Որոնք են դեպրեսիայի (ընկճախտ) մասին վկայող հիմնական ախտանշանները

Դեպրեսիան կամ ընկճախտը տրամադրության վատացումն է, որն ուղեկցվում է հոգեբանական ու ֆիզիկական ակտիվության նվազմամբ: Որպես կանոն՝ այս խնդիրը պայմանավորված է լինում չբավարարվածության զգացումով, որևէ ճնշող իրավիճակով կամ չլուծված խնդիրներով:

Չնայած, որ դեպրեսիան առավել հաճախ հանդիպում է միջին տարիքի անձանց մոտ, այն շատ տարածված է բոլոր տարիքային խմբերի մարդկանց շրջանում: Ընդ որում՝ հիվանդությունը կարող է տարբեր կերպ դրսևորվել՝ կախված հիվանդի տարիքից:

Դեպրեսիայի ախտանշանները

Դեպրեսիան հաճախ դրսևորվում է ֆիզիկական որևէ խնդրի տեսքով, ուստի այս հիվանդության դեպքում կարող են ի հայտ գալ անգամ ներքին օրգանների տարբեր խանգարումներ:

Դեպրեսիայի դեպքում, որպես կանոն, հիվանդը տառապում է թուլությունից, անտարբերությունից, գլխապտույտներից, ծանրության զգացողությունից, կրծքավանդակում այրոցի զգացողությունից, գլխում ճնշման զգացողությունից, փորկապությունից կամ փորլուծությունից, փորափքանքից, շնչելիս առաջացող ճնշման զգացողությունից, քաշի նվազումից, քնի խանգարումներից, կրծքավանդակում, որովայնում, վերջույթներում ու գլխում ջերմության զգացողությունից և մի շարք այլ տհաճ ախտանշաններից:

Հաճախ դեպրեսիայից տառապող մարդը չի նկատում իր վատ տրամադրությունը, իսկ դրա հետ կապված ֆիզիկական խնդիրները կապում է այլ հիվանդություններին: Հիվանդն անգամ կարող է բուժզննում անցնել և սկսել բուժումը՝ փորձելով ազատվել անհանգստացնող խնդիրներից, սակայն սովորաբար բուժումն անարդյունավետ է լինում:

Երեխաների ու դեռահասների մոտ դեպրեսիան կարող է դրսևորվել ալարկոտությամբ, անհնազանդությամբ ու լալկանությամբ: Բացի այդ, հիվանդությունը կարող է բացասաբար ազդել երեխայի առաջադիմության ու ընտանիքի և հասակակիցների հետ շփման վրա:

Թաքնված դեպրեսիայի դեպքում հաճախ նկատվում են խանգարումներ նաև սեռական կյանքում: Բացի այդ, հիվանդությունը կարող է ազդել մարդու սննդային նախասիրությունների և պահվածքի վրա: Այս դեպքում հիվանդը կարող է պարբերաբար հրաժարվել սննդից կամ սկսել սովորականից շատ ուտել:

Երբեմն թաքնված դեպրեսիայի դեպքում հիվանդության հիմնական կամ միակ ախտանշանը լինում է քնի խանգարումը, որը, որպես կանոն, դրսևորվում է վաղ արթնանալով կամ քնի տևողության նվազմամբ: Նման դեպքերում օրվա առաջին կեսին հիվանդին տանջում է գերհոգնածության զգացումը, իսկ վիճակի բարելավում նկատվում է միայն օրվա երկրորդ կեսին կամ երեկոյան:

Հարկ է հիշել, որ դեպրեսիան բավական լուրջ խանգարում է, որը ոչ մի դեպքում չի կարելի անուշադրության մատնել: Այս խնդրի ախտանշանները կարող են շատ խաբուսիկ լինել, ուստի դրանք նկատելու դեպքում հարկավոր է անմիջապես դիմել մասնագետին ու հետևել նրա ցուցումներին:

Նյութի աղբյուրը՝ healthinfo.ua