Ինչ է վագինիտը (հեշտոցաբորբ) և որոնք են դրա հիմնական ախտանշաններն ու առաջացման պատճառները

13:09 • 19.11.18

Վագինիտը (հեշտոցաբորբ) հեշտոցի լորձաթաղանթի բորբոքումն է, որը համարվում է ամենատարածված գինեկոլոգիական հիվանդություններից մեկը, որոնց շարքին են դասվում նաև վուլվովագինիտը (հեշտոցի և արտաքին սեռական օրգանների լորձաթաղանթների բորբոքում) և վուլվիտը (ամոթույքի բորբոքում): Այս հիվանդության առաջացմանը նպաստող գործոնները կարող են տարբեր լինել: Դրանց շարքին են դասվում.

· սեռական ճանապարհով փոխանցվող հիվանդությունները,

· վարակիչ հիվանդությունների հետևանքով իմունային համակարգի թուլացումը,

· ներզատական գեղձերի գործառույթների խանգարումները (ձվարանների հիվանդություններ, դաշտանադադար, շաքարային դիաբետ, ճարպակալում և այլն),

· հեշտոցի պատերի իջեցման հետևանքով դրա անատոմիական ու ֆիզիոլոգիական կառուցվածքի խանգարումները,

· հեշտոցի լորձաթաղանթի վնասվածքները,

· անոթային խանգարումների և ծերունական ատրոֆիայի հետևանքով լորձաթաղանթի սնուցման խանգարումը,

· անձնական հիգիենային ու սեռական հիգիենային չհետևելը,

· հակաբիոտիկների ոչ ճիշտ ընդունումը,

· ալերգիաները:

Նշված գործոնները նպաստում են հեշտոցի միկրոֆլորայի խանգարմանը և բորբոքային գործընթացների առաջացմանը:

Հեշտոցաբորբի հարուցիչ կարող են լինել սնկերը, ստրեպտոկոկները, ստաֆիլոկոկները, աղիքային ցուպիկները, գոնոկոկները, տրիխոմոնասները և այլն: Վերջին տարիներին կտրուկ աճել է միկոպլազմաներով ու խլամիդիաներով պայմանավորված հեշտոցաբորբերի թիվը:

Հեշտոցաբորբի ախտանշանները

Կախված հիվանդության տեսակից՝ հեշտոցաբորբը կարող է դրսևորվել տարբեր կերպ.

Սուր փուլին հատուկ հիմնական ախտանշանն է տհաճ հոտով ու արտասովոր գույնով առատ հեշտոցային արտադրությունը:

Բացի այդ, հեշտոցաբորբի դեպքում արտադրությունը հաճախ ուղեկցվում է քորով, իսկ երբեմն էլ նաև արտաքին սեռական օրգանների կարմրածությամբ ու այտուցվածությամբ:

Այս հիվանդությանը բնորոշ ախտանշաններից են նաև ցավը սեռական ակտի ժամանակ, այրոցը միզարձակության ժամանակ, ինչպես նաև որովայնի կամ մեջքի ստորին հատվածում ի հայտ եկող ցավոտ զգացողությունները:

Սուր հեշտոցաբորբի ժամանակ մարմնի ջերմաստիճանը սովորաբար չի բարձրանում, սակայն լուրջ ախտահարումների դեպքում կարող է նկատվել սուբֆեբրիլ ջերմաստիճան:

Քրոնիկ վագինիտի դեպքում հիմնական ախտանշանը լինում է հեշտոցային արտադրությունը: Ի տարբերություն սուր հեշտոցաբորբի՝ քրոնիկական վագինիտը հազվադեպ է դրսևորվում քորով ու տհաճ զգացողություններով: Սակայն միևնույն ժամանակ հիվանդության այս տեսակին բնորոշ է երկար ընթացքն ու հաճխախակի կրկնվելու հատկությունը:

Նյութի աղբյուրը՝ healthinfo.ua