5 ախտանշան, որոնք վկայում են կոֆեինային կախվածության մասին

Շատերի համար արդեն պարտադիր սովորույթ է դարձել առավոտյան սուրճ խմելը, քանի որ առանց այդ անուշաբույր ըմպելիքի շատ դժվար է լինում արթնանալ: Ընդ որում՝ կան բազմաթիվ գիտական աշխատանքներ, որոնք ապացուցում են, որ սուրճն օժտված է մի շարք օգտակար հատկություններով և օգնում է բուժել ու կանխերգելել առողջական բազում խնդիրներ, ուստի այս ըմպելիքը ոչ միայն համեղ է, այլև շատ օգտակար:

Սակայն ցանկացած օգտակար բան, այդ թվում նաև սուրճը կարող է շատ վտանգավոր լինել չարաշահելու դեպքում: Այսպիսով՝ ձեր ուշադրությանն ենք ներկայացնում 5 ախտանշան, որոնք վկայում են կոֆեինի չարաշահման ու կոֆեինային կախվածության մասին:

Արտասովոր հոգնածություն ցերեկվա ժամերին

Եթե օրվա երկրորդ կեսին մարդուն տանջում է մի բաժակ սուրճ կամ կոֆեին պարունակող որևէ այլ ըմպելիք խմելու ցանկությունը, ապա ամենայն հավանականությամբ նրա մոտ արդեն կոֆեինային կախվածություն է առաջանում: Մասնագետները խորհուրդ են տալիս սահմանափակել նման ըմպելիքների կիրառությունը, քանի որ դրանք ազդում են էներգիայի մակարդակի վրա՝ կտրուկ տատանումներ առաջացնելով:

Մուգ դեղին կամ նարնջագույն մեզ

Մուգ դեղին կամ նարնջագույն մեզն օրգանիզմի ջրազրկման ակնհայտ ախտանշանն է: Բանն այն է, որ կոֆեինը միզամուղ ազդեցություն է ունենում, ինչն էլ ջրազրկում է օրգանիզմը՝ հանգեցնելով մեզի գույնի փոփոխության:

Անքնություն

Կոֆեինի յուրացման համար օրգանիզմին պետք է առավելագույնը մեկ ժամ, սակայն հետո դրա հետքերը դեռ մի քանի ժամ մնում են օրգանիզմում: Սա է պատճառը, որ մասնագետները խորհուրդ չեն տալիս երեկոյան սուրճ կամ կոֆեին պարունակող այլ ըմպելիք խմել: Ընդ որում՝ պետք չէ ըմպել անգամ առանց կոֆինի սուրճ կամ թեյ, քանի որ դրանք այնուամենայնիվ որոշ չափով կոֆեին պարունակում են:

Անհանգստություն ու տագնապալից վիճակ

Կոֆեինի չարաշահման և կախվածության մասին վկայող ամենավառ ախտանշաններից են տագնապն ու անտեղի անհանգստությունը: Նման դեպքերում մարդու ձեռքերը սկսում են քրտնել, իսկ սրտի կծկումների հաճախականությունը խանգարվում է: Բանն այն է, որ կոֆեինն էլ ավելի է խորացնում սթրեսն ու դեպրեսիան, ինչպես նաև խթանում է մակերիկամների աշխատանքը՝ ստիպելով արտադրել սթրեսի հորմոններ, ինչպիսին է ադրենալինը:

Ստամոքսի այրոց և թթու համ բերանում

Առանց որևէ ակնհայտ պատճառի նման ախտանշանների ի հայտ գալը նույնպես կարող է պայմանավորված լինել կոֆեինով, որը թուլացնում է ստամոքսի վերին սֆինկտերը՝ թույլ տալով, որ ստամոքսի թթու պարունակությունը որոշ քանակությամբ հայտնվի կոկորդում ու բերանի խոռոչում:

Նման ախտանշաններից ազատվելու համար կարելի է նվազեցնել օգտագործվող կոֆեինի քանակությունը, սակայն եթե անգամ այդ դեպքում խնդիրը չի անհետանում, ապա անհրաժեշտ է անմիջապես բուժզննում անցնել:

Նյութի աղբյուրը՝ healthylifestyle.su