Ինչ է խուճապային գրոհը և որոնք են դրա հիմնական ախտանշանները

Խուճապային (պանիկ) գրոհն ինտենսիվ վախի հանկարծակի շրջան է, որը կարող է ի հայտ գալ ցանկացած ժամանակ։ Այն սկսվում է հանկարծակի և զարգանում արագ՝ իր գագաթնակետին հասնելով հաշված րոպեների ընթացքում։ Մարդը համակվում է անբացատրելի տանջալից վախով ու տագնապի զգացումով, թեև իրականում որևէ իրական վտանգ կամ վախի այլ պատճառ առկա չէ:

Սա իրականում բավական լուրջ ու տարածված խնդիր է, սակայն մարդիկ ոչ միշտ են կարողանում ինքնուրույն ախտորոշել խուճապային գրոհը՝ ենթադրելով, որ դա պարզապես հույզերի պոռթկում է: Սա է պատճառը, որ խուճապային գրոհների դեպքում շատ քչերն են դիմում մասնագետին՝ անհրաժեշտ օգնությունը ստանալու համար:

Առավել հաճախ խուճապային գրոհն առաջանում է նիկոտինային, սննդային ու ալկոհոլային կախվածություններից տառապողների, ինչպես նաև նստակյաց կենսակերպ վարող, չափազանց հուզական ու շատ վախեր ունեցող մարդկանց մոտ:

Այս խնդրի դեմ պայքարելու համար հարկավոր է առաջին հերթին կարողանալ ախտորոշել այն, ուստի ձեր ուշադրությանն ենք ներկայացնում խուճապային գրոհների հիմնական ախտանշանները, որոնց դեպքում հարկավոր է անհապաղ դիմել մասնագետին:

Որոնք են խուճապային գրոհի հիմնական ախտանշանները

Այս խնդիրը սովորաբար դրսևորվում է բավական վառ ախտանշաններով, որոնք տարբերելը կօգնի ժամանակին ճիշտ քայլեր ձեռնարկել: Խուճապային գրոհի ախտանշանների շարքին են դասվում.

·        սրտի զարկերի արագացումը,

·        որևէ կպչուն միտքը, որն առաջացնում է տհաճ զգացողություններ, վախ ու անհանգստություն,

·        մտքերն այն մասին, որ մարդը շուտով կմահանա և իրեն ոչ ոք չի փրկի,

·        առատ քրտնարտադրությունը,

·        դժվարացած շնչառությունը և անգամ հևոցը,

·        գիտակցության կորուստը,

·        գլխապտույտն ու գլխացավը,

·        վերջույթների թմրածությունը,

·        զարկերակային բարձր ճնշումը,

·        անքնությունը,

·        որևէ առարկայի վրա հայացքը կենտրոնացնել չկարողանալը:

Սա այն ախտանշաններն են, որոնք ոչ մի դեպքում չի կարելի անտեսել կամ անուշադրության մատնել: Հարկ է հիշել, որ խուճապային գրոհից տառապող մարդը պետք է անպայման բժշկական օգնություն ստանա, քանի որ այս խնդիրը ժամանակին չլուծելու դեպքում կարող են առաջանալ տագնապային խանգարումներ և այլ հոգեկան հիվանդություններ:

Նյութի աղբյուրը՝ med2.ru