Որոնք են կանանց մոտ ի հայտ եկող սեռական խանգարումները, դրանց առաջացման պատճառներն ու բուժման եղանակները

Ուսումնասիրությունները ցույց են տվել, որ սեռական դիսֆունկցիան շատ տարածված խնդիր է, մինչդեռ մարդիկ, այնուամենայնիվ, խուսափում են այս հարցի քննարկումներից: Սակայն մասնագետները նշում են, որ նման խանգարումները մեծ մասամբ կարելի է հեշտությամբ բուժել, ուստի խնդիրների առկայության դեպքում մասնագետի հետ խորհրդակցելը շատ կարևոր է:

Որոնք են կանանց մոտ սեռական խնդիրների առաջացման պատճառները

Սեռական դիսֆունկցիան կարող է պայմանավորված լինել ինչպես ֆիզիկական, այնպես էլ հոգեբանական խնդիրներով:

·         Ֆիզիկական պատճառներ. դեռական դիսֆունկցիաի առաջացման պատճառ կարող են դառնալ բազմաթիվ ֆիզիկական կամ բժշկական խնդիրները, որոնց շարքին են դասվում շաքարային դիաբետը, սրտի հիվանդությունները, նյարդաբանական խնդիրները, հորմոնալ դիսբալանսը, դաշտանադադարը, քրոնիկական հիվանդությունները (երիկամների կամ լյարդի քրոնիկական հիվանդություններ), ինչպես նաև ալկոհոլային ու թմրանյութային կախվածությունը: Բացի այդ, նման կողմնակի բարդություններ կարող են առաջանալ նաև որոշ դեղամիջոցների ընդունման դեպքում:

·         Հոգեբանական պատճառներ. նման խնդիրների առաջացմանը կարող են նպաստել նաև սթրեսը, անհանգստությունը, դեպրեսիաները, մեղքի զգացումը, նախկինում տեղի ունեցած տրավմատիկ իրադարձություններն ու սեռական հարաբերություններ ունենալու անհաջող փորձը, ինչպես նաև անձնական կյանքում, ընտանիքում կամ աշխատավայրում առաջացած խնդիրները:

Սեռական խանգարումները կարող են առաջանալ ցանկացած տարիքում ինչպես կանանց, այնպես էլ տղամարդկանց մոտ: Առավել հաճախ սեռական դիսֆունկցիան ի հայտ է գալիս տարեց մարդկանց մոտ, ինչը պայմանավորված է ծերացման հետ մեկտեղ առողջական ընդհանուր վիճակի վատացմամբ:

Ինչպես են սեռական խնդիրներն ազդում կանանց վրա

Կանանց շրջանում սեռական դիսֆունկցիային վերաբերող ամենատարածված խնդիրներն են.

·         Սեռական ցանկության նվազումը. սա կարող է պայմանավորված լինել բազմաթիվ պատճառներով, որոնց շարքին են դասվում հորմոնալ փոփոխությունները, հիվանդություններն ու դրանց բուժումը (օրինակ՝քաղցկեղն ու քիմիաթերապիան), դեպրեսիաները, հղիությունը, սթրեսը, հոգնածությունը և այլն:

·         Սեռական գրգռման խանգարումը. նման խնդիրը շատ հաճախ պայմանավորված է լինում հեշտոցային քսուքի ոչ բավարար քանակությամբ, անհանգստությամբ, ոչ ճիշտ խթանմամբ կամ որոշ ֆիզիկական առանձնահատկություններով:

·         Օրգազմի բացակայություն (անօրգազմիա). նման խանգարման պատճառ կարող են դառնալ ինչպես հոգեբանական խնդիրները, այնպես էլ փորձի պակասը, որոշ հիվանդություններն ու դեղամիջոցները:

·         Ցավոտ սեռական ակտը. սեռական ակտի ժամանակ առաջացող ցավոտ զգացողությունները կարող են վկայել բազմաթիվ խնդիրների մասին, ինչպիսին են էնդոմետրիոզը, փոքր կոնքում առաջացած ուռուցքանման գոյացությունները, ձվարանների կիստաները, վագինիտը, վագինիզմը, քսուքի պակասը, սպիների առկայությունը կամ սեռավարակները:

Կանանց մոտ սեռական խնդիրների ախտորոշման համար հարկավոր է դիմել բժշկին և անցնել համապատասխան բուժզննումը: Միայն անհրաժեշտ անալիզներից, բուժզննումից ու ախտանշանների վերլուծությունից հետո մասնագետը կարող է նշանակել համապատասխան բուժումը և միայն ճիշտ ախտորոշումից հետո կինը կարող է սկսել բուժումը՝ հետևելով մասնագետի բոլոր ցուցումներին:

Նման դեպքերում հարկավոր է առաջին հերթին ազատվել խնդրի առաջացման պատճառ դարձրած ֆիզիկական ու հոգեբանական գործոններից:

Մասնագետները նաև նշում են, որ շատ մեծ նշանակություն ունի զույգի տեղեկացվածությունն ու բազմազանությունը սեռական կյանքում: Բացի այդ, հարկավոր է անել ամեն բան, սեռական ակտի ժամանակ առաջացող ցավոտ զգացողություններից խուսափելու համար:

Հարկ է հիշել, որ սեռական դիսֆունկցիայի բուժման հաջողությունը կախված է խնդրի լրջությունից: Եթե նման խանգարումների պատճառ դարձած խնդիրները լուծելի են և ոչ շատ լուրջ, ապա սեռական դիսֆունկցիան նույնպես կարելի է հեշտությամբ բուժել՝ պարզապես այդ պատճառներից ազատվելով:

Ինչպես են հորմոններն ազդում սեռական ֆունկցիայի վրա

Հորմոնները շատ մեծ նշանակություն ունեն կանանց սեռական ֆունկցիայի կարգավորման հարցում, ուստի զարմանալի չէ, որ ծերացման հետ մեկտեղ կանայք հաճախ են բախվում սեռական դիսֆունկցիայի խնդրին, քանի որ նրանց օրգանիզմում նվազում է էստրոգենի մակարդակը: Բացի այդ, օրգանիզմի վրա խիստ բացասաբար է ազդում նաև տեստոստեոն հորմոնի մակարդակի նվազումը, ուստի այս խնդիրը նույնպես չի կարելի անտեսել:

Ինչպես է կանանց սեռական ֆունկցիայի վրա ազդում հիստերէկտոմիան (արգանդի վիրահատական հեռացում)

Արգանդի վիրահատական հեռացումից հետո կանանցից շատերի մոտ են նկատվում սեռական ֆունկցիայի այնպիսի փոփոխություններ, ինչպիսին են սեռական ցանկության բացակայությունը, հեշտոցային քսուքի քանակության քչացումը և զգայունության նվազումը: Նման խնդիրները կարող են պայմանավորված լինել հորմոնալ փոփոխություններով, որոնք ի հայտ են գալիս արգանդի հեռացումից հետո: Բացի այդ, նման վիրահատության ժամանակ կարող են վնասվել նյարդերն ու արյունատար անոթները, ինչը նույնպես շատ մեծ նշանակություն ունի:

Ինչպես է կանանց սեռական ֆունկցիայի վրա ազդում դաշտանադադարը

Դաշտնադադարից հետո կանանց օրգանիզմում նվազում է էստրոգեն հորմոնի մակարդակը, ինչը կարող է դառնալ սեռական խնդիրների առաջացման պատճառ: Բացի այդ, բացասաբար կարող են ազդել նաև դաշտանադադարի ժամանակ նկատվող էմոցիոնալ փոփոխությունները:

Սակայն հարկ է նաև նշել, որ շատերը դաշտանադադարից հետո ավելի մեծ հաճույք են ստանում սեռական կյանքից, ինչը կարող է պայմանավորված լինել հղիանալու վախի բացակայությամբ: Բացի այդ, այդ տարիքի կանայք ավելի քիչ հոգսեր ունենում, ինչն օգնում է հանգստանալ և հաճույք ստանալ սեռական ակտից:

Երբ է հարկավոր դիմել մասնագետին

Շատ կանանց մոտ սեռական ֆունկցիայի հետ կապված խնդիրները ժամանակ առ ժամանակ են ի հայտ գալիս, սակայն եթե դրանք կրում են մշտական բնույթ, ապա կարող են լուրջ խնդիր դառնալ և անգամ բացասաբար ազդել զույգի հարաբերությունների վրա: Նման դեպքերում հարկավոր է անպայման խորհրդակցել բժկի հետ և որոշել խնդրի առաջացման պատճառներն ու բուժման մեթոդները:

Նյութի աղբյուրը՝ eurolab.ua