Առողջական ինչ խնդիրի մասին են վկայում եղունգների վրա ի հայտ եկած սպիտակ բծերն ու կետերը

Առողջական խնդիրների դեպքում օրգանիզմը միշտ նախազգուշացնում է տարատեսակ ախտանշանների տեսքով: Նման ախտանշանների շարքին կարող են դասվել նաև եղունգների վրա ի հայտ եկած սպիտակ բծերն ու կետերը, ուստի հարկավոր է շատ ուշադիր լինել:

Ձեր ուշադրությանն ենք ներկայացնում այդ տարածված ախտանշանների նշանակությունը, ինչը կօգնի ժամանակին հայտնաբերել առողջական խնդիրներն ու միջոցներ ձեռնարկել:

Ինչի մասին են վկայում սպիտակ բծերը

Եղունգների վրա ի հայտ եկած սպիտակ բծերը շատերին են ծանոթ: Երբեմն ի հայտ է գալիս միայն մեկ կամ մի քանի աննշան բիծ, իսկ երբեմն էլ դրանք պատում են ամբողջ եղունգը: Բացի այդ, դրանք կարող են ի հայտ գալ ինչպես հազվադեպ, այնպես էլ պարբերաբար, սակայն ամեն դեպքում այս խնդիրը չի կարելի անուշադրության մատնել, քանի որ այն կարող է պայմանավորված լինել լուրջ խանգարումներով:

Նման բծերի առաջացումն ամենից հաճախ պայմանավորված է լինում եղունգի վնասվածքով, որը մարդը կարող է ստանալ անգամ մատնահարդարման ժամանակ:

Սակայն մեխանիկական վնասվածքները նման բծերի առաջացման միակ պատճառը չեն, քանի որ դրանք կարող են լինել նաև որոշ հիվանդությունների մասին վկայող ախտանշան: Օրինակ՝ բծերի առաջացման պատճառ կարող են դառնալ սթրեսները կամ սրտանոթային համակարգի հիվանդությունները: Բանն այն է, որ նման հիվանդությունների դեպքում հաճախ վատանում է արյան շրջանառությունը և բավարար քանակությամբ արյուն չստանալու պատճառով եղունգներն ավելի «անորակ» են լինում:

Բացի այդ, նման բծերը կարող են վկայել նաև վիտամինների դեֆիցիտի մասին: Եղունգներն ու մազերն անմիջականորեն կապված են մարդու մաշկի հետ, իսկ վիտամինների ու կարևոր հանքանյութերի պակասը խիստ բացասաբար է ազդում մաշկի վրա, ինչի հետևանքով վատանում է նաև մազերի ու եղունգների վիճակը:

Այս սպիտակ բծերը կարող են ի հայտ գալ նաև եղունգների սնկային հիվանդության հետևանքով, սակայն այս դեպքում կլինեն նաև հիվանդությանը բնորոշ այլ ախտանշաններ՝ եղունգի հաստացում, գույնի փոփոխություն և այլն: Նման դեպքերում հարկավոր է շատ ուշադիր լինել և ժամանակին ազատվել խնդրից՝ այլապես հետագայում կարող են ի հայտ գալ էլ ավելի լուրջ բարդություններ:

Ինչի մասին են վկայում սպիտակ կետերը

Սպիտակ բծերից բացի եղունգների վրա հաճախ առաջանում են նաև սպիտակ կետեր, որոնք մարդիկ, որպես կանոն, սովորաբար անտեսում են: Սակայն այս կետերը նույնպես կարող են վկայել լուրջ խանգարումների մասին, ուստի դրանց առկայության դեպքում անհրաժեշտ է շատ ուշադիր լինել և անպայման խորհրդակցել բժշկի հետ:

Մասնագետների խոսքով՝ նման կետեր կարող են առաջանալ օրգանիզմում նյութափոխանակության գործընթացների խանգարման դեպքում: Ընդ որում՝ նման խանգարումները որպես կանոն կապված են լինում B վիտամինի պակասի հետ:

Սակայն B խմբի վիտամինների պակասը սպիտակ կետերի առաջացման միակ պատճառը չէ, քանի որ երբեմն նման կետեր են առաջանում նաև աղիների աշխատանքի հետ կապված խանգարումների դեպքում: Սա շատ ավելի լուրջ խնդիր է, որը կարող է պայմանավորված լինել անգամ հորմոնալ դիսֆունկցիայով, ուստի հարկավոր է շատ ուշադիր լինել և անուշադրության չմատնել օրգանիզմի տված ազդանշանները:

Նյութի աղբյուրը՝ aif.ru