Ձվարանների քաղցկեղի մասին վկայող 4 ախտանշան, որոնք ոչ մի դեպքում չի կարելի անտեսել

Քաղցկեղը շատ վտանգավոր հիվանդություն է, որն ունի ավելի քան 200 տեսակ և կարող է ախտահարել մարդու օրգանիզմի բոլոր հյուսվածքները: Սա դասվում է այն հիվանդությունների շարքին, որոնց բարեհաջող բուժումը հիմնականում կախված է վաղ ախտորոշումից, ուստի հարկավոր է շատ ուշադիր լինել:

Կանանց շրջանում քաղցկեղի ամենատարածված տեսակներից մեկը ձվարանների քաղցկեղն է: Ընդ որում՝ ներկայում այս հիվանդությունը զգալիորեն «երիտասարդացել» է և հաճախ բժշկին են դիմում բավական երիտասարդ կանայք: Սա է պատճառը, որ կանայք պետք է սովորեն տարբերել հիվանդության զարգացման մասին վկայող ախտանշաններն ու ժամանակին բուժզննում անցնեն:

Ձվարանների քաղցկեղը, ինչպես և ցանկացած այլ հիվանդություն, դրսևորվում է որոշ ախտանշաններով, որոնք իմանալը կօգնի ժամանակին հայտնաբերել խնդիրն ու արդյունավետ կերպով ազատվել դրանից: Ձեր ուշադրությանն ենք ներկայացնում այդ ախտանշաններից ամենատարածվածները:

·        Որովանի ստորին հատվածի կամ կոնքի ցավ

Դաշտանից առաջ կամ դրա ընթացքում որովայնի ստորին հատվածում կամ կոնքի հատվածում առաջացած ցավն ու սպազմները չպետք է անհանգստացնեն, քանի որ դա բնական երևույթ է, սակայն եթե ցավը կրում է քրոնիկ բնույթ, ապա հարկավոր է անպայման խորհրդակցել բժշկի հետ, քանի որ դա կարող է վկայել քաղցկեղի մասին:

·        Փորափքանք

Փորափքանքը բավական տհաճ խնդիր է, որը ծանոթ է գրեթե բոլորին: Գոյություն ունեն փորափքանի առաջացմանը նպաստող բազմաթիվ գործոններ, սակայն եթե այս խնդիրը պայմանավորված չէ դրանցից որևէ մեկով և կրում է քրոնիկ բնույթ, ապա անհրաժեշտ է ավելի ուշադիր լինել և բուժզննում անցնել, քանի որ այն կարող է շատ վտանգավոր ախտանշան լինել:

·        Ախորժակի վատացում և հագեցվածության զգացում

Ախորժակի վատացումը, հագեցվածության զգացումը, սովորականից քիչ ուտելն ու քաղց չզգալը կարող են պայմանավորված լինել աղիների հետ կապված խնդիրներով, սակայն նման ախտանշանի դեպքում հարկավոր է շատ ուշադիր լինել, քանի որ այն կարող է պայմանավորված լինել նաև ձվարանների քաղցկեղով:

·        Միզելու ցանկություն

Եթե միզելու ցանկությունը սովորականից ավելի հաճախ է անհանգստացնում և պայմանավորված չէ մեծ քանակությամբ հեղուկի, միզամուղ դեղամիջոցների կամ նման հատկությամբ օժտված սննդամթերքի գործածությամբ, ապա հարկավոր է անհապաղ դիմել բժշկին, քանի որ դա կարող է լինել ձվարանների քաղցկեղի մասին վկայող ախտանշաններից մեկը:

Ձվարանի քաղցկեղը շատ վտանգավոր հիվանդություն է, իսկ դրա ախտանշանները երբեմն նման են լինում այլ հիվանդությունների ախտանշաններին, ուստի հարկավոր է ավելի ուշադիր լինել: Նման դեպքերում առողջական էլ ավելի լուրջ խնդիրներից խուսափելու համար անհրաժեշտ է անգամ ամենաչնչին կասկածի դեպքում անհապաղ դիմել մասնագետին և բուժզննում անցնել: Հարկ է հիշել, որ հիվանդությունը կանխարգելելն ու վաղ փուլերում բուժելը շատ ավելի հեշտ է, քան հետագայում դրա հետևանքով ի հայտ եկած վտանգավոր բարդությունների դեմ պայքարելը:

Նյութի աղբյուրը՝ budetezdorovy.ru