5 հետաքրքիր փաստ ծխախոտի չարաշահման և գլխուղեղի առողջության մասին

22:06 • 29.11.18

Շատերը գիտեն, որ ծխախոտի չարաշահումը բացասաբար է ազդում թոքերի և սրտամկանի վրա, սակայն քչերը գիտեն թե ինչպես է այս վնասակար սովորությունն ազդում մյուս օրգանների և համակարգերի վրա: Ձեր ուշադրությանն ենք ներկայացնում 5 հետաքրքիր փաստ այն մասին, թե ինչպես է ծխախոտն ազդում գլխուղեղի վրա:

1. Ծխախոտը նպաստում է գլխուղեղի չափերի փոքրացմանը

Ծխախոտը ժամանակ ընթացքում ոչ միայն նպաստում է գլխուղեղի չափերի փոքրացմանը, այլև հանգեցնում կոգնիտիվ կարողությունների վատացմանը: Ընդ որում՝ ծխախոտի ունեցած բացասական ազդեցությունը պահպանվում է անգամ այս սովորությունից հրաժարվելուց մի քանի տարի անց: Սա է պատճառը, որ ծխող մարդիկ ավելի հաճախ են բախվում ծերունական թուլամտության խնդրին, իսկ դեմենցիայի առաջացման հավանականությունը նրանց մոտ բարձր է լինում 79%-ով:

Բացի այդ, ծխախոտի չարաշահման դեպքում մարդիկ հաճախ են տառապում անքնությունից կամ քնի օբտրուկտիվ ապնոէից, իսկ այս խնդիրները նպաստում են դեմենցիայի առաջացման հավանականության բարձրացմանը:

2. Ծխախոտի չարաշահումը թուլացնում է ինտելեկտը

Ծխելու հետևանքով վատանում է արյան շրջանառությունը և գլխուղեղը չի ստանում բավարար քանակությամբ թթվածին, մինչդեռ ածխաթթու գազի մակարդակը բարձրանում է, ինչը բացասաբար է ազդում կոգնիտիվ կարողությունների և ինտելեկտի վրա: Բացի այդ, համարվում է, որ ծխելու հետևանքով հաճախ թուլանում է խնդրիրները վերլուծելու և դրանք աշխատանքի ընթացքում լուծելու կարողությունը:

3. Ծխելը չի օգնում կենտրոնանալ

Շատերը կարծում են, որ ծխախոտն օգնում է կենտրոնացնել ուշադրությունը որևէ բանի վրա, սակայն մասնագետները նշում են, որ սա պարզապես «միֆ» է: Իրականում ծխախոտի գործածությունը հակառակ ազդեցությունն է ունենում: Այն զգալիորեն նվազեցնում է որևէ խնդրի վրա ուշադրությունը կենտրոնացնելու կարողությունը: Բացի այդ, գլխուղեղում թթվածնի պակասի հետևանքով ծխող մարդիկ ավելի շուտ են հոգնում:

4. Ծխախոտի գործածությունը բարձրացնում է գլխուղեղի կաթվածի առաջացման հավանականությունը

Նիկոտինը նպաստում է արյան թանձրացմանը, ինչը բարձրացնում է գլխուղեղին արյուն մատակարարող զարկերակներում թրոմբների առաջացման հավանականությունը: Արդյունքում՝ զգալիորեն բարձրանում է նաև իշեմիկ կաթվածի առաջացման հավանականությունը:

5. Գլխուղեղի ընկալիչները ներծծում են նիկոտինը

Նիկոտինն ակտիվացնում է գլխուղեղի այն հատվածը, որը պատասխանատու է հաճույքի զգացման համար: Երբ մարդու մոտ ի հայտ է գալիս նիկոտինային կախվածություն, նրա համար շատ դժվար է լինում հրաժարվել ծխախոտից, քանի որ այն հաճույքի զգացողություն է առաջացնում: Այս դեպքում նիկոտինի բացակայությունը դարձնում է մարդուն շատ ավելի դյուրագրգիռ ու անհանգիստ:

Նյութի աղբյուրը՝ med2.ru