Որոնք են արտարգանդային հղիության հիմնական պատճառները

Հղիության ընթացքում կնոջ օրգանիզմում տեղի են ունենում որոշ փոփոխություններ, որոնք թույլ են տալիս առողջ երեխա լույս աշխարհ բերել: Սակայն լինում են դեպքեր, երբ ի հայտ են գալիս որոշ գործոններ, որոնց հետևանքով պտղաձուն սկսում է զարգանալ ոչ թե արգանդում, այլ արգանդափողում, ինչը խիստ վտանգավոր է:

Արտարգանդային հղիությունը կարող է կնոջ համար շատ վտանգավոր լինել, քանի որ արգանդափողում զարգացող պտուղը կարող է ոչոշ ժամանակ անց դառնալ փողի պատի պատռման պատճառ, իսկ ուժգին արյունահոսությունը կարող է հանգեցնել շոկի և անգամ մահվան:

Նման խնդրից խուսափելու համար հարկավոր է իմանալ արտարգանդային հղիության հիմնական պատճառները և նվազագույնի հասցնել ռիսկային գործոնները, ուստի ձեր ուշադրությանն ենք ներկայացնում այդ պատճառները:

·        Արտարգանդային հղիության զարգացման հիմնական պատճառներից մեկն արգանդափողերում ընթացող բորբոքային գործընթացներն են, որոնք դառնում են դիսֆունկցիայի պատճառ, ինչի հետևանքով էլ ձվաբջիջը չի կարողանում առանց խոչընդոտների շարժվել ձվարաններից դեպի արգանդ:

·        Բացի այդ, նման խնդրի կարող են հանգեցնել նաև փոքր կոնքի օրգաններում վիրահատական միջամտությունները, հղիության ընդհատումներն ու բորբոքային գործընթացները, որոնք դառնում են սպիների առաջացման պատճառ՝ խոչընդոտելով ձվաբջջի շարժմանը:

·        Էնդոկրին (ներզատական) համակարգի, սեռական օրգանների և փոքր կոնքի օրգանների հիվանդություններն ու վարակները նույնպես կարող են լուրջ խնդիրներ առաջացնել:

·        Արտարգանդային հղիության զարգացմանը կարող է նպաստել նաև ներարգանդային պարույրը, որը թույլ չի տալիս, որ ձվաբջիջն ամրանա արգանդում:

·        Նման խնդիր կարող է առաջանալ նաև արգանդափողերի կառուցվածքային բնածին անոմալիաների դեպքում:

·        Մեծ է արտարգանդային հղիության հավանականությունը նաև արհեստական բեղմնավորման դեպքում:

·        Բացի այդ, արտարգանդային հղիության պատճառ կարող է դառնալ նաև հորմոնային թերապիան:

Միայն նշված պատճառները չեն, որ կարող են դառնալ արտարգանդային հղության զարգացման պատճառ, սակայն դրանք ամենից տարածվածներն են, ուստի այս գործոններից խուսափելը կօգնի զգալիորեն նվազեցնել նման վտանգավոր խնդրի զարգացման հավանականությունը: Հարկ է հիշել, որ խնդիրը կանխարգելելը շատ ավելի հեշտ է, քան հետագայում դրա հետևանքով ի հայտ եկած բարդությունների դեմ պայքարելը, ուստի հարկավոր է ավելի ուշադիր լինել, պարբերաբար բուժզննում անցնել, իսկ կասկածների դեպքում ժամանակին դիմել մասնագետին:

Նյութի աղբյուրը՝ med2.ru