5 խորհուրդ՝ գլխուղեղի կաթվածից խուսափելու համար

12:11 • 20.11.18

Ժամանակակից մարդու կյանքը լի է սթրեսներով, անհանգստությամբ և մի շարք այլ վտանգավոր գործոններով, որոնք կարող են հանգեցնել գլխուղեղի կաթվածի: Այս հիվանդությունը հիմնականում հանդիպում է 40 տարեկանից բարձր անձանց մոտ, սակայն վերջին շրջանում գիտնականները նկատել են, որ այն զգալիորեն «երիտասարդացել» է: Սա է պատճառը, որ այսօր այն ավելի ու ավելի հաճախ է ախտահարում երիտասարդներին:

Սակայն կան մի շարք պարզ կանոններ, որոնք կօգնեն զգալիորեն նվազեցնել կաթվածի հավանականությունը: Ձեր ուշադրությանն ենք ներկայացնում դրանցից մի քանիսը:

1. Վերահսկողության տակ պահել զարկերակային ճնշումը

Հարկ է հիշել, որ զարկերակային գերճնշումը նպաստում է գլխուղեղի կաթվածի առաջացնամը, ուստի 40 տարեկանից հետո մարդը պետք է պարբերաբար չափի իր ճնշումը և պահի այն վերահսկողության տակ: Ճնշման բարձրացման դեպքում հարկավոր է դիմել մասնագետին, որը կնշանակի անհրաժեշտ բուժումը խնդիրը կարգավորելու և դրանով իսկ կաթվածի առաջացման հավանականությունը նվազեցնելու համար:

2. Անոթների բուժզննում անցնել

Գլխուղեղի կաթվածի առաջացմանը նպաստող հիմնական գործոններից մեկն է աթերոսկլերոզը: Սա անոթների ախտահարում է, որը կարող է երկար ժամանակ որևէ կերպ չդրսևորվել, սակայն լուրջ հետևանքներ ունենալ: Անոթների բուժզննումը կօգնի խուսափել նման խնդիրներից, ինչպես նաև պարզել դրանցում կուտակված խոլեստերինի մակարդակը:

3. Հրաժարվել ալկոհոլից ու ծխախոտից

Ալկոհոլային ըմպելիքներն ու ծխախոտը նույնպես համարվում են գլխուղեղի կաթվածի առաջացմանը նպաստող ռիսկային գործոններից մեկը, ինչը վաղուց արդեն գիտականորեն ապացուցված է:

4. Ֆիզիկական ակտիվություն ու ավելորդ քաշի բացակայություն

Գլխուղեղի կաթվածից պաշտպանվելու համար հարկավոր է ֆիզիկական ակտիվություն, քանի որ նստակյաց կենսակերպը շատ վտանգավոր է: Ընդ որում՝ շատ օգտակար կարող է լինել անգամ հասարակ զբոսանքը: Բացի այդ, նույնքան վտանգավոր է նաև ճարպակալումը, իսկ ավելորդ քաշից ազատվելը կօգնի զգալիորեն կարգավորել ճնշման ցուցանիշները:

5. Ուշադիր լինել սեփական օրգանիզմի հանդեպ

Կան ախտանշաններ, որոնք ոչ մի դեպքում չի կարելի անտեսել: Դրանց շարքին են դասվում գլխապտույտը, աչքերի առջև սև կետերի առաջացումը, տեսողության ու լսողության բթացումը, ականջներում աղմուկը և այլն: Լուրջ խնդիրներից խուսափելու համար հարկավոր է պարզապես ուշադիր լինել օրգանիզմի տված ազդանշանների նկատմամբ և ժամանակին միջոցներ ձեռնարկել:

Նյութի աղբյուրը՝ medikforum.ru