Ինչ կարող է պատմել մարդու դեմքը նրա առողջական վիճակի մասին

Առողջական լուրջ խնդիրները ժամանակին հայտնաբերելն ու միջոցներ ձեռնարկելն անչափ կարևոր է, քանի որ հետագայում դրանք կարող են շատ լուրջ հետևանքներ ունենալ: Սա է պատճառը, որ հարկավոր է շատ ուշադիր լինել օրգանիզմի տված ախտանշանների նկատմամբ և ցանկացած կասկածի դեպքում դիմել բժշկին:

Ձեր ուշադրությանն ենք ներկայացնում այն հիվանդությունները, որոնց մասին վկայող ախտանշանները կարող են ի հայտ գալ մարդու դեմքին:

·        Սրտի նոպա

Աչքերի շուրջն ի հայտ եկած մանր դեղնավուն ուռուցքները կարող են պայմանավորված լինել խոլեստերինի բարձր մակարդակով, ինչն էլ կարող է հանգեցնել սրտի նոպայի կամ սրտանոթային հիվանդությունների առաջացմանը: Նման խնդիրներից խուսափելու համար հարկավոր է անհապաղ դիմել սրտաբանին և բուժզննում անցնել:

·        Գլխուղեղի կաթված

Կատարյալ համաչափ դեմքեր գոյություն չունեն, սակայն մեծ մասամբ մարդիկ չեն նկատում այդ անհամաչափությունը: Եթե մարդու դեմքը փոխվում է, դառնում է շատ ավելի անհամաչափ, մի կողմն անշարժանում է կամ դիմախաղը շատ թույլ է արտահայտվում, ապա հարկավոր է անհապաղ դիմել բժշկին, քանի որ նման ախտանշանը կարող է պայմանավորված լինել նյարդային համակարգի հիվանդություններով և անգամ գլխուղեղի կաթվածով, ինչը շատ վտանգավոր է:

·        Էնդոկրին (ներզատական) համակարգի հիվանդություններ

Դեմքի անցանկալի մազերը միայն կոսմետիկ խնդիր չեն, ուստի ոչ մի դեպքում չի կարելի դրանք անուշադրության մատնել: Սովորաբար կանանց դեմքին անցանկալի մազերի ինտենսիվ աճը պայմանավորված է լինում հորմոնալ դիսբալանսով (առավել հաճախ հիրսուտիզմով կամ պոլիկիստոզ ձվարանների համախտանիշով): Նման խնդրի դեպքում կոսմետոլոգին դիմելու փոխարեն շատ ավելի արդյունավետ ու ճիշտ կլինի ներզատաբանին դիմելը:

·        Շաքարային դիաբետ

Շաքարային դիաբետի մասին վկայող ախտանշաններից մեկն է մարդու դեմքին ի հայտ եկած մանր կնճիռների «ցանցը»: Բացի այդ, նման կնճիռները կարող են վկայել նաև էնդոկրին համակարգի մեկ այլ հիվանդության՝ հիպոթիրեոզի (վահանաձև գեղձի թերֆունկցիա) մասին, ուստի հարկավոր է անպայման դիմել էնդոկրինոլոգին և համապատասխան բուժզննումն անցնել:

·        Անեմիա (սակավարյունություն)

Մաշկի հիվանդագին գուտանությունը կարող է պայմանավորված լինել սակավարյունությամբ, ուստի այս ախտանշանի դեպքում հարկավոր է անպայման ստուգել արյան մեջ հեմոգլոբինի մակարդակը: Գունատությունը հատկապես վտանգավոր է այդ դեպքում, երբ ուղեկցվում է ընդհանուր թուլությամբ և գերհոգնածության զգացումով:

·        Քնի օբստրուկտիվ ապնոէ

Քնի օբստրուկտիվ ապնոէն շատ վտանգավոր հիվանդություն է, որը դրսևորվում է քնած ժամանակ շնչառության ժամանակավոր կանգով (10 վայրկայն և ավել): Այս հիվանդության մասին վկայող հիմնական ախտանշաններն են խռմփոցը, հոգնածության զգացումն ու գլխացավերը, սակայն այն ունի նաև որոշ արտասովոր ախտանշաններ: Դրանց շարքին են դասվում «հետ ընկած» կզակը և պարանոցի ու ծնոտի փոքրացում: Նման ախտանշանների դեպքում հարկավոր է անպայման դիմել մասնագետին, քանի որ քնի օբստրուկտիվ ապնոէն շատ վտանգավոր է և կարող է դառնալ անգամ մահվան պատճառ:

·        Աուտոիմունային հիվանդություններ

Աուտոիմունային հիվանդությունների մասին վկայող ախտանշան կարող է լինել դեմքին ի հայտ եկած կարմիր ցանը, սակայն կախված տեսակից այն վկայում է տարբեր խնդիրների մասին: Այսպիսով խիտ ցանը, որն ուղեկցվում է սաստիկ քորով կարող է պայմանավորված լինել ցելիակիայով՝ գլյուտենի հանդեպ օրգանիզմի անհանդուրժողականությամբ, մինչդեռ այտերի վրա առաջացած կարմիր ցանը, որն իր ձևով նման թիթեռի, նախազգուշացնում է գայլախտի մասին: Սա բավական լուրջ ախտանշան է, որը ոչ մի դեպքում չի կարելի անտեսել:

Հարկ է հիշել, որ օրգանիզմը միշտ նախազգուշացնում է խնդիրների մասին ախտանշանների միջոցով, ուստի պարզապես հարկավոր է ավելի ուշադիր լինել և սովորել տարբերել այս կամ այն հիվանդության ախտանշանները: Սա կօգնի ժամանակին հայտնաբերել հիվանդությունն ու ազատվել դրանից, քանի որ հիվանդությունը կանխարգելելն ու վաղ փուլերում բուժելը շատ ավելի հեշտ է, քան դրա պատճառով ի հայտ եկած բարդությունների դեմ պայքարելը:

Նյութի աղբյուրը՝ med2.ru