Արտասովոր ախտանշաններ, որոնք վկայում են սրտանոթային համակարգի հիվանդությունների մասին

Սրտի հիվանդությունները համարվում են մարդկանց մահացության ամենատարածված պատճառը, ուստի սրտամկանի առողջության մասին հոգ տանելը շատ կարևոր է: Սակայն խնդիրն այն է, որ ժամանակակից մարդկանց կենսակերպը, սննդակարգն ու վատ սովորությունները խիստ բացասաբար են ազդում սրտանոթային համակարգի վրա, իսկ կյանքի արագ ռիթմը ոչ միշտ է թույլ տալիս ժամանակին միջոցներ ձեռնարկել:

Վիճակագրական տվյալներով՝ յուրաքանչյուր չորրորդի մահվան պատճառը լինելու են սրտի հիվանդությունները, որոնց ախտորոշումն այդքան էլ հեշտ չէ, սական, այնուամենայնիվ, գերմանցի գիտնականները նշել են վեց բավական արտասովոր ախտանշան, որոնք թույլ կտան հայտնաբերել խնդիրը զարգացման վաղ փուլերում և խուսափել հետագա բարդություններից:

Սրտի հիվանդությունների մասին վկայող նման արտասովոր ախտանշաններից մեկը ականջաբլթակի վրա առաջացած կնճիռներն են: Ավելի քան 40 ուսումնասիրության արդյունքում պարզվել է, որ նման կնճիռները զգալիորեն բարձրացնում են աթերոսկլերոզի առաջացման հավանականությունը՝ մի հիվանդության, որի դեպքում զարկերակներում աթերոսկլերոտիկ վահանիկներ են կուտակվում:

Եվս մի արտասովոր ախտանշան է մաշկի տակ ճարպի կուտակումները կամ քսանտոմաները, որոնք առաջանում են արմունկներին, ծնկներին, նստատեղին և անգամ կոպերին: Նման պնդացումներն իրենք վտանգավոր չեն, սակայն կարող են վկայել մի գենետիկ հիվանդության մասին, որը կոչվում է ընտանեկան հիպերխոլեստերինեմիա և բնորոշվում է հիվանդի մոտ «վատ» խոլեստերինի չափազանց բարձր մակարդակով:

Անհանգստացնող արտասովոր ախտանշանների շարքին է դասվում նաև եղունգների կլորացումը, ինչը պայմանավորված է լինում արյան հոսքի խանգարումով, որի դեպքում մատները չեն ստանում բավարար քանակությամբ թթվածնով հարուստ արյուն:

Ի դեպ, ճարպային կուտակումներ կարող են առաջանալ ոչ միայն մաշկի տակ, այլև աչքի ծիածանաթաղանթի շուրջը: Նման շրջանակները չեն ազդում տեսողության վրա, սակայն խոսում են սրտի կորոկար հիվանդության զարգացման բարձր հավանականության մասին:

Սրտամկանի հիվանդությունների առաջացման հավանականության բարձրացման մասին են խոսում նաև հիվանդ լնդերն ու թուլացած ատամները: Բանն այն է, որ բերանի խոռոչում կուտակված վնասակար բակտերիաները կարող են հայտնվել արյան մեջ և ախտահարել սրտամկանը:

Չի կարելի անտեսել նաև շուրթերի կապույտ երանգը, ինչը վկայում է ցիանոզի մասին: Եթե նման անառողջ գույնը պայմանավորված չէ ցուրտ եղանակով, ապա խնդիրն արյան շրջանառության խանգարման մեջ է:

Նյութի աղբյուրը՝ med2.ru