Դաշտանադադարի 6 ախտանշան, որոնք կարող են լինել լուրջ հիվանդությունների նշան

Որոշակի տարիքում կանայք սկսում են նկատել քրտնարտադրության առատացում, տրամադրության տատանումներ և դաշտանադադարին հատուկ այլ ախտանշաններ, սակայն դրանք ոչ միշտ են լինում միայն դաշտանադադարի արդյունքում: Նման ախտանշանները կարող են լինել նաև առողջական լուրջ խնդիրների հետևանքով, ուստի հարկավոր է շատ ուշադիր լինել:

1.    Դաշտանային ցիկլի խանգարումներ

Դաշտանային ցիկլի խանգարումները դաշտանադադարի հիմնական նշաններից են: Ընդ որում՝ կարող են խանգարվել ինչպես դաշտանի հաճախականությունն ու տևողությունը, այնպես էլ դրա հետ կապված զգացողությունները:

Սակայն եթե արյունահոսությունը չափազանց առատ է, դաշտանը կրկնվում է 3 շաբաթից շուտ կամ սեքսից հետո արյուն է նկատվում, ապա հարկավոր է անմիջապես խորհրդակցել բժշկի հետ և բուժզննում անցնել, քանի որ այդ ախտանշանները հատուկ են նաև գինեկոլոգիական այնպիսի հիվանդություններին, ինչպիսին են պոլիպները, միոման (մկանուռուցք) և նույնիսկ արգանդի վզիկի քաղցկեղը:

2.    Շոգի ու ցրտի զգացողությունը և առատ քրտնարտադրությունը գիշերվա ժամերին

Նախադաշտանադադարային տարիքի կանանց 80%-ի մոտ նկատվում են ջերմակարգավորման խանգարումներ, որոնք պայմանավորված են էստրոգենի արտադրության խանգարմամբ, ինչի հետևանքով էլ կնոջ մարմինը չի կարողանում կարգավորել ջերմաստիճանը:

Սակայն այս ախտանշանները նկատվում են նաև հիպերթիրեոզի՝ վահանաձև գեղձի հորմոնների արտադրության խանգարման դեպքում: Օրգանիզմում նման խանգարումների այլ ախտանշաններն են մազաթափությունը, քաշի անբացատրելի կորուստը կամ ավելացումը, դաշտանային ցիկլի խանգարումները:

3.    Մազաթափություն

Էստրոգենի արտադրության նվազման հետևանքով կանանց մոտ ուժեղանում է մազաթափությունը: Հատկապես վտանգված են այն կանայք, որոնք ունեն ճաղատացման գենետիկ հակվածություն:

Ինչպես արդեն նշվել է, սա կարող է լինել վահանաձև գեղձի հիվանդության նշան, ուստի այլ ախտանշանների առկայության դեպքում հարկավոր է անհապաղ բուժզննում անցնել:

4.    Սրտի զարկերի արագացում

Էստրոգենի մակարդակի տատանումներն ազդում են նաև սրտի աշխատանքի վրա: Ժամանակ առ ժամանակ կանայք նկատում են, որ իրենց սրտի զարկերն արագացել են կամ դարձել անկանոն: Որպես կանոն նման ախտանշաններն ուղեկցվում են ջերմակարգավորման խանգարումներով:

Եթե սրտխփոցը չի լինում ջերմաստիճանի տատանումների ժամանակ, ապա հարկավոր է ավելի ուշադիր լինել: Սովորաբար տարիքի հետ սկսում են նաև ի հայտ գալ սրտի զարկերի խանգարումներ, որոնք մեծ մասամբ անվնաս են: Սակայն երբեմն դրանք կարող են առաջանալ առողջական լուրջ խնդիրների հետևանքով և լինում է դեղորայքային կամ նույնիսկ վիրահատական բուժման կարիք:

5.    Խնդիրներ կապված հոդերի հետ

Տարիքի հետ հոդերի աշխատանքը վատանում է, ինչը բնական է ինչպես կանանց, այնպես էլ տղամարդկանց համար: Սակայն ուսումնասիրությունները ցույց են տվել, որ դաշտանադադարի ժամանակ կանանց գրեթե 50%-ի մոտ նույնպես ի հայտ են գալիս հոդացավեր: Վիճակագրական տվյալների համաձայն՝ հորմոնափոխարինման թերապիա անցած կանանց մոտ այս ախտանշանները մեղմանում են:

Եթե հոդերի մշտական ցավն ազդում է կյանքի որակի վրա, ապա հարկավոր է դիմել բժշկի օգնությանը: Վերջինս կնշանակի հատուկ անալիզներ՝ մի շարք հիվանդությունների առկայությունը ստուգելու համար (արթրիտ, ֆիբրոմիալգիա, Լայմի հիվանդություն, գայլախտ և այլն):

6.    Տրամադրության տատանումներ

Տրամադրության կտրուկ տատանումները համարվում են դաշտանադադարի հիմնական ախտանշաններից մեկը: Բժիշկները նշում են, որ դրանք պայմանավորված են լինում հորմոնալ ցիկլի խանգարումներով, քնի խանգարումներով, անքնությամբ, ուժեղ քրտնարտադրությամբ և մի շարք այլ պատճառներով, որոնք միասին առաջացնում են հոգնածության ու դեպրեսիայի զգացողություն:

Սակայն հարկ է հիշել, որ տրամադրության նման տատանումներ կարող են առաջանալ նաև դեպրեսիայի ժամանակ: Հիմնական տարբերությունը նրանում է, որ դեպրեսիայի ժամանակ մարդու մոտ կարող են նկատվել նաև անելանելիության ու անտարբերության զգացողություն, քնկոտություն և սուիցիդալ մտքեր: Նման ախտանշանների դեպքում հարկավոր է անմիջապես դիմել մասնագետի օգնությանը և ստուգել հոգեկան առողջության վիճակը:

Նյութի աղբյուրը՝ jv.ru

Հեղինակը՝ Լյուդմիլա Վասիլչենկո