Փորլուծության առաջացման պատճառներն ու հետևանքները

20:50 • 19.09.18

Դիարեան չձևավորված (ջրիկ կամ շիլայանման) կղանքի արտաթորումն է, հիմնականում ուղեկցվում է դեֆեկցիայի հաճախացմամբ` օրական երեք անգամից ավելի:

Այն հանդիսանում է մարսողական համակարգի հիվանդությունների ամենատարածված դրսևորումը, ոչ միայն հաստ ու բարակ աղիների ախտահարման դեպքում, այլ նաև երբ կա խնդիր ստամոքսում, ենթաստամոքսային գեղձում, լյարդում, լեղուղիներում, լեղապարկում և այլն:

Պատճառները կարող են լինել արտաքին և ներքին ծագման: Արտաքին պատճառներից են մի շարք դեղորայքի կիրառումը` լուծողականներ, մագնեզիում պարունակող անտացիդներ, ֆուրոսեմիդ, կոլխիցին, որոշ թույներ` ծանր մետաղների աղեր, սնկեր, միջատասպան նյութեր (ինսեկտիցիդներ), թույներ, որոնք կարող են գտնվել ձկնամթերքում, ըմպելիքներ` սուրճ, թեյ, կոկա-կոլա, ալկոհոլ, մեծ քանակությամբ բուսական բջջանք (միրգ և բանջարեղեն), մանիտոլ, քսիլիտ պարունակող սննդամթերք:

Ներքին պատճառներից են ենթաստամոքսային գեղձի, լյարդի հիվանդությունները, Էնտերոպաթիաները, աղիների բորբոքային հիվանդությունները, դիսբակտերիոզը, աղիքային ինֆեկցիաները, ՁԻԱՀ-ը և այլն:

Տարբերում են սուր և քրոնիկ փորլուծություն: Սուր փորլուծությունը տևում է 1-2 շաբաթ և հիմնականում ինքնաբերաբար վերանում է: Քրոնիկ փորլուծությունը տևում է 3 շաբաթից ավելի:
Երկարատև փորլուլուծությունը կարող է հանգեցնել բարդությունների՝ ջրազրկում, ջրաղային հավասարակշռության խանգարում, հյուծվածություն:

Ջրազրկումը հատկապես վտանգավոր է և ավելի հաճախ հանդիպում է երեխաների մոտ: Ծանր ջրազրկման դեպքում կարող է զարգանալ երիկամային անբավարարություն, նյարդային խանգարումներ: Ջրազրկման նշաններն են ընդհանուր թուլությունը, գլխապտույտը, անընդհատ ծարավի զգացումը, բերանի չորությունը, սրտի զարկերի և շնչառության հաճախացումը, միզարձակման հաճախականության նվազումը:

Անհապաղ դիմե՛ք բժշկի, եթե`

• կղանքում առկա է արյուն կամ թարախ

• փորլուծությունն ուղեկցվում է որովայնի ուժեղ ցավերով

• փորլուծությունն ուղեկցվում է ջերմության բարձրացմամբ

• նկատվում է քաշի կորուստ

• առկա է գիշերային փորլուծություն

• առկա են ջրազրկման նշաններ

Աղբյուր՝ NCDC, Armenia ֆեյսբուքյան էջ