Լավագույն բնական միջոցները ալոպեցիայի (մազաթափություն) բուժման համար

Ալոպեցիան (մազաթափություն) մազարմատների հիվանդություն է, որը զարգանում է տարբեր գործոնների ազդեցության հետևանքով: Այս խնդիրը կարող է պայմանավորված լինել ինչպես ժառանգականությամբ, այնպես էլ տարբեր հիվանդություններով ու խնդիրներով, ուստի բուժման եղանակն ընտրելուց առաջ հարկավոր է նախ պարզել հիվանդության առաջացման պատճառը: Այդ պատճառների շարքին են դասվում սնկային հիվանդությունները, սակավարյունությունը (անեմիա), դեպրեսիան, նյարդային գերլարվածությունը, սթրեսները, ինչպես նաև սննդարար նյութերի դեֆիցիտը:

Գոյություն ունեն ալոպեցիայի բուժման բազմաթիվ մեթոդներ, սակայն առավել անվտանգ են բնական միջոցները: Ընդ որում՝ դրանք ոչ միայն անվտանգ են, այլև շատ ավելի հասանելի ու արդյունավետ: Ձեր ուշադրությանն ենք ներկայացնում 15 բնական միջոց, որոնք կօգնեն բուժել ալոպեցիան ու վերականգնել մազածածկույթը:

1.      Սոխ

Սոխը պարունակում է հզոր հակասեպտիկ նյութ, որը հարուստ է ծծումբով և խթանում է գլխամաշկի արյան շրջանառությունը՝ դրանով իսկ ակտիվացնելով մազերի աճը: Պարզապես հարկավոր է 1 ճաշի գդալ սոխը խառնել 1 ճաշի գդալ շամպունին, քսել խառնուրդը գլխամաշկին, թողնել 15 րոպե, այնուհետև լվանալ գլուխը գոլ ջրով:

2.      Նարդոսի (лаванда) յուղ

Նարդոսի յուղն ալոպեցիայի բուժման լավագույն միջոցներից մեկն է: Ուսումնասիրությունները ցույց են տվել, որ այն կանխում է ալոպեցիան և պայքարում է դրա առաջացման օջախների դեմ: Պարզապես հարկավոր է խառնել նարդոսի յուղը կոկոսյան ընկույզի յուղին կամ նշի յուղին, քսել ստացված խառնուրդը գլխամաշկին, թողնել առնվազն 15 րոպե, այնուհետև լվանալ գլուխը գոլ ջրով ու շամպունով:

3.      Հազրեվարդի (розмарин) յուղ

Հազրեվարդի յուղը նույնքան արդյունավետ է, որքան նարդոսի յուղը: Պարզապես հարկավոր է խառնել հազրեվարդի յուղը կոկոսյան ընկույզի յուղին կամ նշի յուղին, քսել խառնուրդը գլխամաշկին, թողնել 15 րոպե, այնուհետև լվանալ գլուխը գոլ ջրով ու շամպունով

4.      Սխտոր

Սխտորը սնուցում ու ամրացնում է մազերը: Հարկավոր է 1 թեյի գդալ սխտորի յուղը խառնել մի փոքր կոկոսյան ընկույզի յուղին, քսել խառնուրդը գլխամաշկին, թողնել 30 րոպե, այնուհետև լվանալ գլուխը գոլ ջրով ու շամպունով:

5.      Հացհամեմի (пажитник) սերմեր

Այս բուժիչ սերմերը նույնպես շատ արդյունավետ են և օգնում են պայքարել ալոպեցիայի օջախների դեմ: Հարկավոր է 1 ճաշի գդալ հացհամեմի սերմերին ավելացնել մի բաժակ գոլ ջուր, թրմել ամբողջ գիշեր, այնուհետև քամել թուրմը և քսել գլխամաշկին: Թուրմը հարկավոր է թողնել 20 րոպե, այնուհետև լվանալ գլուխը շամպունով ու գոլ ջրով:

6.      Կանաչ թեյ

Կանաչ թեյը պարունակում է հզոր հակաօքսիդանտներ, որոնք կօգնեն ազատվել ալոպեցիայից: Պարզապես հարկավոր է պատրաստել թունդ թեյ, թողնել այն սառչի, այնուհետև բամբակի միջոցով քսել գլխամաշկին, թողնել 30-40 րոպե և լվանալ գլուխը շամպունով ու գոլ ջրով:

7.      Հիբիսկուս

Հիբիսկուսը մազերը խնամելու հիանալի միջոց է: Այն ոչ միայն պայքարում է ալոպեցիայի դեմ, այլև սնուցում ու վերականգնում է վարսերը՝ դարձնելով դրանք ավելի նուրբ ու փայլուն: Հարկավոր է պատրաստել հիբիսկուսի ծաղիկների թունդ թուրմ (կարկադե թեյ), խառնել այն կոկոսյան ընկույզի յուղին, այնուհետև քսել խառնուրդը գլխամաշկին, մի փոքր մերսել, թողնել 15 րոպե և լվանալ գլուխը շամպունով ու գոլ ջրով:

8.      Նշի յուղ

Այս յուղը ոչ միայն բուժում է ալոպեցիան, այլև պայքարում է գլխամաշկի թեփի և սնկային հիվանդությունների դեմ: Պարզապես հարկավոր է երեկոյան մազերին նշի յուղ քսել, թողնել ամբողջ գիշեր, իսկ առավոտյան լվանալ գլուխը:

9.      Մեղր

Մեղրը ոչ միայն սնուցում ու խոնավեցնում է մազերը, այլ պայքարում է գլխամաշկի բոլոր վարակների դեմ: Պարզապես հարկավոր է խառնել մեղրը կիտրոնի հյութին կամ սոխի հյութին (1:1 հարաբերակցությամբ), ստացված խառնուրդը քսել գլխամաշկին, թողնել 15 րոպե, այնուհետև լվանալ գլուխը շամպունով ու գոլ ջրով:

10.      Մատուտակի արմատ

Մատուտակի արմատը խթանում է գլխամաշկի արյան շրջանառությունը, կանխում է մազաթափությունը և ազատում է սնկերից ու վարակներից: Հարկավոր է մատուտակի արմատի թուրմին ավելացնել մի փոքր քրքում, երեկոյան քսել խառնուրդը գլխամաշկին, թողնել ամբողջ գիշեր, իսկ առավոտյան լվանալ գլուխը:

11.      Մանանեխի յուղ

Ալոպեցիայի դեմ պայքարի հիանալի միջոց է նաև մանանեխի յուղը: Անհրաժեշտ է մանանեխի տաք յուղին ավելացնել մի փոքր հինա, թողնել խառնուրդը սառչի, այնուհետև քսել գլխամաշկին: Թողնել խառնուրդը 30-40 րոպե, անուհետև լվանալ գլուխը շամպունով ու գոլ ջրով:

12.      Կոկոսյան ընկույզի կաթ

Այս հեղուկն ալոպեցիայի դեմ պայքարի լավագույն միջոցներից մեկն է: Այն հարկավոր է քսել գլխամաշկին, մի քանի րոպե մերսել մաշկը, այնուհետև լվանալ գլուխը գոլ ջրով:

13.      Կոկոսյան ընկույզի յուղ

Կոկոսյան ընկույզի յուղն օգնում է ամրապնդել մազերն ու խուսափել մազաթափությունից, ինչպես նաև փայլ է հաղորդում: Բացի այդ, այն բուժում է նաև ալոպեցիան: Պարզապես անհրաժեշտ է երեկոյան մազերին մի փոքր կոկոսի յուղ քսել, թողնել ամբողջ գիշեր, իսկ առավոտյան լվանալ գլուխը շամպունով ու գոլ ջրով:

14.      Բնական դիմակ

Մազերն ամրապնդելու և դրանց աճը խթանելու հիանալի միջոց կարող է լինել նաև դեղնուցով ու հալվեով դիմակը: Հարկավոր է խառնել 1 ձվի դեղնուցը, 1 թեյի գդալ հալվեյի հյութը, 1 թեյի գդալ կոնյակը և 1 թեյի գդալ վիտամին E-ի յուղային լուծույթը, այնուհետև ստացված խառնուրդը քսել գլխամաշկին, թողնել 25 րոպե և լվանալ գլուխը շամպունով ու գոլ ջրով:

15.      Պղպեղի ոգեթուրմ

Սա հիանալի միջոց է մազարմատները խթանելու և մազերի աճն ակտիվացնելու համար: Այն կարելի է գնել արդեն պատրաստի կամ պատրաստել ինքնուրույն: Ալոպեցիան բուժելու համար հարկավոր է ոգեթուրմը բամբակի միջոցով քսել գլխամաշկին, թողնել 20-25 րոպե, այնուհետև լվանալ գլուխը շամպունով ու գոլ ջրով:

Նյութի աղբյուրը՝ budetezdorovy.ru