Որ դեպքերում է քաղցկեղը պայմանավորված լինում ժառանգական նախատրամադրվածությամբ և ինչպես կարելի է խուսափել այս խնդրից

17:03 • 28.06.18

Քաղցկեղը հիվանդություն է, որը, ցավոք, հազարավոր կյանքեր է խլում: Ընդ որում կան մարդիկ, որոնք ունեն քաղցկեղի գենետիկ նախատրամադրվածություն, ուստի պետք է շատ ավելի զգույշ լինեն և պարբերաբար բուժզննում անցնեն: Հիմնականում ժառանգաբար փոխանցվում է կրծքագեղձի և ձվարանների քաղցկեղը, ուստի կանանց հաճախ է հուզում այն հարցը, թե որ դեպքերում է բարձր օնկոլոգիական հիվանդության զարգացման հավանականությունը և ինչպես կարելի է խուսափել դրանից:

Ուսումնասիրությունները ցույց են տվել, որ կրծքագեղձի քաղցկեղի դեպքերի մոտ 1/10 մասը պայմանավորված է լինում ժառանգականությամբ: Քաղցկեղի նման դեպքերը շատ ավելի դժվար են բուժվում և հիմնականում զարգանում են 40-45 տարեկան կանանց մոտ:

Ուռուցքի այդ տեսակները պայմանավորված են լինում BRCA1 և BRCA2 գեների մուտացիայով: Հենց այս գեների գենետիկ թեստավորումը թույլ կտա պարզել կրծքագեղձի և ձվարանների քաղցկեղի առաջացման հավանականությունը: Ընդ որում՝ որոշ կանանց մոտ այն կարող է հասնել 80-100%-ի:

Բարեբախտաբար՝ կան միջոցներ, որոնք կօգնեն կանխել նման ուռուցքների զարգացումը, ուստի խնդրի առկայությունը պարզելու և իրավիճակը վերահսկողության տակ պահելու համար հարկավոր է անպայման գենետիկ թեստավորում անցնել: Սա հատկապես կարևոր կլինի հետևալ դեպքերում.

· եթե կնոջ մոտ հարազատների շրջանում (մայր, հարազատ քույրեր, տատիկներ, մորաքույրեր կամ հորաքույրեր) եղել է կրծքագեղձի կամ ձվարանների քաղցկեղից տառապող կին (կամ կանայք):

· եթե կնոջ մոտ հարազատների շրջանում հայտնաբերվել է BRCA1 և BRCA2 գեների վտանգավոր մուտացիա:

Բացի այդ, լինում են դեպքեր, որ նման թեստի անհրաժեշտություն է լինում կրծքագեղձի քաղցկեղի ախտորորշման դեպքում, քանի որ այդ թեստի պատասխանից է կախված լինում բուժման տեսակի ընտրությունը: Նման անհրաժեշտություն է լինում, եթե.

· քաղցկեղը հայտնաբերվել է 45-ից ցածր տարիքի կնոջ մոտ (մինչ դաշտանադադարը),

· ուռուցքները հայտնաբերվել են երկու կրծքագեղձերում (նշանակություն չունի՝ դրանք միաժամանակ են հայտնաբերվել, թե ոչ),

· սկզբում հայտնաբերվել է կրծքագեղձի քաղցկեղը, այնուհետև՝ ձվարանների կամ հակառակը,

· հայտնաբերվել է կրծքագեղձի եռակի բացասական քաղցկեղ:

Նյութի աղբյուրը՝ aif.ru