12 ախտանշան, որոնք կարող են պայմանավորված լինել լյարդի ախտահարմամբ

Լյարդն օրգանիզմի ամենակարևոր օրգաններից է և պատասխանատու է մարմինը տոքսիններից մաքրելու համար: Սա այն օրգանն է, որը պետք է միշտ առողջ լինի, քանի որ դրա հետ կապված ցանկացած խնդիր կարող է անդրադառնալ ամբողջ օրգանիզմի վրա: Սա է պատճառը, որ հետագայում առողջական լուրջ խնդիրներից խուսափելու համար հարկավոր է կարողանալ տարբերել այն ախտանշանները, որոնց միջոցով օրգանիզմը հուշում է լյարդի հետ կապված խնդիրների առկայության մասին:

Գոյություն ունեն տարբեր հիվանդություններ ու առողջական խնդիրներ, որոնք կարող են ազդել լյարդի վրա և դրանցից յուրաքանչյուրն ունենում է իր ախտանշանները, սակայն մարդիկ հաճախ անտեսում են դրանք, ինչը հանգեցնում է լուրջ հետևանքների:

Ձեր ուշադրությանն ենք ներկայացնում լյարդի ախտահարման մասին վկայող 12 ախտանշան, որոնք կօգնեն ազատվել այդ խնդիրներից հնարավորինս շուտ և խուսափել լուրջ բարդություններից:

Ստամոքսի աշխատանքի խանգարում

Սրտխառնոցը կարող է լինել տարբեր հիվանդությունների ախտանշան: Այդ հիվանդությունների շարքին են դասվում սննդային թունավորումը, միգրենը, գլխապտույտը, դեպրեսիան և այլն, սակայն քչերը գիտեն, որ այս ախտանշանը երբեմն վկայում է նաև լյարդի ախտահարման մասին: Նման խնդիր է առաջանում, երբ խանգարվում է լյարդի աշխատանքը և տոքսինները սկսում են կուտակվել օրգանում: Սրտխառնոցը կարող է լինել նաև մարսելախանգարման ախտանշան, սակայն եթե խնդիրը չի անցնում որոշ ժամանակ, ապա հարկավոր է խորհրդակցել բժշկի հետ:

Հոգնածություն ու թուլություն

Թուլության ու հոգնածության զգացողությունը նույնպես կարող է պայմանավորված լինել լյարդի ախտահարմամբ: Այս դեպքում տոքսինները սկսում են կուտակվել արյան մեջ, ուստի եթե հոգնածության զգացումը չի անհետանում անգամ երկարատև հանգստից հետո, ապա հարկավոր է շտապ դիմել մասնագետի օգնությանը:

Ախորժակի կորուստ

Վնասված լյարդն ավելի քիչ լեղի է արտադրում, իսկ լեղին օգնում է օրգանիզմին յուրացնել ճարպերը, ուստի երբ սնունդը պատշաճ կերպով չի մարսվում, նկատվում է ախորժակի կորուստ ու քաշի նվազում: Եթե այս վիճակը պահպանվում է երկար ժամանակ ապա հարկավոր է անպայման խորհրդակցել բժշկի հետ:

Մարսողական խնդիրներ

Լյարդը շատ մեծ նշանակություն ունի մարսողական գործընթացների հարցում, ուստի ախտահարման դեպքում այն չի կարողանում բավարար քանակությամբ լեղի արտադրել և կլանել ու վերամշակել սննդարար նյութերը: Այս ամենի հետևանքով առաջանում են մարսողական այնպիսի խնդիրներ, ինչպիսին են գրգռված աղու համախտանիշը, փորափքանքը, ալկոհոլի հանդեպ անհանդուրժողականությունը, փորկապությունը, փորլուծությունը, մարսելախանգարումն ու լեղապարկում քարերի առաջացումը:

Մեզի գույնի փոփոխություն

Առողջ մարդու մեզը պետք է լինի թափանցիկ և բաց դեղնավուն երանգով, ինչը կնշանակի, որ օրգանիզմը ճիշտ է հիդրատացվում: Սակայն լյարդի հետ կապված խնդիրների դեպքում մեզը ստանում է շագանակագույն կամ նարնջագույն երանգ, ինչը պայմանավորված է լինում արյան մեջ բիլիռուբինի բարձր մակարդակով: Մեզի մուգ գույնը կարող է լինել նաև ջրազրկման կամ վիտամին B-ի չափազանց մեծ քանակության ախտանշան, սակայն ամեն դեպքում բացառված չեն նաև լյարդի հետ կապված խնդիրները, ուստի նման ախտանշանի դեպքում հարկավոր է անպայման բուժզննում անցնել:

Արտաթորանքի գույնի փոփոխություն

Վնասվելու դեպքում լյարդն ավելի քիչ լեղի է արտադրում, ինչի հետևանքով նկատվում են նաև կղանքի փոփոխություններ: Հարկավոր է շատ ուշադիր լինել, քանի որ բաց դեղնավուն կամ մոխրագույն կավանման արտաթորանքը վկայում է լյարդի հետ կապված խնդիրների մասին: Այս դեպքում անհրաժեշտ է շտապ բուժզննում անցնել:

Դեղնախտ

Դեղնախտը հիվանդություն է, որի դեպքում արյան մեջ բարձրանում է բիլիռուբինի մակարդակը, ինչի հետևանքով մաշկը, լեզուն, մատների ծայրերն ու աչքերը ստանում են դեղնավուն երանգ: Այս խնդիրը կարող է վկայել ենթաստամոքսային գեղձի կամ լեղապարկի հիվանդությունների մասին, ուստի նման ախտանշանի դեպքում հարկավոր է անհապաղ դիմել բժշկին:

Որովայնի ցավեր ու ջղաձգումներ

Որովայնի ցավերն ու ջղաձգումները կարող են պայմանավորված լինել ասցիտով (ջրգողություն) կամ լյարդի վնասվածքով: Ջրգողությունը հիվանդություն է, որը բնորոշվում է լյարդի վնասվածքի հետևանքով որովանային խոռոչում հեղուկի կուտակմամբ: Լյարդի հիվանդությունները կարող են նաև նպաստել զարկերակային ճնշման բարձրացմանը՝ հանգեցնելով առողջական էլ ավելի լուրջ խնդիրների առաջացման:

Հեղուկի կուտակում

Վնասված լյարդը հաճախ նպաստում է վերջույթներում հեղուկի կուտակմանը: Այս վիճակը նման է ջրգողությանը (ասցիտ), սակայն այն կարող է պայմանավորված լինել նաև հորմոնալ դիսբալանսով, երիկամների հետ կապված խնդիրներով, սրտային անբավարարությամբ կամ ավշային համակարգի հիվանդություններով, ուստի հստակ ախտորոշման համար հարկավոր է անպայման բուժզննում անցնել:

Մաշկային խնդիրներ

Լյարդի հիվանդությունների կամ վնասվածքների դեպքում մաշկն ավելի զգայուն է դառնում: Այս դեպքում շատ հաճախ են առաջանում կապտուկներ, իսկ երակներն ավելի արտահայտված են դառնում: Նման դեպքերում հարկավոր է անպայման բուժել լյարդը, քանի որ միայն մաշկային խնդիրներից ազատվելը արդյունավետ չի լինի:

Կրծքավանդակի ցավեր

Լյարդը կրծքավանդակին մոտ է գտնվում, ուստի այս օրգանի վնասման դեպքում կարող են նկատվել ցավոտ զգացողություններ նաև կրծքավանդակի հատվածում:

Փորլուծություն, փորկապություն, աղիքային արյունահոսություն

Լյարդը կենսական նշանակություն ունի ճիշտ մակարդման համար, ուստի երբ այս օրգանի աշխատանքը խանգարվում է, կարող է առաջանալ աղիքային արյունահոսություն, փորլուծություն կամ փորկապություն:

Հարկ է հիշել, որ լյարդը շատ կարևոր օրգան է, որի առողջությունից կախված է ամբողջ օրգանիզմի առողջական վիճակը, ուստի նշված ախտանշաններից անգամ մեկի առկայության դեպքում խորհուրդ է տրվում անպայման դիմել մասնագետին ու բուժզննում անցնել, քանի որ հիվանդությունը կանխարգելելն ու վաղ փուլերում բուժելը շատ ավելի հեշտ է, քան դրա հետևանքով առաջացած բարդություններից ազատվելը:

Նյութի աղբյուրը՝ newdailyrecipes.com