Ինչպես հայտնաբերել բերանի խոռոչի քաղցկեղը վաղ փուլերում. ամենատարածված ախտանշանները

Բերանի խոռոչի ուռուցքներն օրեցօր ավելի ու ավելի տարածված խնդիր են դառնում, ուստի այս վտանգավոր հիվանդության մասին հուշող վաղ ախտանշաններն իմանալը շատ կարևոր է: Նման չարորակ նորագոյացությունների դեպքում բարեհաջող բուժման առաջին նախապայմանը հիվանդությունը ժամանակին հայտնաբերելն ու միջոցներ ձեռնարկելն է, ուստի ձեր ուշադրությանն ենք ներկայացնում մի քանի ախտանշան, որոնք կարող են վկայել վտանգավոր պաթոլոգիական գործընթացի առկայության մասին և կօգնեն հայտնաբերել այն զարգացման վաղ փուլում:

Այսօր լրատվամիջոցները հաճախ են անդրադառնում թոքերի, կրծքագեղձի, գլխուղեղի կամ շագանակագեղձի քաղցկեղին, սակայն անտեսում են բերանի խոռոչի քաղցկեղը, մինչդեռ այն իր տարածվածության աստիճանով զբաղեցնում է աշխարհում վեցերորդ տեղը:

Ամբողջ աշխարհում հազարավոր մարդիկ տառապում են այս հիվանդությունից և տարեցտարի հիվանդների թիվն ավելանում է: Առավել հաճախ բերանի խոռոչի չարորակ ուռուցքները հայտնաբերվում են 50-74 տարեկան անձանց մոտ, սակայն այն կարող է ախտորոշվել նաև երիտասարդների մոտ:

Բերանի խոռոչի չարորակ ուռուցքների շարքին են դասվում ոչ միայն հենց բերանի խոռոչի ուռուցքները, այլև թքագեղձերի և նշագեղձերի չարորակ նորագոյացությունները: Սովորաբար նման ուռուցքների առկայությունը պայմանավորված է լինում կարիեսով ու լնդերի հիվանդություններով, ինչը ենթադրում է, որ զգալի նշանակություն է ունենում նաև բերանի խոռոչում անաէրոբ մանրէների աճն ու զարգացումը: Սակայն հիվանդության զարգացմանը նպաստող հիմնական գործոնը, այնուամենայնիվ, մարդու կենսակերպն է, այլ կերպ ասած՝ այնպիսի վատ սովորությունները, ինչպիսին են ծխախոտի և ալկոհոլի չարաշահումը:

Ուսումնասիրությունները ցույց են տվել, որ ծխախոտի չարաշահման դեպքում բերանի խոռոչի քաղցկեղի առաջացման հավանականությունը մեծանում է հինգ անգամ, իսկ ալկոհոլի չարաշահման դեպքում՝ չորս անգամ: Պետք չէ մոռանալ նաև բերանի խոռոչի ողողման համար նախատեսված հատուկ հեղուկների մասին, որոնք ստեղծված են սպիրտի հիման վրա, քանի որ դրանք նույնպես կարող են նպաստել հիվանդության զարգացմանը:

Սակայն ինչպես և քաղցկեղի ցանկացած այլ տեսակ, բերանի խոռոչի քաղցկեղը նույնպես հնարավոր է հեշտությամբ բուժել՝ այն ժամանակին հայտնաբելով, իսկ ժամանակին հայտնաբերելու համար պետք է իմանալ հիվանդության մասին վկայող ախտանշանները:

Քաղցկեղի այս տեսակի մասին վկայող ամենատարածված ախտանշաններն են բերանի խոռոչում կոշտացումների ու այտուցների առկայությունը, երկար ժամանակ չապաքինվող խոցերը և մաշկի կարմիր հատվածները: Մյուս ախտանշանների շարքին կարող են դասվել կլլման ակտի խանգարումը (դիսֆագիա), ձայնի փոփոխությունն ու խոսքի հետ կապված խնդիրները, քաշի անբացատրելի կորուստը, բերանի խոռոչում արյունահոսությունը կամ թմրածությունը, ատամների արմատների թուլացումը և ծնոտի շարժունության հետ կապված խնդիրները:

Այս ախտանշաններից ցանկացածի առկայության դեպքում հարկավոր է չանտեսել այն ու անհապաղ դիմել բժշկին անհրաժեշտ բուժզննման համար: Հարկ է հիշել, որ հիվանդությունը կանխարգելելն ու վաղ փուլերում բուժելը շատ ավելի հեշտ է, քան դրա հետևանքների ու բարդությունների դեմ պայքարելը:

Նյութի աղբյուրը՝ healthinfo.ua