Վահանագեղձի դիսֆունկցիայի մասին վկայող 8 ախտանշան և 8 միջոց գեղձի աշխատանքի կարգավորման համար

Վահանաձև գեղձը շատ կարևոր օրգան է, որը կապված է օրգանիզմում տեղի ունեցող բազմաթիվ ֆունկցիաների հետ: Պարանոցի առջևի հատվածում գտնվող այս գեղձը պատասխանատու է հորմոնների արտադրության համար, որոնք օգնում են կարգավորել նյութափոխանակության գործընթացները, ուստի վահանագեղձի աշխատանքի խանգարումը խիստ բացասաբար է ազդում ամբողջ օրգանիզմի և մարդու ինքնազգացողության վրա:

Երբեմն վահանաձև գեղձի աշխատանքի խանգարումներն ախտորոշելը բավականին դժվար է լինում, քանի որ հաճախ մարդիկ չեն նկատում այդ խանգարումների ախտանշանները: Ձեր ուշադրությանն ենք ներկայացնում 8 ախտանշան, որոնք վկայում են վահանաձև գեղձի դիսֆունկցիայի մասին:

1.      Դող կամ անհանգստություն

Եթե վահանաձև գեղձը չափազանց շատ հորմոն է արտադրում (հիպերթիրեոզ), ապա հիվանդի մոտ կարող է նկատվել գերհոգնածություն, դյուրագրգիռություն ու անհանգստություն, քանի որ նման դեպքերում նյութափոխանակության գործընթացները չափազանց արագ են լինում: Բացի այդ, կարող են ի հայտ գալ խնդիրներ՝ կապված ուշադրության կենտրոնացման հետ:

2.      Հոգնածության զգացում

Եթե վահանաձև գեղձի աշխատանքի խանգարման դեպքում նորմայից քիչ հորմոն է արտադրվում (հիպոթիրեոզ), ապա մարդը կարող է տառապել մշտական գերհոգնածությունից և անգամ հյուծվածությունից:

3.      Քաշի փոփոխություն

Հիպոթիրեոզի դեպքում հիվանդի քաշը կարող է ավելանալ, մինչդեռ հիպերթիրեոզը բնորոշվում է քաշի նվազմամբ:

4.      Արտասովոր ցավեր

Վահանաձև գեղձի հետ կապված խնդիրների մասին են վկայում նաև մկանային ցավերը, հոդացավերը կամ անբացատրելի թուլությունը:

5.      Դաշտանային ցիկլի խանգարումներ

Հիպոթիրեոզի դեպքում դաշտանը կարող է ավելի տհաճ լինել ու շատ ավելի երկար տևել, իսկ հիպերթիրեոզը հաճախ ուղեկցվում է շատ կարճատև, իսկ երբեմն էլ աննշան դաշտանով:

6.      Փքվածություն ու փորափքանք

Հիպոթիրեոզը հաճախ հանգեցնում է փորափքանքի և փորկապության առաջացման: Բացի այդ, կարող է նկատվել նաև փքվածություն՝ հատկապես դեմքի հատվածում, ինչը շատ տարօրինակ տեսք է ունենում:

7.      Օրգանիզմի արտասովոր արձագանք ջերմաստիճանին

Վահանաձև գեղձի դիսֆունկցիայի դեպքում հաճախ մարդկանց օրգանիզմի արձագանքը ջերմաստիճանին բավական արտասովոր է լինում: Օրինակ՝ հիպոթիրեոզի դեպքում հիվանդներն ավելի զգայուն են դառնում ցրտի նկատմամբ, իսկ հիպերթիրեոզի դեպքում՝ շոգի:

8.      Արտաքինի փոփոխություններ

Մազաթափությունն ու մազերի բարակումը նույնպես կարող է պայմանավորված լինել հիպոթիրեոզով: Բացի այդ, վահանաձև գեղձի հիվանդությունների դեպքում հիվանդի մաշկը հաճախ գունատվում է կամ ձեռք է բերում դեղնավուն երանգ:

8 միջոց վահանաձև գեղձի աշխատանքը կարգավորելու համար

1.      Խուսափել սթրեսային իրավիճակներից

Վահանաձև գեղձի գործառույթները կախված են մակերիկամներից, իսկ սթրեսը կարող է վնասել մակերիկամները՝ հանգեցնելով նաև վահանագեղձի աշխատանքի խանգարման:

2.      Ավելի շատ յոդ օգտագործել

Յոդը շատ կարևոր է վահանաձև գեղձի առողջության պահպանման համար, ուստի հարկավոր է հարստացնել սննդակարգը յոդ պարունակող սննդամթերքով, օգտագործել ջրիմուռներ կամ ընդունել յոդը հավելումների տեսքով:

3.      Ազատվել արծաթյա ատամնալիցքերից

Ամալգամայով արծաթյան ատամնալիցքերը հաճախ պարունակում են սնդիկ, որը բացասաբար է ազդում վահանաձև գեղձի վրա, ուստի խորհուրդ է տրվում փոխարինել դրանք այնպիսի ատամնալիցքով, որը չի պարունակի սնդիկ:

4.      Հրաժարվել գլյուտենից

Վահանաձև գեղձի առողջության բարելավման համար խորհուրդ է տրվում նվազեցնել օգտագործվող լոբազգիների և գլյուտեն պարունակող սննդամթերքի գործածությունը:

5.      Բարձրացնել օրգանիզմում սելենի մակարդակը

Սելենը վահանաձև գեղձի աշխատանքի կարգավորմանը նպաստող հանքանյութերից մեկն է, ուստի հարկավոր է օգտագործել սելենով հարուստ մթերք: Նման սննդամթերքի շարքին են դասվում բրազիլական ընկույզը, սնկերը, սաղմոնը, տավարի միսը և արևածաղկի սերմերը:

6.      Խուսափել բիսֆենոլ A-ից

Բիսֆենոլ A-ն (BPA) քիմիական տարր է, որը պարունակում է պլաստիկից պատրաստված շշերում ու սննդի համար նախատեսված տարրաներում: Ուսումնասիրությունները ցույց են տվել, որ այն խանգարում է հորմոնալ ֆոնն ու ներզատական համակարգի աշխատանքը, ուստի կարող է վնասել վահանագեղձը: Խորհուրդ է տրվում նման տարրաների փոխարեն օգտագործել ապակյա կամ մետաղյա տարրաներ:

7.      Ածխաջրերի նվազեցում

Ածխաջրերի շատ տեսակներ լի են լինում շաքարներով, որոնք բարձրացնում են էստրոգենի մակարդակը, իսկ այս հորմոնի բարձր մակարդակը կարող է խիստ վնասակար լինել վահանաձև գեղձի համար:

8.      Խուսափել բրոմից ու ֆտորից

Այս քիմիական տարրերը թույլ չեն տալիս, որ օրգանիզմը կլանի յոդը, որը շատ կարևոր է վահանաձև գեղձի աշխատանքի պահպանման համար: Բրոմը հաճախ պարունակվում է բուսայուղերում ու մակարոնեղենում, իսկ ֆտորը՝ ատամի մածուկում, ուստի խորհուրդ է տրվում հնարավորինս նվազեցնել դրանց գործածությունը:

Նշված ախտանշանների կամ դրանցից մի քանիսի առկայության դեպքում հարկավոր է անպայման խորհրդակցել բժշկի հետ և բուժզննում անցնել: Չնայած, որ հիպոթիրեոզն ու հիպերթիրեոզը կարող են լուրջ խնդիրներ առաջացնել, դրանցից կարելի է հեշտությամբ ազատվել ճիշտ բուժման ու դեղորայքի միջոցով: Հարկ է հիշել, որ վահանաձև գեղձի առողջությունն անչափ կարևոր է, ուստի ոչ մի դեպքում չի կարելի անտեսել դրա աշխատանքի խանգարման մասին վկայող ախտանշանները:

Նյութի աղբյուրը՝ shkarec.ru