Ինչ է ալերգիկ ռինիտը, որոնք են դրա ախտանշաններն ու բուժման եղանակները

Ալերգիկ ռինիտն ախտաբանական գործընթաց է, որը բնորոշվում է հաճախակի փռշտալով, քթի և կոկորդի քորով, քթից արտադրության հոսքով ու քթի փակվածությամբ: Նման ռեակցիայի պատճառն ալերգեններն են: Այս խնդիրն առկա է բնակչության 7-30 տոկոսի մոտ: Ընդ որում՝ մեծ մասամբ այն ի հայտ է գալիս երեխաների մոտ:

Ալերգիկ ռինիտի առաջացման պատճառ կարող են դառնալ.

·        տան փոշին,

·        փոշու մեջ առկա տիզերը,

·        ծաղկափոշին,

·        կենդանիների ալերգենները,

·        դեղամիջոցները,

·        սննդամթերքի որոշ տեսակները,

·        խմորիչների ու բորբոսասնկերի ալերգենները,

·        ժառանգական գործոնը:

Ալերգիկ ռինիտը կարող է լինել ծանրության տարբեր աստիճանների (թեթև, միջին, ծանր): Միջին ծանրության ալերգիկ ռինիտի դեպքում մարդու մոտ կարող են նկատվել քնի խանգարումներ, ամենօրյա ակտիվության ու ֆիզիկական ծանրաբեռնվածության պակաս, հոգնածության զգացում, ինչպես նաև աշխատունակության անկում:

Ալերգիկ ռինիտի ախտանշաններն են.

·        քթից հեղուկ արտադրությունը,

·        քորը,

·        թուլությունը,

·        ախորժակի կորուստը,

·        փռշտոցը,

·        մշտական արցունքահոսությունը,

·        գլխացավերը,

·        խնդիրները՝ կապված ուշադրության կենտրոնացման հետ:

Ալերգիկ ռինիտի տեսակները

Ալերգիկ ռինիտը լինում է երկու տեսակի՝ սեզոնային և շուրջտարյա: Առավել հաճախ հանդիպում է սեզոնային ալերգիկ ռինիտը, որը սկսվում է տարվա որոշակի ժամանակահատվածում և հիմնականում պայմանավորված է լինում ծաղկափոշիով: Այս հիվանդությունը անվանվում է հարդային տենդ:

Շուրջտարյա ալերգիկ ռինիտը պայմանավորված է լինում ալերգեններով, որոնց հետ շփվում է մարդը: Այս հիվանդությունը կարող է նման լինել հարդային տենդին և ուղեկցվում է քթի և աչքերի լորձաթաղանթի գրգռվածությամբ:

Հիվանդությունը կարող է ընթանալ մի քանի փուլով.

1.      Քթի փակվածություն՝ անոթների տոնուսի խանգարման հետևանքով:

2.      Քթի փակվածություն, որն ուղեկցվում է քթի խոռոչի անոթների լայնացմամբ:

3.      Քրոնիկ այտուցվածություն, որի դեպքում կա քթի մշտական փակվածություն ու լորձաթաղանթի կապտածություն:

4.      Հիպերպլազիա, որն առաջացնում է քթի փակվածություն, լորձաթաղանթի գերաճ, ինչպես նաև պոլիպներ: Այս հիվանդության ֆոնին կարող են առաջանալ երկրորդական այտույցներ:

Հիվանդության ախտորոշումը

Հիվանդության ախտորոշման համար հարկավոր է խորհրդակցել բժիշկ-ալերգոլոգի հետ, որն էլ բուժզննումից հետո կնշանակի անհրաժեշտ անալիզները: Այդ անալիզները ներառում են քթից վերցված քսուքի զննում, արյան անալիզներ, մաշկային թեստեր և ռինոմանոմետրիա:

Ալերգիկ ռինիտի բուժումը

Ալերգիկ ռինիտի բուժման համար հարկավոր է առաջին հերթին ազատվել դրա առաջացման պատճառից: Բուժումը կարելի է իրականացնել ինչպես դեղամիջոցների, այնպես էլ ժողովրդական բաղադրատոմսերի օգնությամբ: Հղի կանանց դեպքում կիրառվում է բուժման նույն թերապիան ինչ և երեխաների դեպքում:

Դեղորայքային բուժում

Դեղորայքային բուժման դեպքում սովորաբար օգտագործվում են հակահիստամինային դեղամիջոցներ, որոնք արգելակում են հիստամինների բացասական ազդեցությունը: Այս դեղամիջոցներն ազդում են արագ և չեն առաջացնում կախվածություն: Բացի այդ, դրանք ազատում են ալերգիկ ռինիտի բազմաթիվ ախտանշաններից:

Բուժումը կարելի է իրականացնել նաև քրոմոնների օգնությամբ, որոնք կանխում են ալերգիկ ռեակցիաների դեպքում կենսաբանորեն ակտիվ բաղադրիչների արտազատումը: Այս կաթիլներն օգտագործվում են նաև կանխարգելիչ նպատակներով, սակայն դրանց ազդեցությունը շատ ուշ է նկատվում, ուստի այս դեղամիջոցները չեն օգնի կարգավորել շնչառությունը: Քրոմոնների առավելություններից մեկը կողմնակի բարդությունների բացակայությունն է, ինչի շնորհիվ դրանք կարելի է օգտագործել նաև երեխաների և հղիների բուժման համար:

Ալերգիկ ռինիտի դեպքում հաճախ կիրառվում են նաև անոթները նեղացնող դեղամիջոցներ, որոնք շատ արագ, սակայն միևնույն ժամանակ կարճ ժամանակով, ազատում են այտույցներից ու քթի փակվածությունից: Սակայն այս դեղամիջոցները չի կարելի օգտագործել չափազանց երկար ժամանակ, քանի որ այդ դեպքում ի հայտ կգա քրոնիկ այտուցվածություն և ռինորեա:

Բացի այդ, ալերգիկ ռինիտից ազատվելու հիանալի տարբերակ կարող են լինել գլյուկոկորտիկոստերոիդները: Սրանք հորմոնների մի տեսակ են, որոնք արտադրվում են մակերիկամների կողմից և օժտված են հիանալի հակաբորբոքային և հակաալերգիկ ազդեցությամբ: Գլյուկոկորտիկոստերոիդներ պարունակող դեղամիջոցները կօգնեն բավական երկար ժամանակով ազատվել ալերգիկ ռեակցիաներից ու տհաճ ախտանշաններից: Բացի այդ, այս դեղամիջոցները ճիշտ օգտագործելու դեպքում կարելի է չանհանգստանալ լորձաթաղանթի հյուծման մասին, քանի որ դրանք ազդում են անմիջապես օգտագործելուց հետո և չեն ունենում ոչ մի բացասական ազդեցություն: Սա է պատճառը, որ գլյուկոկորտիկոստերոիդներ պարունակող դեղամիջոցները կարել է օգտագործվել նույնիսկ երեխաների մոտ առաջացած ալերգիկ ռինիտի բուժման համար:

Բուժում ժողովրդական միջոցների օգնությամբ

Ալերգիկ ռինիտի դեպքում մարդիկ շատ հաճախ դիմում են նաև ժողովրդական բժշկության օգնությանը: Սակայն հարկ է հիշել, որ այս թերապիան անհրաժեշտ է համադրել հիմնական բուժման հետ՝ նախապես խորհրդակցելով բժշկի հետ:

Ձեր ուշադրությանն ենք ներկայացնում ներկայում ամենաարդյունավետ ու փորձված բաղադրատոմսերը.

1.      Քաջվարդի (пион) արմատների պալարները մանրացնել և փոշի դարձնել, այնուհետև ստացված փոշին օգտագործել օրվա ընթացքում՝ 3-4 գդալ: Այս միջոցը կօգնի ընդամենը մի քանի օրում ազատվել փռշտոցից և քթի փակվածությունից:

2.      1 գդալ ծիծեռնախոտը (чистотел) 4 ժամ թրմել 500 մլ ջրում և օգտագործել օրական երկու անգամ 1/3 բաժակ:

3.      Այս բաղադրատոմսի համար հարկավոր է մանրացնել ծաղկող սևագլխիկի (черноголовка) խոտը և օգտագործել օրական 3 անգամ՝ մեկական ճաշի գդալ: Այս բույսի եփուկը կօգնի արդյունավետ կերպով բուժել ալերգիկ ռինիտը: Պարզապես հարկավոր է խմել տաք եփուկն օրվա ընթացքում:

4.      Դեղատնային երիցուկի 1 ճաշի գդալին հարկավոր է ավելացնել 250 մլ եռման ջուր, թրմել կես ժամ, այնուհետև ընդունել ստացված թուրմն օրական երկու անգամ՝ մեկական ճաշի գդալ:

Ալերգիկ ռինիտը հիվանդություն է, որը կարող է զգալի տհաճ զգացողություններ ու խնդիրներ առաջացնել: Այս հիվանդության դեպքում հարկավոր է հնարավորինս արագ միջոցներ ձեռնարկել և սկսել անհրաժեշտ բուժումը: Սակայն հարկ է հիշել, որ բուժումը պետք է նշանակի միայն փորձառու մասնագետը, որը հաշվի կառնի հիվանդի օրգանիզմի բոլոր առանձնահատկությունները:

Նյութի աղբյուրը՝ simptomer.ru