Որոնք են ամենատարածված փաստերն ու միֆերը ցիստիտի մասին

Ցիստիտը միզապարկի բորբոքումն է, որը բավական տարածված հիվանդություն է և ծանոթ է շատերին: Չնայած այս հիվանդության տարածվածությանը՝ մինչ օրս կան դրա հետ կապված բազմաթիվ միֆեր, որոնց մարդիկ շարունակում են հավատալ:

Ձեր ուշադրությանն ենք ներկայացնում ամենատարածված փաստերն ու միֆերը ցիստիտի մասին:

·        Ցիստիտն առաջանում է կարճ կիսաշրջազգեստ կրելու դեպքում. միֆ է

Իրականում ցիստիտի առաջացման պատճառ է հանդիսանում ոչ թե կարճ կիսաշրջազգեստը, այլ փոքր կոնքի օրգանների գերսառեցումը: Հիվանդությունն ակտիվացնող խթան կարող է հանդիսանալ խոնավ լողազգեստը, սառը ջրում լողալը, սառը քարին նստելը և այլն: Սակայն միևնույն ժամանակ մասնագետները նախազգուշացնում են, որ գերսառեցումը, որպես կանոն, միայն խթան է լինում, որը թուլացնում է իմունային համակարգը և այս թուլացման ֆոնին սկսում են զարգանալ քրոնիկական վարակները: Ընդ որում՝ ցիստիտի հարուցիչը կարող է գտնվել օրգանիզմի ցանկացած հատվածում և իմունային համակարգի թուլացման դեպքում հեշտությամբ հայտնվել միզապարկում:

·        Ցիստիտը կարող է առաջանալ սեռական ակտից հետո. ճիշտ է

Գոյություն ունի ցիստիտի մի տեսակ, որն անվանվում է «մեղրամսի ցիստիտ»: Բանն այն է, որ միզապարկը հաճախ բորբոքվում է առաջին սեռական ակտից հետո: Այս դեպքում հիվանդության զարգացումը կարող է պայմանավորված լինել զուգընկերոջ օտար միկրոֆլորայով, միզուկում հայտնված հեշտոցային քսուքով և անգամ հորմոնալ տատանումներով: Ընդ որում՝ «մեղրամսի ցիստիտն» առաջանում է ոչ միայն առաջին սեռական ակտից հետո, այլև երկարատև սեռական զսպվածությունից կամ զուգընկերոջ փոփոխությունից հետո:

·        Հեշտոցի բորբոքումը կարող է դառնալ ցիստիտի առաջացման պատճառ. ճիշտ է

Հեշտոցի լորձաթաղանթի բորբոքումները, կաթնասնկախտը, ինչպես նաև ուրեապլազմոզը, խլամիդիոզը և միկոպլազմոզը կարող են նպաստել ցիստիտի զարգացմանը, ինչը բացատրվում է կնոջ միզուկի անատոմիական առանձնահատկություններով: Ի տարբերություն տղամարդկանց միզուկի՝ կանանց միզուկը շատ ավելի լայն է ու կարճ, ուստի վարակները հեշտությամբ կարող են հայտնվել միզապարկում:

·        Ցիստիտի ժամանակ մեզի մեջ արյան հետքեր են նկատվում. ոչ միշտ

Ցիստիտի հիմնական ախտանշաններն են հաճախակի միզելու ցանկությունը, որովայնի ստորին հատվածի և գոտկատեղի ցավը, ինչպես նաև ցավոտ միզարձակությունը: Միզապարկի բորբոքման դեպքում մեզը կարող է պղտոր լինել: Երբեմն մեզի մեջ կարող են արյան կաթիլներ հայտնվել, ինչի հետևանքով այն ստանում է վարդագույն երանգ, սակայն այս ախտանշանը ոչ միշտ է ի հայտ գալիս, ուստի հիվանդությունը ճիշտ ախտորոշել կարող է միայն մասնագետը՝ հիմնվելով բուզննման ու անալիզների արդյունքների վրա:

·        Ցիստիտը կարելի է բուժել տաք լոգանքի միջոցով. միֆ է

Երիցուկի կամ վաղենակի եփուկներով տաք լոգանքը կարող արդյունավետ կերպով մեղմել ցավը սուր ցիստիտի ժամանակ, սակայն ոչ մի դեպքում չի բուժի այն: Հարկ է հիշել, որ միայն տաք լոգանք ընդունելով հնարավոր չի բուժել հիվանդությունը, սակայն կարելի է նպաստել, որ այն ստանա քրոնիկական բնույթ: Սա է պատճառը, որ առաջին իսկ ախտանշանների դեպքում հարկավոր է դիմել բժշկին և չզբաղվել ինքնաբուժությամբ, քանի որ վարակը կարող է ախտահարել նաև երիկամները:

·        Ցիստիտն անբուժելի հիվանդություն է. միֆ է

Հիվանդության դեմ պայքարը ժամանակին սկսելու դեպքում սուր ցիստիտից կարելի է հեշտությամբ ազատվել: Միջինում ցիստիտի բուժումը տևում է 10 օր (հակաբիոտիկներով բուժման կուրս), որից հետո որոշ ժամանակ հարկավոր է վերականգնել հեշտոցի ու աղիների միկրոֆլորան: Սակայն հարկ է հիշել, որ անգամ լիարժեք բուժումից հետո ցիստիտը կարող է կրկնվել առողջության հանդեպ ավելի ուշադիր չլինելու դեպքում:

Նյութի աղբյուրը՝ med2.ru