Ախտանշաններ, որոնց առկայությունը կարող է լինել սրտամկանի կաթվածի առաջին նախանշանը

Շատերը գիտեն, որ սրտամկանի կաթվածի ամենահաճախ հանդիպող ախտանշանը կրծքավանդակի խորքում նկատվող ցավերն են, սակայն իրականում մարդիկ անտեսում են մյուսն ախտանշանները: Սա է պատճառը, որ սրտամկանի վիճակն էլ ավելի է վատանում, ինչն էլ հանգեցնում է սրտի կաթվածի:

Ձեր ուշադրությանն ենք ներկայացնում արտասովոր ախտանշաններ, որոնց առկայությունը կարող է լինել սրտամկանի կաթվածի առաջին նախանշանը:

1.      Ֆիզիկական վիճակի վատացում

Եթե նախկինում ֆիզիկական աշխատանքը ոչ մի խնդիր չէր առաջացնում, սակայն ներկայում նույնիսկ ամենաչնչին ծանրաբեռնվածության հետևանքով առաջանում են գլխացավեր, հևոց, ցավեր կամ սրտխփոց, ապա եկել է սրտի առողջության մասին մտածելու ժամանակը: Հարկավոր է շատ ավելի ուշադիր լինել և չանտեսել խնդիրը՝ համարելով, որ այն ֆիզիկական վատ վիճակի կամ տարիքի արդյունք է: Անհրաժեշտ է դիմել բժշկին և անցնել անհրաժեշտ հետազոտությունները:

2.      Էրեկտիլ դիսֆունկցիա (իմպոտենցիա)

Համարվում է, որ էրեկտիլ դիսֆունկցիայի պատճառը տարիքն է կամ կանանց հանդեպ հետաքրքրության կորուստը, սակայն մեծ մասամբ դա պայմանավորված է լինում աթերոսկլերոզի հետևանքով արյան շրջանառության խանգարումով: Ուսումնասիրությունները ցույց են տվել, որ որքան լուրջ է խանգարումը, այնքան մեծ է սրտանոթային հիվանդությունների հետևանքով մահանալու հավանականությունը: Բացի այդ, ապացուցված է, որ էրեկտիլ դիսֆունկցիայով տառապող տղամարդկանց շրջանում 2 անգամ ավելի շատ են սրտանոթային հիվանդություններով տառապողները: Նման խնդիրների դեպքում հարկավոր է չամաչել և անմիջապես խորհրդակցել բժշկի հետ: Պետք չէ զբաղվել ինքնաբուժությամբ, քանի որ այնպիսի դեղամիջոցները, ինչպիսին վիագրան է, ազատում են միայն ախտանշաններից, սակայն ցույց չեն տալիս հիվանդության առաջացման իրական պատճառը:

3.      Սրտի ռիթմի անկանոնություն

Եթե սրտի կծկումները դադարում են պարբերաբար լինել և դառնում են քաոսային, ապա խնդիրը կարող է լինել սրտի ռիթմի խանգարման մեջ: Նման խանգարման պատճառ կարող է դառնալ «հանգստյան օրվա համախտանիշը», երբ մարդը օգտագործում է մեծ քանակությամբ ալկոհոլ ու սնունդ և քիչ է քնում: Խնդիրը կարող է առաջանալ նույն օրը կամ 12 ժամ անց և սովորաբար ուղեկցվում է կրծքավանդակում տհաճ զգացողություններով ու գլխապտույտով:  Ճիշտ ախտորոշման համար հարկավոր է խորհրդակցել բժշկի հետ, կատարել էլեկտրասրտագրություն կամ անցնել 24-ժամյա ԷՍԳ մոնիտորինգ:

4.      Ոտքերի այտուցվածություն

Սա կարող է լինել հյուսվածքներում հեղուկի կուտակման արդյունքում և կրել ժամանակավոր բնույթ, ինչպես օրինակ՝ հղիության, աղի չարաշահման կամ որոշ դեղամիջոցների ընդունման դեպքում: Սակայն այտույցները կարող են նաև լինել սրտանոթային հիվանդությունների ախտանշան և վկայել, որ սրտի՝ որպես պոմպի գործառույթը խախտված է: Նման դեպքերում անհրաժեշտ է անմիջապես խորհրդակցել բժշկի հետ: Առանձնահատուկ ուշադիր պետք է լինեն շաքարային դիաբետով տառապողները, քանի որ այն բարձրացնում է սրտանոթային հիվանդությունների առաջացման հավանականությունը:

5.      Գլխապտույտներ

Գլխապտույտները կարող են պայմանավորված լինել տարբեր պատճառներով, այդ թվում նաև սրտանոթային հիվանդություններով: Դրանք կարող են լինել աորտալ ստենոզի ախտանշան, որի դեպքում նեղանում է աորտալ փականի անցքը և գլխուղեղը բավարար քանակությամբ արյուն չի ստանում: Ոմանց մոտ գլխապտույտներն առաջանում են պառկած դիրքից կտրուկ կանգնելու հետևանքով, երբ զարկերակային ճնշումն իջնում է: Գլխապտույտների դեպքում հարկավոր է ուշադրություն դարձնել դրանց ուղեկցող այլ ախտանշաններին (հևոց, թուլություն, գիտակցության կորուստ, ցավեր կրծքավանտակի հատվածում): Գիտակցությունը մեկ անգամ կորցնելը կարող է բացարձակապես անվնաս լինել, սակայն խնդրի կրկնության դեպքում հարկավոր է անմիջապես դիմել մասնագետի օգնությանը:

6.      Մազաթափություն ու բնավորության փոփոխություն

Չնայած, որ որոշ ուսումնասիրություններ ցույց են տալիս ճաղատացման ու բնավորության փոփոխության և սրտանոթային հիվանդությունների միջև կապը, սակայն այդ խնդիրներից ոչ մեկը, ի տարբերություն վերոնշյալների, սրտի հետ կապված խնդիրների նշան չէ: Համարվում է, որ չար մարդկանց մոտ սրտանոթային հիվանդությունները շատ ավելի հաճախ են առաջանում՝ չնայած, որ այս պնդումը վիճելի է: Նման խնդիրների առկայության դեպքում պետք չէ խուճապի մատնվել ու անհանգստանալ մազաթափության համար: Վտանգի մասին օրգանիզմի տված ազդանշանները հասկանալու համար՝ նախ հարկավոր է որպես հարկն է ուսումնասիրել այն:

Նյութի աղբյուրը՝ trental.ru