5 օգտակար մթերք, որոնք կօգնեն իջեցնել արյան մեջ պարունակվող «վատ» խոլստերինի մակարդակը

Խոլեստերինը շատ կարևոր նյութ է, որը պարունակվում է արյան մեջ և հարկավոր է օրգանիզմին նորմալ կենսագործունեության համար: Սակայն երբ այս տարրի մակարդակը նորմայից բարձր է լինում, այն կարող է առողջական լուրջ խնդիրների առաջացման պատճառ դառնալ: Սա է պատճառը, որ մասնագետները հորդորում են ավելի ուշադիր լինել ու պարբերաբար բուժզննում անցնել՝ լուրջ բարդություններից խուսափելու համար:

Սակայն խոլեստերինի մակարդակի վրա լուրջ ազդեցություն է ունենում մարդու սննդակարգը, ինչը նշանակում է, որ կան սննդամթերքի տեսակներ, որոնք կարող են իջեցնել խոլեստերինի մակարդակն ու կանխարգելել լուրջ հիվանդությունների զարգացման հավանականությունը՝ թույլ տալով խուսափել դեղամիջոցների գործածությունից ու դրանց առաջացրած կողմնակի բարդություններից:

Ձեր ուշադրությանն ենք ներկայացնում 5 օգտակար ու հասանելի մթերք, որոնք կօգնեն կարգավորել խոլեստերինի մակարդակն ու մաքրել զարկերակները կուտակված խոլեստերինից: Ընդ որում՝ սննդամթերքի միջոցով խոլեստերինի մակարդակի կարգավորման մեթոդը ոչ միայն արդյունավետ է, այլև չի առաջացնում որևէ կողմնակի բարդություն:

·        Վարսակի շիլա

Արյան մեջ խոլեստերինի մակարդակը նվազեցնելու ամենապարզ ու հասանելի միջոցը վարսակի շիլայի գործածությունն է: Վարսակը պարունակում է լուծվող մանրաթելեր, որոնք օգնում են մաքրել օրգանիզմը խոլեստերինից ու այլ վնասակար տարրերից: Պարզապես հարկավոր է վարսակը լվանալ, ավելացնել եռման ջուր, այնուհետև դրանով լի տարան փաթաթել տաք կտորով և թրմել մինչև առավոտ: Առավոտյան ստացված շիլային կարելի է ավելացնել բանան, հատապտուղներ, ընկույզներ կամ սերմեր (ըստ ճաշակի) և վայելել անչափ համեղ ու օգտակար նախաճաշը:

·        Լոբազգիներ

Լոբազգիները պարունակում են մեծ քանակությամբ լուծվող մանրաթելեր, ինչի շնորհիվ արդյունավետ կերպով մաքրում են օրգանիզմը խոլեստերինից: Ընդ որում՝ դրանց յուրացման համար բավական երկար ժամանակ է պահանջվում, ուստի քաղցի զգացումը նույնպես չի տանջում երկար ժամանակ: Սա օգնում է նաև ազատվել ավելորդ քաշից և հենց սա է պատճառը, որ լոբազգիները համարվում են անփոխարինելի մթերք նիհարել ցանկացողների համար:

·        Ընկույզներ ու սերմեր

Գիտնականների անցկացրած բազմաթիվ ուսումնասիրությունները ցույց են տվել, որ սննդակարգում նուշի, հունական ընկույզի, գետնանուշի և առհասարակ ընկույզի ցանկացած այլ տեսակի, ինչպես նաև սերմերի գործածությունը շատ օգտակար է սրտամկանի համար: Օրական ընդամենը 50-70 գրամ ընկույզ կամ սերմեր օգտագործելը կօգնի նվազեցնել «վատ» խոլեստերինի (ցածր խտության լիպոպրոտեիններ) մակարդակը միջինում 5%-ով: Բացի այդ, ընկույզներն ու սերմերը պարունակում են նաև մի շարք օգտակար տարրեր, որոնք շատ կարևոր են սրտամկանի և առհասարակ ամբողջ օրգանիզմի համար:

Սակայն հարկ է հիշել, որ ընկույզներից ու սերմերից հնարավորինս շատ օգուտ ստանալու համար դրանք հարկավոր է նախապես առնվազն 1-2 ժամ թողնել ջրի մեջ:

·        Յողոտ ձկնատեսակներ (ծովային)

Շաբաթական 2-3 անգամ յուղոտ ձուկ օգտագործելը նույնպես շատ օգտակար է և օգնում է զգալիորեն իջեցնել «վատ» խոլեստերինի մակարդակը: Սա պայմանավորված է նրանով, որ յուղոտ ձկնատեսակները պարունակում են օմեգա-3 ճարպաթթուներ, որոնք օժտված են ցածր խտության լիպոպրոտեինների մակարդակը նվազեցնելու հատկությամբ: Բացի այդ, այս դեպքում ձուկը հաճախ օգտագործվում է մսի փոխարեն, իսկ միսը սովորաբար նպաստում է «վատ» խոլեստերինի մակարդակի բարձրացմանը:

Միևնույն ժամանակ օմեգա-3 ճարպաթթուները նվազեցնում են արյան մեջ տրիգլիցերիդների մակարդակն ու պաշտպանում են սրտամկանը՝ օգնելով կանխարգելել սրտի ռիթմի խանգարումներն ու սրտամկանի հետ կապված այլ խնդիրները:

·        Կտավատի յուղ

Շատ կարևոր բաղադրիչ է նաև կտավատի յուղը, որը նույնպես հարկավոր է անպայման ներառել առօրյա սննդակարգում: Այս յուղը նույնպես հարուստ է օմեգա-3 ճարպաթթուներով, ինչի շնորհիվ մաքրում է օրգանիզմը խոլեստերինից և օգնում է ազատվել առողջական տարբեր խնդիրներից: Պարզապես հարկավոր է օգտագործել օրական 1-2 ճաշի գդալ կտավատի յուղ՝ ավելացնելով այն պատրաստի ուտեստներին կամ աղցաններին:

Սակայն հարկ է հիշել, որ առողջական լուրջ խնդիրների դեպքում անհրաժեշտ է անպայման խորհրդակցել բժշկի հետ և չզբաղվել ինքնաբուժությամբ, քանի որ դա կարող է խիստ վտանգավոր լինել և էլ ավելի վատացնել հիվանդի վիճակը՝ հանգեցնելով լուրջ բարդությունների: Բացի այդ, միայն փորձառու մասնագետը կարող է ճիշտ ախտորոշել հիվանդությունն ու նշանակել անհրաժեշտ բուժումը, որը կլինի և՛ արդյունավետ, և՛ անվնաս:

Նյութի աղբյուրը՝ budetezdorovy.ru