Ինչ պետք է իմանան կանայք սրտի հիվանդությունների մասին

Սրտանոթային հիվանդությունները համարվում են մարդկանց մահացության հիմնական պատճառներից մեկը: Կանանցից շատերը կարծում են, որ սրտի հետ կապված խնդիրներից խուսափելու համար բավական է հետևել արյան ճնշմանն ու խոլեստերինի մակարդակին, սակայն կան նաև ռիսկի այլ գործոններ, որոնք նպաստում են սրտի հիվանդությունների առաջացմանը:

Նիհար կանայք նույնպես կարող են ռիսկային խմբում լինել

Ճարպակայումը սրտանոթային հիվանդությունների զարգացման հիմնական պատճառներից է, սակայն կան բազմաթիվ նիհար կանայք, որոնք տառապում են ճնշման տատանումներով ու սրտի հետ կապված խնդիրներով: Երբեմն խնդիրը գենետիկայի մեջ է, երբեմն էլ՝ խոլեստերինի բարձր մակարդակի: Երբեմն էլ խնդիրը կարող է պայմանավորված լինել վիսցերալ (ընդերային) ճարպի բարձր մակարդակով: Ճարպի այս տեսակը կուտակվում է հիմնականում որովայնի խոռոչում՝ խանգարելով լյարդի, ենթաստամոքսային գեղձի, աղիների աշխատանքին:

Վիսցերալ ճարպը համարվում է վտանգավոր, քանի որ արտադրում է սրտի համար վնասակար տոքսիններ:

Մարմնի զանգվածի ինդեքսը չափելիս հարկավոր է ուշադրություն դարձնել ճարպի այս տեսակի մակարդակին: Հիմնական ցուցանիշը գոտկատեղի չափն է. եթե այն գերազանցում է 90 սմ-ը, ապա մարդը ռիսկային խմբում է:

Դեպրեսիան նպաստում է սրտի հետ կապված խնդիրների զարգացմանը

Միայնությունն ու մեկուսացումն իսկապես կարող են դառնալ սրտի հիվանդությունների պատճառ, քանի որ միայնակ կանանց մոտ ավելի հաճախ են նկատվում դեպրեսիաներ: Դեպրեսիաների ժամանակ հիվանդի արյան մեջ բարձր է լինում կորտիզոլի և ադրենալինի մակարդակը, ինչի հետևանքով բարձրէ լինում ճնշման տատանումների և տարատեսակ բորբոքումների զարգացման վտանգը:

Միայնակ լինելու դեպքում հարկավոր է շատ ուշադիր ու հոգատար լինել սեփական առողջության հանդեպ: Անհրաժեշտ է կարգավորել սննդակարգը, հրաժարվել ալկոհոլից ու ծխախոտից և լինել ֆիզիկապես ակտիվ:

Հղիության ընթացքում կնոջ առողջական վիճակն ազդում է նրա հետագա կյանքի վրա

Եթե հղիությունն ընթացել է բարդություններով, նկատվել է արյան գերճնշում և շաքարի բարձր մակարդակ, ապա նույնիսկ ծննդաբերությունից հետո այդ ախտանշանների անհետացման դեպքում հարկավոր է շատ զգույշ լինել և պարբերաբար բուժզննում անցնել: Ուսումնասիրությունները ցույց են տվել, որ  հղիության ընթացքում առաջացած խնդիրները կարող են նպաստել սրտի հիվանդությունների առաջացմանը:

Սրտի նոպաների դեպքերի գրեթե կեսն աննկատ են մնում

Սրտի նոպաների մոտ 45%-ի ախտանշանները շատ թույլ են լինում և մարդիկ հաճախ անտեսում են դրանք: Հատկապես սա վերաբերում է կանանց, որոնք տղամարդկանցից ավելի հեշտ են դիմակայում ցավին: Գոյություն ունի նաև հատուկ եզրույթ՝ «լռող» սրտի նոպա, որի դեպքում նույնիսկ բժիշկները չեն կարողանում ախտանշանների միջոցով ախտորոշել սրիտի նոպան:

40 տարեկանից հետո ֆիզիկական լավ վիճակը շատ կարևոր է

Ուսումնասիրությունները ցույց են տվել, որ եթե կինը 40 տարեկանից հետո պահպանում է ֆիզիկական լավ վիճակը, նա 37%-ով նվազեցնում է 65 տարեկանից հետո գլխուղեղի կաթված ստանալու հավանականությունը: Բժիշկները խորհուրդ են տալիս նույնիսկ սրտի իշեմիկ հիվանդության դեպքում ֆիզիկական վարժություններ անել (չափավոր), քանի որ դա բարելավում է անոթների վիճակը:

Նյութի աղբյուրը՝ my.goodhouse.com.ua