Խորհուրդներ գինեկոլոգից, որոնց պետք է հետևի յուրաքանչյուր կին

Կանայք հաճախ են անուշադրության մատնում սեփական առողջությունը, մինչդեռ հիվանդությունները կանխարգելելը շատ ավելի հեշտ է, քան բուժելը: Հարկ է հիշել, որ հիվանդությունը ժամանակին չբուժելու դեպքում հետագայում կարող են ի հայտ գալ շատ ավելի լուրջ բարդություններ:

Ձեր ուշադրությանն ենք ներկայացնում 5 խորհուրդ գինեկոլոգից, որոնց պետք է հետևի յուրաքանչյուր կին:

1.      Հարկավոր է հատուկ ուշադրություն դարձնել հեշտոցային արտադրությանը

Հեշտոցային արտադրությունը մշտապես առկա է բոլոր կանանց մոտ, սակայն ոմանց մոտ այդ արտադրությունը միշտ թափանցիկ է լինում, իսկ մյուսների մոտ ժամանակ առ ժամանակ ձեռք է բերում դեղնավուն երանգ կամ թանձրանում է: Այդ արտադրությունն անփոփոխ է մնում միայն հորմոնալ հակաբեղմնավորիչներ ընդունելու դեպքում: Դաշտանային ցիկլի տարբեր փուլերում հեշտոցային  արտադրության քնակության, թանձրության, գույնի և նույնիսկ հոտի փոփոխություններին հետևելը շատ մեծ նշանակություն ունի, քանի որ դա կօգնի ժամանակին նկատել խանգարումներն ու վարակման ախտանշանները:

Օրինակ՝ ավելի թանձր, կաթնաշոռին նմանվող արտադրությունը, որն ուղեկցվում է ուժեղ քորով, վկայում է սնկային վարակի մասին: Անգույն հեղուկ արտադրությունը, որն ունի տարօրինակ հոտ և ի հայտ է գալիս սեռական ակտից հետո, կարող է լինել բակտերիալ վագինոզի՝ մինչև 40 տարեկան կանանց շրջանում ամենատարածված սեռավարակի ախտանշան, իսկ տհաճ հոտով, կանաչավուն ու փրփրացող արտադրությունը խոսում է տրիխոմոնիազի մասին:

2.      Պետք չէ անուշադրության մատնել կրկնվող ախտանշանները

Կանանց 75%-ի մոտ կյանքում գոնե մեկ անգամ լինում է սնկային հիվանդություն (կանդիդոզ կամ կաթնասնկախտ): Եթե կինն ինքնուրույն կարողանում է հայտնաբերել հիվանդությունը, ապա հարկավոր է հատուկ մոմիկների կամ քսուքների օգնությամբ բուժել այն, սակայն կասկածների դեպքում անհրաժեշտ է դիմել մասնագետի օգնությանը, որն էլ անհրաժեշտության դեպքում կնշանակի համապատասխան բուժումը:

Շատ տարածված է նաև սեռական հերպեսի վիրուսը, որը կա մարդկանց գրեթե 90%-ի օրգանիզմում, սակայն ակտիվանում է միայն 10-20%-ի մոտ (հիմնականում իմունային համակարգի թուլացման, մրսածության կամ սթրեսի դեպքում): Այս վիրուսը փոխանցվում է սեռական ակտի ժամանակ կամ հիվանդի անձնական հիգիենայի պարագաներն օգտագործելու դեպքում:

3.      Պետք չէ մոռանալ վարակների զարգացմանը նպաստող գործոնների մասին

Հիվանդությունների զարգացման հավանականությունը բարձրացնում է այն ամենը, ինչն ազդում է հեշտոցի թթվահիմնային հաշվեկշռի և հորմոնների մակարդակի վրա (շաքարային դիաբետ, հակաբիոտիկներ, հղիություն, հակաբեղմնավորիչ դեղահաբեր):  Այս դեպքում հարկավոր է տանը միշտ ունենալ հակասնկային դեղահաբեր և ընդունել դրանք հիվանդության առաջին իսկ ախտանշանների դեպքում: Ի դեպ՝ հակաբիոտիկներն ու օրալ հակաբեղմնավորիչները բարձրացնում են բակտերիալ վագինոզի առաջացման հավանականությունը, որը մարդիկ հաճախ շփոթում են սնկային վարակների հետ՝ փորձելով բուժել նույն դեղամիջոցներով:

Վարակների ակտիվացման պատճառ կարող են դառնալ նաև այլ գործոնները: Օրինակ՝ լվացումները «մաքրում» են հեշտոցը նաև օգտակար բակտերիաներից, որոնք կարգավորում են ախտածին բակտերիաների քանակը, ինչն էլ հանգեցնում է վագինոզի առաջացման: Հեշտոցի բնական պաշտպանիչ միկրոֆլորայի համար վնասակար կարող են լինել նաև ինտիմ հիգիենայի համար նախատեսված հատուկ միջոցները, որոնցից նույնպես հարկավոր է հրաժարվել կամ գոնե չչարաշահել:

4.          Հարկավոր է միշտ հիշել ապահով սեքսի մասին

Գինեկոլոգները վստահեցնում են, որ ոչ մի դեպքում չի կարելի անուշադրութան մատնել ապահովությունը սեքսի ժամանակ՝ նույնիսկ, եթե զուգընկերները լիովին վստահում են միմյանց:

Բնականաբար՝ անցանկալի հղիությունից և հիվանդություններից պաշտպանվելու ամենապարզ ու հասանելի տարբերակը պահպանակներն են, որոնք ապահովում են գրեթե կատարյալ պաշտպանություն, չունեն հակացուցումներ ու չեն առաջացնում կողմնակի բարդություններ: Սակայն այս միջոցը նույնպես չի կարող բացարձակ պաշտպանություն ապահովել, ուստի որևէ ախտանշանի դեպքում հարկավոր է շտապ բուժզննում անցնել:

Ներկայում հեպատիտ B-ն սեռական ճանապարհով փոխանցվող միակ հիվանդությունն է, որի կանխարգելման համար գոյություն ունի հատուկ պատվաստանյութ, իսկ կանխարգելիչ պատվաստումներն իրականացվում են երեք փուլով: Ընդ որում՝ պատվաստումը հարկավոր է կրկնել յուրաքանչյուր 10-12 տարին մեկ:

5.      Հարկավոր է պարբերաբար բուժզննում անցնել

Շատերը վստահ են, որ պարբերաբար քսուքի անալիզ հանձնելու և բացասական պատասխան ստանալու դեպքում անհանգստանալու կարիք չկա, մինչդեռ դա խոսում է միայն քաղցկեղի բջիջների և պապիլոմա վիրուսի բացակայության մասին:

Սա է պատճառը, որ նույնիսկ եթե ոչ մի անհանգստացնող ախտանշան չկա, միևնույն է անհրաժեշտ է տարեկան երկու անգամ գինեկոլոգիական բուժզննում անցնել և հանձնել անհրաժեշտ անալիզները: Սա հատկապես կարևոր է նոր զուգընկերոջ դեպքում, քանի որ այս պարագայում բարձրանում է բակտերիալ վագինոզի, խլամիդիոզի և տրիխոմոնիազի առաջացման հավանականությունը:

Նման հիվանդույթունները կարող են ընթանալ առանց արտահայտված ախտանշանների, իսկ խորանալու դեպքում հանգեցնել անպտղության, արտարգանդային հղիության և վաղաժամ ծննդաբերության: Բացի այդ, դրանք նաև բարձրացնում են ՄԻԱՎ-ով վարակվելու հավանականությունը, քանի որ գինեկոլոգիական վարակները թուլացնում են օրգանիզմի պաշտպանիչ ֆունկցիաները:

Նյութի աղբյուրը՝ lady-journal.info