Ստամոքսի քաղցկեղի մասին վկայող ախտանշաններ, որոնք ոչ մի դեպքում չի կարելի անտեսել

Սատմոքսի քաղցկեղը շատ վտանգավոր հիվանդություն է, որը սովորաբար առաջանում է անառողջ կենսակերպ վարելու հետևանքով: Հատկապես վտանգված են լինում այն մարդիկ, որոնք ծխում են, չարաշահում են ալկոհոլն ու օգտագործում են բարձր կալորիականություն ունեցող դժվարամարս սննդամթերք: Ընդ որում՝ հենց սա է պատճառը, որ այս հիվանդությունն ավելի հաճախ ախտորոշվում է տղամարդկանց մոտ:

Ստամոքսի քաղցկեղը, ինչպես նաև օնկոլոգիական այլ հիվանդությունները, շատ դժվար է ախտորոշել զարգացման վաղ փուլեում, ինչի հետևանքով նորագոյացությունը շարունակում է աճել և դրսևորվում է միայն ավելի ուշ փուլերում, երբ ի հայտ են գալիս բնորոշ ախտանշաններ:

Սակայն մասնագետները նշում են, որ անգամ վաղ փուլերում օրգանիզմը միշտ նախազգուշացնում է որոշակի ախտանշանների միջոցով: Բացի այդ, քաղցկեղը վաղ փուլերում հայտնաբերելը զգալիորեն բարձրացնում է բարեհաջող բուժման հավանականությունը, ուստի հարկավոր է շատ ուշադիր լինել:

Ձեր ուշադրությանն ենք ներկայացնում այն ախտանշանները, որոնք կարող են պայմանավորված լինել ստամոքսի քաղցկեղով:

·        Օնկոլոգիական հիվանդությունների մասին վկայող ընդհանուր ախտանշաններն են հոգնածությունը, ուժերի պակասն ու անբացատրելի քաշի կորուստը:

·        Բացի այդ, ստամոքսի քաղցկեղի դեպքում սննդի ընդունումից հետո կարող է նկատվել ցավ որովայնի վերին (էպիգաստրալ) հատվածում: Նման ցավը բնորոշ է նաև խոցային հիվանդությանը, սակայն եթե այն չափազանց երկարատև է, անհանգստացնում է անգամ գիշերվա ժամերին և կապ չունի սննդի ընդունման հետ, ապա, ամենայն հավանականությամբ, պայմանավորված է ստամոքսի քաղցկեղով:

·        Ստամոքսի քաղցկեղը նաև հաճախ դրսևորվում է սրտխառնոցի ու փսխումի նոպաներով, որոնք կապ չունեն սննդային թունավորման հետ: Ընդ որում՝ այս դեպքում փսխելիս կարող են նկատվել նաև արյան հետքեր:

·        Ստամոքսի քաղցկեղի մասին կարող է վկայել նաև առատ թքարտադրությունը:

·        Եթե ուռուցքը գտնվում է ստամոքսի վերին հատվածում, ապա հիվանդի մոտ կարող է նկատվել նաև այրոց ու կլման խանգարումներ:

·        Բացի այդ, քաղցկեղի մասին վկայող տարածված ախտանշանների շարքին է դասվում նաև ախորժակի վատացումը, ուստի հարկավոր է շատ ուշադիր լինել:

Նշված ախտանշաններից մեկի կամ մի քանիսի ի հայտ գալու դեպքում հարկավոր է առաջին հերթին բուժզննում անցնել և խուճապի չմատնվել: Հարկ է հիշել, որ այդ ախտանշանները կարող են պայմանավորված լինել նաև որևէ այլ հիվանդությամբ, ուստի խնդիրը հստակ ախտորոշել կարող է միայն փորձառու մասնագետը:

Նյութի աղբյուրը՝ med2.ru