8 սովորություն, որոնք խիստ վնասակար են երիկամների համար

18:28 • 18.09.18

Երիկամներն անչափ կարևոր օրգաններ են, որոնք մաքրում են օրգանիզմն ու դուրս են բերում վնասակար տոքսիններն ու ավելորդ հեղուկը: Սա է պատճառը, որ երիկամների աշխատանքի խանգարումը խիստ բացասաբար է ազդում ամբողջ օրգանիզմի վրա:

Մասնագետները նշում են, որ նման խնդիրներից խուսափելու և երիկամների առողջությունը պահպանելու համար հարկավոր է շատ ուշադիր ու հոգատար լինել և խուսափել այն սովորություններից, որոնք կարող են վնասակար լինել երիկամների համար: Ձեր ուշադրությանն ենք ներկայացնում այդ վնասակար սովորություններից մի քանիսը:

1. Բավարար քանակությամբ ջուր չօգտագործելը

Ջրազրկումը խիստ բացասաբար է ազդում ամբողջ օրգանիզմի վրա և կարող է կործանարար լինել երիկամների համար: Բանն այն է, որ հեղուկի պակասի դեպքում վատանում է արյան շրջանառությունը և տոքսինները սկսում են կուտակվել օրգանիզմում:

2. Միզապարկը ժամանակին չդատարկելը

Լիքը միզապարկը կարող է դառնալ առողջական լուրջ խնդիրների առաջացման պատճառ, ուստի ոչ մի դեպքում չի կարելի զսպել միզելու ցանկությունը:

3. Աղի չարաշահումը

Երիկամները դժվարությամբ են դուրս բերում նատրիումն օրգանիզմից, ուստի հարկավոր է սահմանափակել աղի գործածությունը: Հարկ է հիշել, որ աղի օրական թույլատրելի չափաբաժինը կես թեյի գդալն է, որը գերազանցելու դեպքում կարող են ի հայտ գալ այտուցներ ու զարգանալ միզաքարային հիվանդություն:

4. Կոֆեինի հաճախակի գործածությունը

Սուրճի, թեյի և կոֆեին պարունակող այլ ըմպելիքների չարաշահումը հանգեցնում է զարկերակային ճնշման բարձրացման, ինչը կարող է շատ վնասակար լինել երիկամների համար:

5. Ցավազրկող դեղամիջոցների չարաշահումը

Ցավազրկողները չարաշահելու դեպքում կարող են ի հայտ գալ մի շարք տհաճ կողմնակի բարդություններ, որոնց շարքին են դասվում արյան ջրիկացումն ու ներքին օրգանների հիվանդությունները:

6. Սպիտակուցների չարաշահումը

Սպիտակուցներով հարուստ մթերքն անչափ օգտակար է ու կարևոր, սակայն չարաշահումը կարող է վտանգավոր լինել: Բանն այն է, որ սպիտակուցները ծանրաբեռնում են նյութափոխանակության համակարգը, ինչը բացասաբար է ազդում օրգանիզմի վրա:

7. Հիվանդանալիս անկողնային ռեժիմին չհետևելը

Մարմնի ջերմաստիճանի բարձրացման ու ինքնազգացողության վատացման դեպքում հարկավոր է անպայման հանգստանալ ու բուժվել, քանի որ այդ վիճակում աշխատելու դեպքում ներքին օրգանները գերծանրաբեռնված են լինում, ինչը կարող է հանգեցնել լուրջ բարդությունների առաջացման:

8. Ալկոհոլի չարաշահումը

Ալկոհոլը վնասակար է ոչ միայն երիկամների, այլև ամբողջ օրգանիզմի համար, ուստի հարկավոր է անպայման հետևել ընդունած ալկոհոլային ըմպելիքների չափաբաժնին ու որակին և չչարաշահել:

Նյութի աղբյուրը՝ healthinfo.ua