Պատճառներ, որոնցով կարող է պայմանավորված լինել ավելորդ քաշը

Ավելորդ կիլոգրամներից ազատվելու համար մարդիկ բազմաթիվ սննդակարգեր են փորձում և մարզասրահներ հաճախում, սակայն ոչ բոլորն են մտածում այդ ավելորդ քաշի առաջացման պատճառից ազատվելու մասին, ինչի հետևանքով էլ հաճախ այդ գործադրած ջանքերն ապարդյուն են լինում:

Ձեր ուշադրությանն ենք ներկայացնում մի քանի պատճառ, որոնցով կարող է պայմանավորված լինել ավելորդ քաշը:

1.      Գենետիկ նախատրամադրվածություն:

Ուսումնասիրությունները ցույց են տվել, որ գեները շատ մեծ նշանակություն են ունենում մարդու ախորժակի հարցում: Այն մարդիկ, որոնք չունեն լավ ախորժակի գենը, հաճախ չեն հասկանում, թե որքան դժվար կարող է լինել լավ ախորժակ ունեցող մարդկանց համար ավելորդ կիլոգրամներից ազատվելը:

2.      Քնի պակաս

Քնի պահասի հետևանքով մարդու օրգանիզմում նվազում է լեպտին հորմոնի մակարդակը և բարձրանում է գրելինի մակարդակը: Բացի այդ, քնի պակասի հետևանքով մարդիկ ավելի շատ սնունդ են օգտագործում, իսկ օրգանիզմը սկսում է կուտակել այն ճարպաշերտերի տեսքով:

Ուսումնասիրությունները ցույց են տվել, որ օրական 6 ժամ քնող մարդիկ 27%-ով ավելի հաճախ են բախվում ճարպակալման խնդրին, քան նրանք, որոնց քնի տևողությունը 7-9 ժամ է: Այն մարդկանց մոտ, որոնք քնում են օրական 2-4 ժամ, ճարպակալման առաջացման հավանականությունը բարձր է 67%-ով:

3.      Ֆիզիկական ակտիվության պակաս

Գիտնականներն ապացուցել են, ոչ ակտիվ կենսակերպը կարող է զգալիորեն նպաստել ավելորդ քաշի կուտակմանը: Հարկ է հիշել որ վարժություններն ախորժակը կարգավորելու և քաշը վերահսկելու լավագույն միջոցներից մեկն են:

4.      Օգտագործած սննդամթերքը

Մասնագետները խորհուրդ են տալիս նախապատվությունը տալ բնական սննդամթերքին և խուսափել փաթեթավորված ու վերամշակում անցած մթերքից: Հարկավոր է ընտրել այնպիսի օրգանական մթերք, որի անգամ կեղևն օգտակար կլինի (օրինակ՝ վարունգ կամ խնձոր):

5.      Շրջապատող մարդիկ

Մարդիկ հաճախ են համեմատում սեփական քաշն ու կազմվածքը մյուսների քաշի ու կազմվածքի հետ: Ընդ որում՝ ուսումնասիրությունները ցույց են տվել, որ եթե մարդու ընկերները գեր են, ապա մեծ է հավանականությունը, որ նա նույնպես կսկսի տառապել ավելորդ քաշից: Սա վկայում է այն մասին, որ ճարպակալումն ունի առաջացման ինչպես ֆիզիոլոգիական, այնպես էլ հոգեբանական պատճառներ:

6.      Որոշ դեղամիջոցների ընդունում

Կան դեղամիջոցներ, որոնք կարող են նպաստել ավելորդ քաշի կուտակմանը: Դրանց շարքին են դասվում շաքարային դիաբետի, ջղաձգումների, տրամադրության խանգարումների, միգրենի ու զարկերակային բարձր ճնշման բուժման համար նախատեսված դեղամիջոցները, ստերոիդային դեղերը, հակաբեղմնավորիչ դեղահաբերն ու հորմոնային թերապիայի համար նախատեսված դեղորայքը: Նման դեղամիջոցների ընդունման հետևանքով մարդը կարող է մեկ ամսում մինչև 5 կգ ավելորդ քաշ կուտակել:

Նյութի աղբյուրը՝ worldhealthguide.ph