Գլխուղեղի «լուռ» կաթված. վտանգավոր խնդիր, որը հաճախ աննկատ է մնում

Ինչ է գլխուղեղի «լուռ» կաթվածը

Գլխուղեղի կաթվածը տեղի է ունենում գլխուղեղի անոթներից որևէ մեկի վնասման կամ գլխուղեղային արյան շրջանառության խանգարման դեպքում, ինչի հետևանքով գլխուղեղի հատվածներից որևէ մեկը չի ստանում անհրաժեշտ արյունը:

«Լուռ» կաթվածի դեպքում արյան շրջանառությունը խանգարվում է գլխուղեղի այն հատվածներում, որոնք պատասխանատու չեն կենսական գործառույթների համար (շարժումներ, խոսք): Նման դեպքերում ախտանշանները բացակայում են կամ լինում են չափազանց աննշան, ուստի մարդիկ հաճախ անտեսում են դրանք:

Սակայն անգամ կլինիկական դրսևորումների բացակայության դեպքում «լուռ» կաթվածը կարող է լուրջ վնասվածքներ առաջացնել, որոնք հետագայում կհանգեցնեն հիշողության վատացման և անգամ դեմենցիայի: Բացի այդ, այդ դեպքում զգալիորեն բարձրանում է իշեմիկ կաթվածի կամ հեմոռագիկ կաթվածի առաջացման հավանականությունը:

Ուսումնասիրությունները ցույց են տվել, որ միայն ԱՄՆ-ում տարեկան գլխուղեղի կաթվածի մոտ 12 միլիոն դեպք է գրանցվում, որոնցից 11 միլիոնն ախտանշաններ չեն ունենում և հաճախ աննկատ են լինում: Կաթվածի այս տեսակը կարող է երկար ժամանակ աննկատ մնալ և հայտնաբերվել մագնիսա-ռեզոնանսային տոմոգրաֆիայի կամ նմանատիպ որևէ այլ բուժզննման ժամանակ:

Բացի այդ, բժիշկների հետազոտությունները ցույց են տվել, որ երբևէ գլխուղեղի կաթված չունեցած մարդկանց մոտ 10%-ի մոտ կան գլխուղեղի վնասվածքներ, որոնք հատուկ են կաթվածին:

Ինչպես կարելի է կանխարգելել գլխուղեղի կաթվածը

Գլխուղեղի կաթվածը կարող է շատ վտանգավոր լինել, ուստի մարդիկ պետք է իմանան, թե ինչպես կարելի է հնարավորինս նվազեցնել այս խնդիր առաջացման հավանկանությունը: Այսպիսով՝ գլխուղեղի կաթվածից խուսափելու համար հարկավոր է.

·         վերահսկողության տակ պահել զարկերակային ճնշումը,

·         վերահսկողության տակ պահել արյան մեջ խոլեստերինի մակարդակը,

·         վերահսկողության տակ պահել արյան մեջ գլյուկոզայի մակարդակը,

·         հրաժարվել ծխախոտից,

·         լինել ֆիզիկապես ակտիվ,

·         հարստացնել սննդակարգը բանջարեղենով, մրգերով ու ամբողջահատիկ սննդամթերքով,

·         խուսափել ճարպերով, շաքարով ու աղով հարուստ մթերքից,

·         ազատվել ավելորդ կիլոգրամներից ավելորդ քաշի դեպքում ու պահպանել մարմնի զանգվածը նորմայի սահմաններում,

·         դիմել բժշկին կաթվածին բնորոշ ախտանշանների ի հայտ գալու դեպքում (գլխապտույտներ, մկանային կոորդինացիայի խանգարում, գիտակցության խանգարում, տեսողական խանգարումներ և այլն):

Նյութի աղբյուրը՝ golbis.com