Որոնք են խոլեցիստիտի առաջացման հիմնական պատճառները, հիվանդության ախտանշաններն ու բուժման ամենաարդյունավետ բնական միջոցները

Խոլեցիստիտը լեղապարկի բորբոքումն է, որը համարվում է լեղաքարային հիվանդության ամենատարածված բարդություններից մեկը: Հիվանդության զարգացման հիմնական պատճառը լեղապարկում քարերի առաջացումն է, ինչը խանգարում է լեղու հոսքը և նպաստում է օրգանի ախտահարմանը: Սակայն հարկավոր է հաշվի առնել, որ խոլեցիստիտի առաջացման պատճառները կարող են լինել ոչ միայն քարերը, այլև չափից շատ սննդի ընդունումն ու ալկոհոլի գործածությունը:

Այս հիվանդության դեպքում հաճախ առաջանում են կտրուկ ուժգին ցավեր ու փսխում, ինչպես նաև բարձրանում է հիվանդի մարմնի ջերմաստիճանը: Նման դեպքերում չի կարելի հիվանդի որովայնին ջերմակ դնել կամ փորձել մաքրել նրա ստամոքսը: Փոխարենը հարկավոր է անմիջապես «շտապօգնություն» զանգահարել:

Լեղապարկում ժամանակ առ ժամանակ ի հայտ եկող բորբոքային գործընթացները հանգեցնում են օրգանի պատերի փոփոխությունների առաջացման, ինչի հետևանքով զարգանում է քրոնիկական խոլեցիստիտ: Քրոնիկական խոլեցիստիտի դեպքում կարող է առաջանալ բութ, մղկտուն ցավ, որն ի հայտ է գալիս սննդի ընդունումից կամ ֆիզիկական ծանրաբեռնվածությունից 1-3 ժամ անց: Բացի այդ, ցավը կարող է տարածվել նաև պարանոցի, ծոծրակի, աջ ուսի և թիակի հատվածում: Հաճախ նկատվում է նաև բերանում դառը կամ մետաղական համի զգացողություն, սրտխառնոց, գխտոց, փորափքանք, փորլուծություն ու փորկապություն, ինչպես նաև դյուրագրգիռություն ու անքնություն: 

Խոլեցիստիտը լուրջ հիվանդություն է, որը ոչ մի դեպքում չի կարելի անտեսել: Այս հիվանդության բուժման համար հարկավոր է անպայման դիմել բժշկին, սակայն կարելի է կիրառել նաև ժողովրդական բժշկության որոշ միջոցներ, որոնք կօգնեն զգալիորեն արագացնել բուժումը: Ձեր ուշադրությանն ենք ներկայացնում 5 բնական միջոց, որոնք կօգնեն բուժել լեղապարկի բորբոքումը:

1.      Եգիպտացորենի թելիկների թուրմ

Այս թուրմը պատրաստելու համար հարկավոր է 1 ճաշի գդալ թելիկներին ավելացնել 1 բաժակ եռման ջուր, 1 ժամ թրմել, այնուհետև քամել և օգտագործել յուրաքանչյուր 3 ժամը մեկ 1 ճաշի գդալ:

2.      Մեծ եզան լեզվի թուրմ

1 ճաշի գդալ եզան լեզվին ավելացնել 1 բաժակ եռման ջուր, 10 րոպե թրմել և քամել: Ընդունել թուրմն ամեն օր՝ խմելով 1 ժամվա ընթացքում փոքր կումերով:

3.      Հազարատերևուկի խոտի թուրմ

2 ճաշի գդալ հազարատերևուկի խոտը 1 ժամ թրմել 1 բաժակ եռման ջրում, այնուհետև քամել և ընդունել օրական 3 անգամ ուտելուց առաջ 0.25 բաժակ:

4.      Խնկեղեգի (аир) վերնարմատի թուրմ

1 թեյի գդալ մանրացրած վերնարմատին ավելացնել 1 բաժակ եռման ջուր, 20 րոպե թրմել, այնուհետև քամել և խմել օրական 4 անգամ 0.25 բաժակ: 

5.      Ճնճղապաշարի թուրմ

1 ճաշի գդալ ճնճղապաշարին ավելացնել 1 բաժակ գոլ ջուր, այնուհետև 30 րոպե եռացնել տաք գոլորշու միջոցով, թրմել ևս 15 րոպե և քամել: Ընդունել թուրմն օրական 3-4 անգամ մեկական ճաշի գդալ:

Նյութի աղբյուրը՝ healthinfo.ua