Ինչով են պայմանավորված դաշտանային ցավերը և ինչպես կարելի է մեղմել տհաճ զգացողությունները

Կանանց մեծ մասը դաշտանի ժամանակ բախվում է այնպիսի տհաճ ախտանշանների, ինչպիսին են սրտխառնոցը, թուլությունը, գլխապտույտը, մղկտուն ցավը և այլն: Շատերն այս ախտանշանները բնական են համարում, մինչդեռ բժշկության մեջ կա հատուկ տերմին՝ ալգոմենորեան, որը բնորոշում է ցավոտ դաշտանը: Հարկ է հիշել, որ դաշտանային ցավերը կարող են պայմանավորված լինել ոչ միայն կնոջ ֆիզիոլոգիական առանձնահատկություններով, այլև լուրջ հիվանդություններով:

Ալգոմենորեան բավական տարածված խնդիր է, որը ախտորոշվում է 14-45 տարեկան կանանց 60-70 %-ի մոտ: Այն հատկապես ծանր կարող է լինել դեռահասության շրջանում: Ուժեղ ցավերը սովորաբար անհանգստացնում են դաշտանի առաջին և երկրորդ օրերին, այնուհետև անհետանում են երրորդ օրը: Այդ ընթացքում շատ կանայք լինում են հոգեպես ու ֆիզիկապես վատ վիճակում, ինչի հետևանքով զգում են ճնշվածություն:

Ալգոմենորեայի հիմնական ախտանշանները

Ալգոմենորեան հիմնականում արտահայտվում է որովայնի ստորին հատվածի, ինչպես նաև գոտկատեղի և սրբանոսկրի հատվածի ծակող, մղկտուն, կծկումանման ցավերով: Հարկ է հիշել, որ ցավոտ դաշտանը հիվանդություն է և, ինչպես ցանկացած այլ հիվանդություն, այն պետք է ժամանակին բուժվի:

Ալգոմենորեայի տեսակները

Գոյություն ունի ալգոմենորեայի երկու տեսակ՝ առաջնային և երկրորդային: Առաջնային ալգոմենորեան պայմանավորված է սեռական օրգանների կառուցվածքով ու նյարդային համակարգի հիվանդություններով, իսկ երկրորդային ալգոմենորեան՝միզասեռական համակարգի բորբոքային գործընթացներով, ինչպիսին են ուռուցքը, կիստան և այլն:

Ցավոտ դաշտանի պատճառը պարզելու համար հարկավոր է այցելել բժիշկ-գինեկոլոգին և անցնել անհրաժեշտ հետազոտությունները.

·        հանձնել բակտերիոլոգիական ցանքս,

·        ստուգել հորմոնալ ֆոնը,

·        հանձնել «թաքնված» վարակների անալիզ,

·        հանձնել հեշտոցի քսուքի անալիզ,

·        հանձնել արյան կենսաքիմիական անալիզ:

Ալգոմենորեայի բուժումը

Ալգոմենորեայի բուժումը հարկավոր է սկսել միայն հստակ ախտոոշումից հետո: Եթե ցավերը պայմանավորված են բորբոքային գործընթացներով, ապա առաջին հերթին հարկավոր է ազատվել հենց դրանցից:

Եթե ընդհանուր ստուգման արդյունքում առողջական ոչ մի լուրջ խնդիր չի հայտնաբերվել, ապա ալգոմենորեայից կարելի է ազատվել ճիշտ սննդակարգի, առողջ ապրելակերպի ու վիտամինների միջոցով: Հարկ է հիշել, որ դաշտանի ընթացքում ցավի ուժգնացմանը կարող են նպաստել ծխախոտի, ալկոհոլի և սուրճի չարաշահումը, ինչպես նաև քնի խանգարումն ու սթրեսները:

Ցավոտ զգացողություններից ազատվելու համար կարելի է օգտագործել ցավազրկող միջոցներ: Բացի այդ, ուժեղ ցավերի ու սպազմների դեպքում կարող է օգնել պարբերաբար հորմոնալ հակաբեղմնավորիչ դեղամիջոցների ընդունումը:

Ժողովրդական բժշկության բաղադրատոմսեր.

Դաշտանային ցավերի դեպքում տհաճ զգացողություններից ազատվելու համար կարելի է որովայնի ստորին հատվածին տաք կոմպրես դնել:

Բացի այդ, կարելի է նաև ոտքերին ու որովայնի ստորին հատվածին տաք ավազով լցված փոքրիկ պարկեր կամ տաք չոր սրբիչներ դնել:

Նաև գոյություն ունեն դեղաբույսեր, որոնք կօգնեն մեղմել դաշտանային ցավերը: Ձեր ուշադրությանն ենք ներկայացնում երկու արդյունավետ բնական բաղադրատոմս.

·        20 գրամ մատնունի սագի խոտին (лапчатка гусиная) ավելացնել մի բաժակ տաք ջուր և եռացնել թույլ կրակի վրա: Այնուհետև եփուկը քամել և սառեցնել: Ընդունել օրական 4-5 անգամ՝ ուտելուց առաջ կես բաժակ:

·        2 ճ.գ. խնկածաղկին (душица) ավելացնել 2 բաժակ եռման ջուր, կես ժամ թրմել և ընդունել օրական 3 անգամ ուտելուց 30 րոպե առաջ:

Նյութի աղբյուրը՝ skalpil.ru