7 ախտանշան, որոնք վկայում են որդանման ելունի(ապենդիքս) բորբոքման մասին

Որդանման ելունը կույր աղիքի ոչ մեծ հավելված է, որը գտնվում է որովայնի ստորին աջ հատվածում: Որդանման ելունի բորբոքումը պայմանավորված է լինում դրա խցանմամբ կամ նեղացմամբ, ինչի հետևանքով ելունի ներսում բարձրանում է ճնշումը և խանգարվում է արյան շրջանառությունը:

Որդանման ելունի բորբոքման դեպքում բուժօգնությունը պետք է ժամանակին ցուցաբերել, այլապես հիվանդությունը կարող է հանգեցնել անգամ հիվանդի մահվան, ինչը տեղի է ունենում, երբ որդանման ելունի պատերը պատռվում են և դրա թարախային պարունակությունը հայտնվում է որովայնի խոռոչում: Սա է պատճառը, որ որդանման ելունի բորբոքման դեպքում սովորաբար կատարվում է վիրահատությունը, որի ժամանակ բժիշկները հեռացնում են ախտահարված հավելվածը:

Որդանման ելունն առավել հաճախ բորբոքվում է 10-30 տարեկան անձանց մոտ, սակայն այս խնդիրը կարող է ի հայտ գալ ցանկացած տարիքում: Հիվանդության հիմնական ախտանշանը որովայնի ցավերն են, սակայն կան նաև մի շարք այլ ախտանշաններ, որոնք վկայում են որդանման ելունի բորբոքման մասին: Այդ ախտանշանները կօգնեն ժամանակին հայտնաբերել հիվանդությունն ու կանխել դրա հետագա բարդացումը, ուստի դրանք տարբերելն անչափ կարևոր է յուրաքանչյուրի համար:

Ձեր ուշադրությանն ենք ներկայացնում 7 ախտանշան, որոնք վկայում են որդանման ելունի բորբոքման մասին:

1.      Սուր ցավեր

Որդանման ելունի բորբոքումը սովորաբար դրսևորվում է որովայնի ստորին աջ հատվածի ցավով, որի ինտենսիվությունը կարող է տարբեր լինել: Սկզբնական շրջանում ցավոտ զգացողությունները նկատվում են պորտի, իսկ երբեմն էլ մեջքի ստորին հատվածում: Որպես կանոն ցավն ուժեղանում է քայլելու կամ որովանի մկանները լարելու դեպքում:

2.      Հիպերթերմիա

Այս հիվանդության ախտանշանները կարող են նման լինել ստամոքսի վիրուսային վարակի ախտանշաններին: Սովորաբար ցավից բացի նկատվում է նաև տենդ: Հարկ է հիշել, որ որովայնային ցավի ֆոնին մարմնի ջերմաստիճանի բարձրացման դեպքում հարկավոր է անմիջապես շտապ օգնություն կանչել: Սա կօգնի խուսափել այնպիսի բարդությունից, ինչպիսին է պերիտոնիտը: Սակայն անհրաժեշտ է հաշվի առնել, որ նման դեպքերում սովորաբար մարմնի ջերմաստիճանը 37.5-38°C-ից ավել չի բարձրանում:

3.      Գլխապտույտ ու սրտխառնոց

Գլխապտույտն ու սրտխառնոցը որդանման ելունի բորբոքման ամենատարածված ախտանշաններից են (90%), որոնք ի հայտ են գալիս, երբ նկատվում են որովայնի ստորին հատվածի ցավերը: Սակայն խնդիրն այն է, որ այս ախտանշանները բնորոշ են նաև առողջական մի շարք այլ խնդիրներին, ինչի հետևանքով շատերը չեն տարբերում հիվանդությունը: Այս իսկ պատճառով՝ եթե ախտանշանները չեն անհետանում, հարկավոր է դիմել մասնագետին՝ հստակ ախտորոշման համար:

4.      Փորկապություն կամ փորլուծություն

Որդանման ելունի բորբոքման դեպքում կարող է նկատվել նաև փորկապություն կամ փորլուծություն: Այս ախտանշանները ոչ միշտ են վկայում նման խնդրի մասին, սակայն բարդություններից խուսափելու համար խորհուրդ է տրվում դիմել մասնագետին: Բուժզննումը հատկապես կարևոր է լինում, եթե փորկապությունը կամ փորլուծությունն ուղեկցվում են որդանման ելունի բորբոքմանը հատուկ այլ ախտանշաններով:

5.      Գազերի կուտակում ու բորբոքում

Գազերի կուտակումն ու բորբոքումը կարող են պայմանավորված լինել սխալ սննդակարգով, սակայն երբ դրանք ի հայտ են գալիս առանց որևէ պատճառի, ապա հարկավոր է բուժզննում անցնել, քանի որ մշտական բորբոքումը, փորափքանքն ու որովայնի ցավերը կարող են վկայել որդանման ելունի բորբոքման մասին:

6.      Ախորժակի կտրուկ կորուստ

Առհասարակ այս ախտանշանը կարող է պայմանավորված լինել բազմաթիվ վտանգավոր հիվանդություններով՝ այդ թվում նաև որդաման ելունի բորբոքումով ու ուղիղ աղիքի քաղցկեղով: Սա է պատճառը, որ այն ոչ մի դեպքում չի կարելի անտեսել:

7.      Շյոտկին-Բլյումբերգի ախտանիշ

Շյոտկին-Բլյումբերգի ախտանիշը բնորոշվում է որովայնի հատվածում շոշափման (պալպացիա) ժամանակ ձեռքն արագ հեռացնելիս ցավի կտրուկ ուժեղացմամբ: Նման սեղմումները չի կարելի կրկնել մի քանի անգամ, քանի որ որդանման ելունի բորբոքման դեպքում դա կարող է հանգեցնել լուրջ բարդությունների:

Հարկ է հիշել, որ եթե որովայնի աջ հատվածին սեղմելու դեպքում ցավն ուժեղանում է, ապա հարկավոր է շտապ դիմել բժշկին:

Նյութի աղբյուրը՝ steptohealth.ru