Ախտանշաններ, որոնք կանայք ոչ մի դեպքում չպետք է անտեսեն

Առողջական ցանկացած խնդրի դեպքում օրգանիզմը միշտ նախազգուշացնում է ախտանշանների միջոցով, սակայն կյանքի արագ ռիթմը ոչ միշտ է թույլ տալիս ժամանակին նկատել խնդիրները:

AdMe.ru կայքը ներկայացրել է 8 ախտանշան, որոնք կանայք ոչ մի դեպքում չպետք է անտեսեն, քանի որ դրանք կարող են վկայել առողջական լուրջ խնդիրների մասին:

1.      Քաշի կտրուկ կորուստ

Քաշի նվազման մասին շատերն են երազում, սակայն քաշի կտրուկ կորուստը, որը պայմանավորված չէ սննդակարգում կամ կենսակերպում արված որևէ փոփոխությամբ, կարող է վկայել այնպիսի լուրջ խնդիրների մասին, ինչպիսին են սթրեսը, շաքարային դիաբետը և անգամ քաղցկեղը:  

2.      Քրոնիկ հոգնածություն

Անգամ լիարժեք հանգստի դեպքում տանջող մշտական հոգնածությունը (2 շաբաթից ավել) կարող է պայմանավորված լինել վահանագեղձի հետ կապված խնդիրներով, սրտի հիվանդություններով կամ վիտամին D-ի դեֆիցիտով, ուստի այս ախտանշանը ոչ մի դեպքում չի կարելի անուշադրության մատնել:

3.      Արտասովոր փոփոխություններ կրծքագեղձերում

Նման փոփոխությունները կարող են հուշել լուրջ հիվանդությունների մասին, ուստի խնդիրներից խուսափելու համար մասնագետները խորհուրդ են տալիս կանանց ավելի ուշադիր լինել, պարբերաբար ինքնուրույն հետազոտել կուրծքն ու դիմել մասնագետին ցանկացած փոփոխության դեպքում:

4.      Շնչառության դժվարացում ու գլխապտույտ թեթև ծանրաբեռնվածության դեպքում

Եթե անգամ թեթև ֆիզիկական ծանրաբեռնվածության ժամանակ նկատվում է շնչառության դժվարացում ու գլխապտույտ, ապա հարկավոր է դիմել մասնագետին, քանի որ այս ախտանշանները կարող են պայմանավորված լինել ասթմայով կամ սրտի հիվանդություններով:

5.      Սրտի զարկերի արագացում

Սրտի զարկերի պարբերաբար արագացումը, որը պայմանավորված չէ որևէ արտաքին գործոնով, կարող է վկայել առողջական լուրջ խնդիրների մասին և վտանգավոր հետևանքներ ունենալ անտեսելու դեպքում:

6.      Խալերի առաջացում կամ փոփոխություն

Նոր խալերի առաջացումը կամ հին խալերի գույնի կամ ձևի փոփոխությունը նույնպես լուրջ ախտանշան է, որը ոչ մի դեպքում չի կարելի անտեսել: Սա հատկապես վտանգավոր է այն մարդկանց դեպքում, ովքեր օրվա ընթացքում շատ ժամանակ են անցկացնում արևի ճառագայթների տակ:

7.      Փորափքանք

Եթե փորափքանքը պայմանավորված չէ մեծ քանակությամբ սննդի ընդունմամբ, ապա այն կարող է վկայել ձվարանների հետ կապված խնդիրների մասին: Նման դեպքերում հարկավոր է անհապաղ դիմել բժշկին՝ հատկապես, եթե փորափքանքն ուղեկցվում է հաճախամիզությամբ ու կոնքի հատվածի ցավով:

8.      Տեսողության կտրուկ վատացում

Տեսողության կտրուկ վատացման ու պատկերի «երկակիության» դեպքում հարկավոր է անպայման դիմել բժշկին: Եթե այս ախտանշանն ուղեկցվում է նաև հավասարակշռության կորստով, գլխապտույտներով, դիմախաղի փոփոխություններով, խոսքի հետ կապված խնդիրներով կամ մարնմի մի կողմի թմրածությամբ, ապա հարկավոր է անհապաղ շտապօգնություն կանչել, քանի որ այս ախտանշանները վկայում են գլխուղեղի կաթվածի մասին: