Առողջական ինչ խնդիրներով կարող է պայմանավորված լինել ցավը թևատակերի հատվածքում

Թևատակերը բավական զգայուն հատված են, ինչը պայմանավորված է մեծ քանակությամբ արյունատար անոթների ու նյարդային վերջավորությունների առկայությամբ: Մարմնի այս հատվածում ցավի ու տհաճ զգացողությունների առաջացումը բավական տարածված խնդիր է, որի պատճառները կարող են տարբեր լինել, ուստի հարկավոր է շատ ավելի ուշադիր լինել՝ խնդիրը ժամանակին հայտնաբերելու և բարդություններից խուսափելու համար:

Ձեր ուշադրությանն ենք ներկայացնում ամենատարածված խնդիրները, որոնցով կարող է պայմանավորված լինել թևատակերի հատվածի ցավը:

1.      Ավշային հանգույցների մեծացում

Ավշային հանգույցներն իմունային համակարգի օրգաններ են, որոնք օգնում են պայքարել տարբեր վարակների դեմ: Այս հանգույցների մեծացումը պայմանավորված է լինում օրգանիզմում վարակների առկայությանն ի պատասխան իմունային համակարգի պատասխանով: Բորբոքման հիմնական ախտանշաններն են լինում այտուցվածությունը, ցավը, կարմրածությունը և տեղային ջերմաստիճանի բարձրացումը:

2.      Ստամոքսի այրոց (изжога)

Ստամոքսի այրոցը երբեմն նույնպես կարող է դրսևորվել ձախ թևատակի հատվածի ցավով: Սա այրոցի զգացողությունն է, որն ի հայտ է գալիս, երբ ստամոքսի պարունակությունը հայտնվում է կերակրափողում (գաստրոէզոֆագեալ ռեֆլյուքս): Հաճախ այս ախտանշանն ի հայտ է գալիս սննդի ընդունումից հետո, ինչպես նաև հորիզոնական դիրք ընդունելու դեպքում:

3.      Մկանային մանրաթելերի ձգվածություն կամ վնասվածք

Ցավի պատճառ կարող է դառնալ նաև ծանրությունը կամ ինտենսիվ մարզումները: Այս դեպքում ցավը պայմանավորված է լինում մկանների ձգվածությամբ կամ վնասվածքներով, ուստի այս ախտանշանի դեպքում հարկավոր է խուսափել ֆիզիկական ծանրաբեռնվածությունից ու անմիջապես դիմել բժշկին:

4.      Մազահեռացում

Սխալ անցկացված մազահեռացման պրոցեդուրան կամ բութ ածելիի գործածությունը կարող է դառնալ բշտիկաբորբի (фолликулит, մազարմատի բորբոքում) առաջացման պատճառ, որն էլ ուղեկցվում է թևատակերի հատվածում շատ տհաճ զգացողությունների առաջացմամբ: Բացի այդ, սխալ մազահեռացման դեպքում բարձրանում է մազերի ներաճման հավանականությունը, ինչը նույնպես կարող է դառնալ ցավոտ զգացողությունների պատճառ:

5.      Ծայրամասային զարկերակների հիվանդություն

Թևատակերի հատվածի ցավով կարող է դրսևորվել նաև ծայրամասային անոթների հիվանդությունը, որի դեպքում տեղի է ունենում անոթների օկլյուզիա և խցանում: Երբեմն անոթի լուսանցքի նեղացումը պայմանավորված է լինում աթերոսկլերոտիկ վահանիկների ձևավորմամբ: Այս հիվանդության զարգացման հավանականությունը մեծանում է ճարպակալման, շաքարային դիաբետի և զարկերակային գերճնշման դեպքում:

6.      Կրծքագեղձի քաղցկեղ

Որոշ դեպքերում թևատակերի հատվածի ցավը վկայում է կրծքագեղձի քաղցկեղի մասին: Բացի այդ, այս հիվանդությունը կարող է դրսևորվել նաև կրծքի հյուսվածքներում շոշափվող նորագոյացություններով, պտուկի ձևի փոփոխությամբ, մաշկի գույնի փոփոխությամբ, մաշկի խոցոտմամբ և այլ ախտանշաններով:

7.      Շփումային մաշկաբորբ (контактный дерматит)

Շփումային դերմատիտն ալերգիկ հիվանդություն է, որը բնորոշվում է մաշկի կարմրածությամբ, ցանով ու ցավով: Նման ռեակցիա կարող է ի հայտ գալ հոտազերծիչ միջոցների և մարմնի խնամքի որոշ միջոցների օգտագործման դեպքում:

Այսպիսով՝ հարկ է հիշել, որ թևատակերի հատվածի ցավը կարող է պայմանավորված լինել մի շարք գործոններով, ուստի անմիջապես խուճապի մատնվել պետք չէ: Սակայն այս խնդիրը ոչ մի դեպքում չի կարելի նաև անուշադրության մատնել, քանի որ երբեմն այն վկայում է լուրջ հիվանդությունների մասին, որոնք չբուժելը կարող է խիստ վտանգավոր լինել և դառնալ մի շարք բարդությունների առաջացման պատճառ:

Նյութի աղբյուրը՝ fabiosa.ru