Արթրիտի մասին վկայող 7 ախտանշան, որոնք ոչ մի դեպքում չի կարելի անուշադրության մատնել

Արթրիտի ամենատարածված ախտանշանը հոդացավերն են, սակայն սա բնավ հիվանդության միակ ախտանշանը չէ: Շատ դեպքերում հիվանդները նկատում են նաև մի շարք այլ ախտանշաններ, որոնք վկայում են ախտաբանության զարգացման մասին դեռ մինչ ցավի ի հայտ գալը:

Գոյություն ունի արթրիտի ավելի քան 10 տեսակ, որոնցից յուրաքանչյուրն ունի իրեն բնորոշ ախտանշանները: Այդ ախտանշաններն իմանալը շատ կարևոր է, քանի որ հիվանդությունը վաղ փուլերում հայտնաբերելու դեպքում բժիշկը կարող է հատուկ հակաբորբոքային դեղորայքի և կենսակերպում փոփոխություններ անելու վերաբերյալ խորհուրդների միջոցով դանդաղեցնի դրա զարգացումը:

Ձեր ուշադրությանն ենք ներկայացնում արթրիտի ամենատարածված ախտանշանները, որոնց առկայության դեպքում հարկավոր է շտապ խորհրդակցել բժշկի հետ:

Հոդերի կարծրություն

Շատերի մոտ արթրիտի ժամանակ նկատվում է հոդերի շարժունության վատացման զգացողություն: Ընդ որում՝ այս տհաճ ախտանշանը մեծ մասամբ անհանգստացնում է հիվանդներին օրվա առաջին կեսին, երբ հոդերը դեռ չեն «տաքացել»:

Այտուցներ

Եթե չկան վնասվածքներ, սակայն հոդերի շուրջը նկատվում են այտուցներ, ապա հարկավոր է խորհրդակցել մասնագետի հետ, քանի որ դա վկայում է արթրիտի զարգացման մասին: Երբեմն այտուցներն ի հայտ են գալիս օրվա վերջում: Այս ախտանշանն ուղեկցվում է նաև հոդի շարժունության որոշակի վատացմամբ:

Հոդերի կրճտոց ու անկայունություն

Հաճախ արթրիտից տառապող հիվանդները նախ նկատում են այս ախտանշանները, այնուհետև միայն ի հայտ են գալիս հոդացավերը:

Հոգնածություն

Ի տարբերություն դեգեներատիվ արթրիտի, որի դեպքում հոդերը «մաշվում» են ու դանդաղ քաքայվում, ռևմատոիդ արթրիտի ժամանակ իմունային համակարգն ինքն է «հարձակվում» հոդերի վրա՝ հանգեցնելով բորբոքումների առաջացման: Ռևմատոիդ արթրիտը նաև կապված է լինում համակարգային բորբոքման հետ, որն էլ կարող է ուղեկցվել հոգնածության զգացողությամբ:

Տենդ կամ ախորժակի կորուստ

Այս ախտանշանները կապված են ռևմատոիդ արթրիտի հետևանքով առաջացող համակարգային բորբոքման հետ, սակայն դրանք պարբերաբար են ի հայտ գալիս, քանի որ այս ախտաբանությունը բնորոշվում է սրման փուլերով:

Մաշկի կարմրություն կամ ցան

Որոշ դեպքերում հիվանդները նկատում են, որ ախտահարված հոդի շուրջը մաշկը գրգռված կամ կարմրած է՝ անգամ ցավի բացակայության դեպքում: Արթրիտի այս տեսակը կոչվում է պսորիատիկ արթրիտ և կարող է ուղեկցվել մաշկի կարմրածությամբ կամ թեփոտվածությամբ:

Շարժումների կաշկանդվածություն

Եթե հոդերի շարժումները նախկինից ավելի կաշկանդված են դառնում, իսկ վարժություններ կատարելը դժվարանում է, ապա հարկավոր է դիմել բժշկին, քանի որ այդ ախտանշանը կարող է կապված լինել արթրիտի հետ՝ հատկապես, եթե ուղեկցվում է ցավով:

Նյութի աղբյուրը՝ apteka.ua