Որոնք են օստեոպորոզի հիմնական ախտանշանները

15:42 • 06.11.18

Օստեոպորոզը հաճախ անվանվում է «համր հիվանդություն», քանի որ զարգացման վաղ փուլերում այն չի դրսևորվում որևէ ախտանշանով: Ընդ որում՝ այդ շրջանը կարող է բավական երկար տևել՝ 5-15 տարի, իսկ դրանից հետո ի հայտ կգան ախտանշաններ, որոնցից ազատվելը շատ դժվար կլինի:

Սակայն կան ախտանշաններ, որոնք իմանալը կօգնի ժամանակին հայտնաբերել հիվանդությունն ու բուժել այն:

Օստեոպորոզը հիվանդություն է, որին բնորոշ է ոսկրային հյուսվածքների ամրության ու խտության նվազումը, ինչի հետևանքով էլ այս հիվանդությունից տառապողների մոտ բարձր է լինում վնասվածքների ու կոտրվածների հավանականությունը:

Տարիքի հետ այս հիվանդության զարգացման հավանականությունը զգալիորեն աճում է: Ընդ որում՝ ուսումանասիրությունները ցույց են տվել, որ հաճախ այս խնդիրն առաջանում է դաշտանադադարից հետո, ինչը պայմանավորված է լինում կանանց օրգանիզմում էստրոգենի և այլ հորմոնների ցածր մակարդակով:

Օստեոպորոզի հիմնական ախտանշանների շարքին են դասվում.

· մեջքի կամ ազդրերի ցավը,

· հոդացավերը,

· ցավի ուժգնացումը ֆիզիկական ակտիվության ժամանակ (անգամ չնչին ակտիվության դեպքում),

· ցավի մեղմվելը հանգստից հետո (քնից հետո),

· կորացածությունը,

· հասակի նվազում,

· ոչ ուղիղ քայլվածքը:

Սկզբնական շրջանում օստեոպորոզը չի կարող ազդել ոսկորների ամրության վրա, քանի որ այն ժամանակի ընթացքում է ազդում ոսկրային հյուսվածների կառուցվածքի վրա: Այս փուլում հիվանդությունը կարելի է հայտնաբերել մարմնի կամ միայն ողնաշարի ռենտգենային հետազոտության և ոսկորների ամրության ստուգման միջոցով:

Սակայն լինում են դեպքեր, երբ անգամ ակնհայտ ախտանշանների դեպքում մարդիկ անտեսում են հիվանդությունը, ինչի հետևանքով այն էլ ավելի է խորանում: Նման դեպքերում կարող են նկատվել ոսկորների հաճախակի և անսպասելի կոտրվածքներ, դեֆորմացիաներ կամ տեղախախտումներ: Բացի այդ, նման դեպքերում նաև կոտրվածքների հանդեպ առավել զգայուն են դառնում մարմնի այնպիսի հատվածները, ինչպիսին են կոնքա-ազդրային հոդը, արմունկը և ճաճանչոսկրը:

Նյութի աղբյուրը՝ budetezdorovy.ru