7 արտասովոր ախտանշան, որոնք կարող են պայմանավորված լինել արգանդի վզիկի քաղցկեղով

20:26 • 30.08.18

Արգանդի վզիկի քաղցկեղը գինեկոլոգիական քաղցկեղի ամենատարածված տեսակներից մեկն է: Սա շատ վտանգավոր հիվանդություն է, ուստի դրա ախտանշանները պետք է իմանա յուրաքանչյուր կին: Բժիշկները ներկայացրել են 7 արտասովոր ախտանշան, որոնք կարող են վկայել արգանդի վզիկի քաղցկեղի մասին:

1. Դաշտանային ցիկլի խանգարում

Դաշտանային ցիկլի խանգարումն առհասարակ պետք է անհանգստացնի ցանկացած դեպքում: Այս ախտնաշանը ոչ միշտ է վկայում արգանդի վզիկի քաղցկեղի մասին և կարող է պայմանավորված լինել միզասեռական համակարգի հետ կապված որևէ այլ խնդրով, սակայն, այնուամենայնիվ, այն ոչ մի դեպքում չի կարելի անտեսել:

2. Արյունահոսություն սեռական ակտից հետո

Սեռական ակտից հետո առանց որևէ պատճառի ի հայտ եկած արյունահոսությունը կարող է վկայել առողջական լուրջ խնդիրների մասին: Նման դեպքերում հարկավոր է անհապաղ դիմել բժշկին և գինեկոլոգիական բուժզննում անցնել

3. Արյունահոսություն դաշտանադադարից հետո

Դաշտանադադարից հետո ոչ մի արյունահոսություն չպետք է լինի: Նման խնդիր ի հայտ գալու դեպքում հարկավոր է շատ ուշադիր լինել և անպայման բուժզննում անցնել, քանի որ այն կարող է վկայել ինչպես արգանդի վզիկի քաղցկեղի, այնպես էլ մի շարք այլ առողջական խնդիրների մասին:

4. Արյունահոսություն ներլվացումից (спринцевание) հետո

Առհասարակ՝ ներլվացման պրոցեդուրան համարվում է վնասակար կանանց առողջության համար, ուստի մասնագետները խորհուրդ են տալիս խուսափել դրանից: Սակայն այդ պրոցեդուրայից հետո նկատվող արյունահոսությունն էլ ավելի վտանգավոր է, ուստի հարկավոր է անպայման դիմել բժշկին:

5. Արյունահոսություն գինեկոլոգիական բուժզննումից հետո

Վարակի կամ սեռական օրգաների ուռուցքների դեպքում գինեկոլոգիական բուժզննումից հետո կարող է նկատվել արյունահոսություն: Նման դեպքերում հարկավոր է անպայման խորհրդակցել բժշկի հետ՝ ներկայացնելով ի հայտ եկած ախտանշանները:

6. Տհաճ զգացողություններ հեշտոցի հատվածում

Հեշտոցի տհաճ հոտը կամ արտասովոր արտադրությունը, որի մեջ նկատվում են արյան հետքեր և որն ի հայտ է գալիս դաշտանների միջև կամ դաշտանադադարից հետո, նույնպես կարող է վկայել քաղցկեղի մասին, ուստի նման ախտանշանները չի կարելի անուշադրության մատնել:

7. Արտասովոր ցավոտ զգացողություններ

Ցավը սեռական ակտի ժամանակ, մեջքի, ոտքերի կամ կոնքի ցավը, հոգնածությունը, քաշի կորուստ, ախորժակի վատացումը կամ ոտքերի այտուցվածությունը նույնպես կարող են պայմանավորված լինել արգանդի վզիկի քաղցկեղով: Կանայք հաճախ են անտեսում այս ախտանշանները, ինչը կարող է շատ վտանգավոր լինել, ուստի հարկավոր է շատ ուշադիր լինել և պարբերաբար բուժզննում անցնել:

Նյութի աղբյուրը՝ medikforum.ru