քարերի առաջացումից խուսափելու համար մասնագետները խորհուրդ են տալիս առաջին հերթին խուսափել հենց այդ գործոններից:

Ձեր ուշադրությանն ենք ներկայացնում դրանցից ամենատարածվածները.

1.      Հեղուկի դեֆիցիտ

Երիկամներում աղերի և ավազի նստվածքներ կան շատերի օրգանիզմում, իսկ դրանք դուրս են գալիս օրգանիզմից ավելորդ հեղուկի միջոցով: Սա նշանակում է, որ երիկամները նման նստվածքներից մաքրելու համար հարկավոր է բավարար քանակությամբ ջուր խմել՝ հակառակ դեպքում նստվածքը կարող է վերածվել քարերի: Պարզելու համար, թե ունի արդյոք օրգանիզմը ջրի կարիք, հարկավոր է ուշադրություն դարձնել մեզի գույնին: Այս դեպքում լավ ցուցանիշ է համարվում թափանցիկ կամ բաց դեղնավուն մեզը, իսկ եթե այն դեղին է կամ մուգ դեղին, ապա օրգանիզմն ունի ջրի կարիք, իսկ ավազի կուտակման հավանականությունը բավական բարձր է:

Հարկ է հիշել, որ որքան շատ հեղուկ է մարդն օգտագործում, այնքան լավ են աշխատում նրա երիկամները և նվազում է քարերի առաջացման հավանականությունը: Սակայն մասնագետները նախազգուշացնում են, որ խոսքը մաքուր ջրի կամ հանքային ջրով պատրաստված մորսերի ու բնական հյութերի մասին է, այլ ոչ թե սուրճի, թեյերի կամ այլ ըմպելիքների: Միևնույն ժամանակ հարկ է հիշել, որ երիկամների հիվանդություններից տառապողներին խորհուրդ է տրվում խմել քիչ քանակությամբ հանքանյութեր պարունակող ջուր, քանի որ նման ջուրը ծանրաբեռնում է երիկամները՝ նպաստելով հիվանդության զարգացմանը:

Առողջ մարդուն մասնագետները խորհուրդ են տալիս օրական խմել մոտ 1.5 լիտր ջուր, սակայն եթե նա ապրում է կլիմայական շոգ պայմաններում կամ սպորտով է զբաղվում, ապա օրական պետք է օգտագործի գոնե 2 լիտր ջուր:

Բացի այդ, ջրի քանակին ու որակին շատ մեծ ուշադրություն պետք է դարձնեն այն մարդիկ, որոնք նախկինում արդեն բախվել են միզաքարային հիվանդությանն ու ազատվել են դրանից, քանի որ այս դեպքում բարձր է հիվանդության կրկնության հավանականությունը:

2.      Աղի, յուղոտ, թթու և տապակած մթերք

Միզաքարային հիվանդությունը վերջին շրջանում բավական «երիտասարդացել» է: Եթե նախկինում այս հիվանդությունը հանդիպում էր հիմնականում 35 տարեկանից բարձր կանանց ու 40 տարեկանից բարձր տղամարդկանց շրջանում, ապա այժմ մասնագետներին են դիմում անգամ 20-25 տարեկան երիտասարդները, ինչը պայմանավորված է վնասակար սննդամթերքի գործածությամբ: Մարդկանց սննդակարգը ներկայում հարուստ է արագ սննդով, չիպսերով, քաղցր գազավորված ըմպելիքներով, աղի, կծու, թթու մթերքով և մեծ քանակությամբ համեմունքներով, ինչը խիստ բացասաբար է ազդում երիկամների և առհասարակ ամբողջ օրգանիզմի առողջական վիճակի վրա, ուստի լուրջ խնդիրներից խուսափելու համար հարկավոր է խիստ սահմանափակել դրանց գործածությունը:

3.      Կլիմայական պայմաններն ու կոշտ ջուրը

Կլիմայական պայմանների կտրուկ փոփոխությունը նույնպես կարող է դառնալ օրգանիզմում աղերի մակարդակի փոփոխության պատճառ՝ հանգեցնելով քարերի առաջացման: Օրինակ՝ եթե մարդը ձմռանը որոշ ժամանակով մեկնում է մեկ այլ երկիր, որտեղ օդի միջին ջերմաստիճանը 25°C-ից բարձր է, ապա նա պետք է օրվա ընթացքում սովորականից 1-2 բաժակ ավել ջուր խմի, քանի որ այդ դեպքում ուժեղանում է քրտնարտադրությունը, ինչն անսովոր է լինում օրգանիզմի համար:

Բացի այդ, երիկամներում քարերի առաջացման պատճառ կարող է դառնալ նաև կոշտ ջրի գործածությունը, ուստի նման ջրով մատակարարվող տրածաշրջանների բնակիչները պետք է ավելի ուշադիր լինեն:

Միզաքարային հիվանդությունը լուրջ խնդիր է, որը կարող է դրսևորվել շատ տհաճ ախտանշաններով: Եթե առաջացած քարը խոշոր է (0.5-1 սմ), ապա, որպես կանոն, ի հայտ են գալիս երիկամային խիթեր (почечная колика): Այս դեպքում ցավը կարող է ի հայտ գալ ինչպես պարբերաբար, այնպես էլ կրել մշտական բնույթ, սակայն մասնագետները նախազգուշացնում են, որ ոչ մի դեպքում պետք չէ սպասել մինչ ցավը մեղմվի առանց միջամտության: Նման դեպքերում հարկավոր է անհապաղ դիմել բժշկին, քանի որ քարը կարող է դառնալ բորբոքման պատճառ՝ հանգեցնելով պիելոնեֆրիտի:

Նյութի աղբյուրը՝ healthinfo.ua