Շագանակագեղձի քաղցկեղի մասին վկայող վաղ ախտանշաններ, որոնք ոչ մի դեպքում չի կարելի անտեսել

18:13 • 02.07.18

Շագանակագեղձի քաղցկեղն ամենատարածված օնկոլոգիական հիվանդությունն է տղամարդկանց շրջանում, որի դեպքում ախտաբանական փոփոխությունները տեղի են ունենում շագանակագեղձում: Մինչ հիվանդությունը չի տարածվել այլ հյուսվածքների վրա, այն լուրջ վնաս չի հասցնում, սակայն երբ այն դառնում է ագրեսիվ՝տարածվելով նաև այլ օրգանների հատվածում, ի հայտ են գալիս առողջական լուրջ խնդիրներ, որոնք կարող են շատ վտանգավոր լինել:

Քաղցկեղը դասվում է այն հիվանդությունների շարքին, որոնց բարեհաջող բուժումը մեծ մասամբ կախված է վաղաժամ ախտորոշումից, սակայն խնդիրն այն է, որ մարդիկ ոչ միշտ են ուշադրություն դարձնում օրգանիզմի տված ախտանշաններին, ինչի հետևանքով հիվանդությունը խորանում է:

Այնուամենայնիվ՝ զարգացման վաղ փուլերում շագանակագեղձի քաղցկեղը դրսևորվում է որոշ ախտանշաններով, որոնք չանտեսելը կօգնի ժամանակին հայտնաբերել խնդիրն ու միջոցներ ձեռնարկել՝ դրանից ազատվելու համար:

Շագանակագեղձի քաղցկեղի մասին վկայող վաղ ախտանշաններն են.

· Միզապարկը հաճախ դատարկելու ցանկությունը (հատկապես գիշերվա ժամերին),

· Միզելիս կամ սերմնաժայթքման ժամանակ ի հայտ եկող ցավն ու այրոցը,

· Թույլ և ընդհատվող միզարձակությունը,

· Ցավը և տհաճ զգացողությունները միզարձակությունը զսպելու դեպքում,

· Անմիզապահությունը (հատկապես գիշերը, ինչպես նաև հազի, ծիծաղի կամ փռշտոցի ժամանակ),

· Մեզի կամ սերմնահեղուկի մեջ առկա արյան հետքերը,

· Միզարձակության հետ կապված ցանկացած այլ խնդիր:

Այս ախտանշանները կարող են վկայել նաև միզուղիների վարակների կամ բարորակ ախտաբանական գործընթացների հետևանքով շագանակագեղձի մեծացման մասին, սակայն ամեն դեպքում ուշադիր լինելը կօգնի խուսափել լուրջ խնդիրներից և հետագա բարդություններից: Սա է պատճառը, որ նշված ախտանշաններից որևէ մեկի առկայության դեպքում հարկավոր է անպայման դիմել բժշկին ու բուժզննում անցնել:

Նյութի աղբյուրը՝ med2.ru