Ախտանշաններ, որոնք անտեսելը կարող է լուրջ հետևանքներ ունենալ

Առողջական ցանկացած խնդրի դեպքում օրգանիզմը միշտ նախազգուշացնում է ախտանշանների միջոցով, սակայն կյանքի արագ ռիթմը ոչ միշտ է թույլ տալիս ժամանակին նկատել խնդիրները:

Կան ախտանշաններ, որոնք ոչ մի լուրջ խնդրի մասին չեն վկայում, սակայն կան այնպիսինները, որոնց միջոցով օրգանիզմը փորձում է նախազգուշացնել լուրջ հիվանդությունների զարգացման մասին: Սա է պատճառը, որ մասնագետները հորդորում են ավելի ուշադիր լինել, քանի որ հիվանդությունը վաղ փուլերում բուժելն ու կանխարգելելը շատ ավելի հեշտ է, քան հետագայում դրա հետևանքով առաջացած մի շարք բարդությունների դեմ պայքարելը:

Մասնագետները ներկայացրել են մի քանի ախտանշան, որոնք ոչ մի դեպքում չի կարելի անտեսել:

Կտրուկ առաջացած ցավ որովայնի հատվածում

Որովայնային ցավերը ծանոթ են գրեթե բոլորորին, սակայն եթե ցավը շատ ուժեղ է և ի հայտ է գալիս հանկարծակի, ապա հարկավոր է խորհրդակցել բժշկի հետ: Նման ցավը կարող է վկայել առողջական մի շարք խնդիրների մասին, որոնց շարքին են դասվում որդանման ելունի բորբոքումը, փորկապությունը, ձվարանի կիստայի պատռվածքը, աորտայի պատռվածքը և այլն:

Աղիների կտրուկ ցավի դեպքում մասնագետները խորհուրդ են տալիս անհապաղ շտապ օգնություն կանչել, այլապես հետևանքները կարող են անդառնալի լինել:

Հևոց առանց պատճառի

Առանց պատճառի ի հայտ եկած հևոցի դեպքում հարկավոր է անպայման դիմել մասնագետին, քանի որ այդ ախտանշանը կարող է վկայել թոքային էմբոլիայի զարգացման մասին: Այս խնդրին ավելի հաճախ բախվում են հորմոնալ հակաբեղմնավորիչ դեղահաբեր ընդունող կանայք, ծխող մարդիկ, ինչպես նաև նրանք, ովքեր վարում են նստակյաց կենսակերպ:

Բացի այդ, առանց որևէ պատճառի առաջացած հևոցը կարող է լինել ասթմայի, թոքերի բորբոքման, տագնապային գրոհի և մի շարք այլ լուրջ խնդիրների ախտանշան:

Կտրուկ առաջացած գլխացավ

Գլխացավերը ժամանակ առ ժամանակ անհանգստացնում են բոլորին, սակայն եթե դրանք չափազանց ուժգին են, ապա ոչ մի դեպքում չպետք է անտեսվեն: Նման գլխացավի պատճառ կարող է լինել գլխուղեղի հյուսվածքի արյունազեղումը, ինչը կարող է վտանգավոր լինել կյանքի համար:

Անհագ ծարավ

Եթե մարդը սովորականից շատ ջուր է խմում, սակայն ոչ մի կերպ չի կարողանում ազատվել ծարավի զգացումից, ապա հարկավոր է խորհրդակցել մասնագետի հետ, քանի որ անհագ ծարավը կարող է լինել շաքարային դիաբետի ախտանշան:

Կրծքավանդակի, պարանոցի, ծնոտի, մեջքի կամ ձեռքի հատվածում նկատվող ճնշման զգացողություն կամ ցավ

Կրծքավանդակի ցավը սրտամկանի ինֆարկտի ամենատարածված ախտանշաններից մեկն է, սակայն քչերը գիտեն, որ դա միակը չէ: Հարկ է հիշել, որ նման լուրջ խնդրի մասին են վկայում նաև պարանոցի, ծնոտի, մեջքի և անգամ ձեռքի ցավը, ինչպես նաև հոգնածության զգացումը և օդի պակասը:

Նյութի աղբյուրը՝ med2.ru