Լավագույն ըմպելիքները սրտամկանի առողջության համար

Սրտամկանը մարդու ամենակարևոր օրգաններից է, որի առողջության պահպանում շատ մեծ նշանակություն ունի, ուստի ձեր ուշադրությանն ենք ներկայացնում լավագույն ըմպելիքները, որոնք կօգնեն պահպանել սրտանոթային համակարգի առողջությունն ու խուսափել մի շարք հիվանդություններից:

1.      Ջուր

Ջուրը կյանքի աղբյուր է և լավագույն ըմպելիքը սրտամկանի համար: Ջրի դեֆիցիտի հետևանքով բարձրանում է սրտանոթային համակարգի մի շարք հիվանդությունների առաջացման հավանականությունը, ինչը պայմանավորված է նրանով, որ ջրի պակասի դեպքում արյունը թանձրանում է՝ մեծացնելով սրտամկանի ծանրաբեռնվածությունը:

2.      Կանաչ ու սև թեյեր

Կանաչ ու սև թեյերը պարունակում են հակաօքսիդանտներ, որոնք պաշտպանում են բորբոքումներից, ազատ ռադիկալներից, օնկոլոգիական հիվանդություններից ու սրտանոթային համակարգի հիվանդություններից:

3.      Մասուրի եփուկ

Մասուրն ամենաօգտակար հատապտուղներից է, որը պետք է անպայման ներառված լինի ամենօրյա սննդակարգում: Մասուրի եփուկը բարելավում է սրտամկանի աշխատանքը, կարգավորում է զարկերակային բարձր ճնշումը, բարձրացնում է իմունիտետը, ամրապնդում է անոթների պատերը, պաշտպանում է աթերոսկլերոզից և խթանում է արյան կարմիր բջիջների արտադրությունը: Սակայն հարկ է հիշել, որ այս ըմպելիքը հակացուցված է ստամոքսի բարձր թթվայնության, խոցային հիվանդության, գաստրիտի, թրոմբոֆլեբիտի և էնդոկարդիտի դեպքում:

4.      Կարմիր գինի

Կարմիր գինին պարունակում է սրտամկանը պաշտպանող միացություններ, որոնք նվազեցնում են արյան մեջ խոլեստերինի մակարդակն ու կանխում են թրոմբների առաջացումը: Բացի այդ, փոքր քանակությամբ կարմիր գինու գործածությունը նպաստում է «լավ» խոլեստերինի մակարդակի բարձրացմանը:

5.      Նռան հյութ

Նռան հյութը պարունակում է մեծ քանակությամբ հակաօքսիդանտներ, ինչի շնորհիվ շատ օգտակար է սրտամկանի համար: Այն օգնում է կարգավորել զարկերակային բարձր ճնշումը, հանգստացնել նյարդային համակարգը և բարելավել արյան շրջանառությունը:

6.      Չրերով կոմպոտ

Չրերը շատ օգտակար են սրտամկանի համար: Ընդ որում՝ ամենաօգտակարներն են ծիրանաչիրն ու չամիչը, ուստի դրանցով պատրաստված կոմպոտը նույնպես շատ առողջարար է: Սրտամկանի համար շատ օգտակար կարող է լինել նաև տանձով ու խնձորով կոմպոտը, քանի որ այն կարգավորում է զարկերակային ճնշումն ու օգնում է հաղթահարել դեպրեսիան (ընկճախտ):

7.      Սուրճ

Սուրճն օգնում է 20-40%-ով նվազեցնել գլխուղեղի կաթվածի և սրտամկանի ինֆարկտի առաջացման հավանականությունը, սակայն հարկ է հիշել, որ այն ոչ մի դեպքում չի կարելի չարաշահել: Մասնագետները նախազգուշացնում են, որ օրական 4 բաժակից ավել սուրճ խմելը կարող է վտանգավոր լինել սրտամկանի համար:

Նյութի աղբյուրը՝ healthinfo.ua