Ինչպես կանխարգելել շաքարային դիաբետը. 7 արդյունավետ խորհուրդ

18:21 • 21.06.18

Շաքարային դիաբետը շատ վտանգավոր հիվանդություն է, որն անտեսելու դեպքում կարող է հանգեցնել հաշմանդամության: Բանն այն է, որ այս հիվանդությունն ախտահարում է օրգանիզմի բոլոր անոթները, խանգարում է հյուսվածքների նորմալ աշխատանքը, իսկ անտեսելու դեպքում կարող է դառնալ փտախտի առաջացման պատճառ:

Սակայն մասնագետները ներկայացրել են ամենաարդյունավետ միջոցները, որոնք կօգնեն խուսափել շաքարային դիաբետի զարգացումից:

1. Հրաժարվել վերամշակում անցած սննդամթերքից

Վերամշակում անցած սննդամթերքը պարունակում է մեծ քանակությամբ շաքար և շաքարի արհեստական փոխարինիչներ, որոնք էլ ավելի վնասակար են: Նման մթերքը բարձրացնում է արյան մեջ շաքարի մակարդակը, ինչն էլ նպաստում է ինսուլինի հանդեպ կայունության ձևավորման: Հենց սա էլ համարվում է հիվանդության առաջացմանը նպաստող հիմնական գործոնը: Նման խնդիրներից խուսափելու համար բժիշկները խորհուրդ են տալիս ուտել հնարավորինս շատ չմշակված սննդամթեք:

2. Հրաժարվել 35-ից բարձր գլիկեմիկ ինդեքս ունեցող սննդամթերքից

Գլիկեմիկ ինդեքսն այն ցուցանիշն է, որը ցույց է տալիս, թե սննդի յուրացման ընթացքում ինչ արագությամբ են ածխաջրերը վերածվում գլյուկոզայի: Որքան բարձր է այդ ինդեքսը, այնքան արագ են ածխաջրերը վերածվում գլյուկոզայի և այնքան արագ է բարձրանում արյան մեջ շաքարի մակարդակը: Բարձր գլիկեմիկ ինդեքս ունեցող սննդամթերքի շարքին են դասվում քաղցրավենիքը, հացաբուլկեղենը, թխվածքաբլիթները և այլն:

3. Կարգավորել քունը

Շաքարային դիաբետի կանխարգելման հարցում շատ մեծ նշանակություն ունի նաև քնի որակը: Բանն այն է, որ քնի պակասի դեպքում օրգանիզմն ավելի շատ գլյուկոզա է պահանջում, ինչը կարող է հետագայում դառնալ շաքարային դիաբետի առաջացման պատճառ:

4. Բարձրացնել սթրեսակայունությունը

Էմոցիոնալ և ոչ սթրեսակայուն մարդիկ ավելի շատ կալորիա և քաղցր մթերք են օգտագործում, իսկ նման մթերքը նպաստում է մեծ քանակությամբ ինսուլինի արտադրմանը: Հենց ինսուլինի հանդեպ կայունությունն էլ նպաստում է շաքարային դիաբետի զարգացմանը:

Ուսումնասիրությունները ցույց են տվել, որ սթրեսից ազատվելու լավագույն միջոցը ֆիզիկական ակտիվությունն է, ուստի շաքարային դիաբետը կանխարգելելու և սթրեսից ազատվելու համար հարկավոր է լինել հնարավորինս ակտիվ: Ընդ որում՝ խիստ մարզումների անհրաժեշտություն չկա, պարզապես հարկավոր է հաճախ զբոսնել և կատարել պարզ վարժություններ:

5. Բավարար քանակությամբ սպիտակուցներ օգտագործել

Շատ կարևոր են նաև սպիտակուցները, սակայն սննդաբանները նշում են, որ առաջին հերթին հարկավոր է ուշադրություն դարձնել բուսական ծագում ունեցող սպիտակուցներին: Նման սպիտակուցներով հարուստ են լոբազգիներն ու ընկուզեղենը:

6. Օգտագործել հիմնային մթերք

Հիմնային մթերքի յուրացումն օգնում է երկար ժամանակով կայունացնել արյան մեջ շաքարի մակարդակը և խուսափել տատանումներից: Նման սննդամթերքի շարքին են դասվում հավկիթը, հնդկահավի միսը, ձուկը, ճագարի միսը, ինչպես նաև կաթն ու կաթնամթերքը:

7. Ավելի շատ ջուր խմել

Ջուրը կենսական նշանակություն ունի մարդու համար: Այն պաշտպանում է շաքարի պատճառով արյան թանձրացումից և թույլ չի տալիս նորմայից շատ ուտել՝ կանխելով նաև ինսուլին հանդեպ կայունության ձևավորումը:

Նյութի աղբյուրը՝ healthinfo.ua