Ինչպիսին պետք է լինի հիվանդի սննդակարգը վիրահատությունից առաջ և հետո

Վիրահատություններից հետո բարեհաջող ապաքինման համար շատ կարևոր է բժշկի բոլոր ցուցումներին հետևելը: Հատկապես մեծ նշանակություն ունի հիվանդի սննդակարգը, ուստի դրան հարկավոր է առանձնահատուկ ուշադրություն դարձնել: Մասնագետները ներկայացրել են, թե որ ուտեստներն ու սննդամթերքի տեսակներն է կարելի օգտագործել այդ ընթացքում և որոնցից է հարկավոր կտրականապես հրաժարվել:

Կախված վիրահատության տեսակից՝ հիվանդին նշանակվում է այս կամ այն սննդակարգը, որին հարկավոր է խստորեն հետևել: Սովորաբար խոսքը փափուկ ու դյուրամաս մթերքի մասին է լինում, որը հարկավոր է օգտագործել միայն որոշ ժամանակ կամ դարձնել սննդակարգի հիմնական  բաղադրիչն ու սնվել այդ կերպ մշտապես: Սա հատկապես վերաբերում է այն հիվանդներին, որոնք վիրահատության միջոցով փորձում են բուժել ստամոքսի խոցային հիվանդությունը: Նման դեպքերում բժշկի ցուցումներին հետևելը պարզապես կենսական նշանակություն ունի: Ընդ որում՝ սննդակարգը կարող է տարբեր լինել՝ կախված բազմաթիվ գործոններից. ոմանց նման դեպքերում թույլատրվում է օգտագործել մանգոյի հյութ, սպիտակ բրինձ, ավոկադո, բանան, մրգեր ու բանջարեղեն, իսկ ոմանք պետք է միայն արգանակներ խմեն ու կարտոֆիլի խյուս ուտեն:

Սակայն կան նաև սննդամթերքի տեսակներ, որոնք, անկախ ի հայտ եկած խնդրից, խորհուրդ չի տրվում օգտագործել ինչպես վիրահատությունից առաջ, այնպես էլ դրանից հետո: Դրանց շարքին են դասվում եգիպտացորենը, չրերը, լոբազգիները, տոստի հացն ու բլիթները, հում բանջարեղենը, հատապտուղները, միսը, տապակած բանջարեղենը, կոկոսյան ընկույզը, գազավորված ըմպելիքները, հացաբուլկեղենը, երշիկեղենը և, իհարկե, ալկոհոլը, որը կարող է դառնալ հիվանդի վիճակի սրման և դանդաղ ապաքինման պատճառ:

Միևնույն ժամանակ նման դեպքերում գրեթե միշտ շատ օգտակար կարող են լինել բանջարեղենային խյուսերը, որոնք և՛ օգտակար են, և՛ դյուրամարս: Սակայն ոչ մի դեպքում չի կարելի չարաշահել աղը, քանի որ այն կարող է դառնալ զարկերակային ճնշման բարձրացման պատճառ: Առողջարար է նաև հավի արգանակը, որին կարելի է ավելացնել մի փոքր նեխուր, սոխ, գազար ու շատ քիչ քանակությամբ աղ:

Հարկ է հիշել, որ վիրահատությունը շատ լուրջ միջամտություն է և ոչ մի դեպքում չի կարելի ինքնուրույն փոխել սննդակարգը կամ առհասարակ մոռանալ դրա մասին: Այս դեպքում ցանկացած մթերք օգտագործելուց առաջ հարկավոր է անպայման խորհրդակցել բժշկի հետ և հետևել նրա բոլոր ցուցումներին:

Նյութի աղբյուրը՝ medikforum.ru