5 վնասակար սովորություն, որոնք արագացնում են ծերացման գործընթացը

16:15 • 20.12.18

Ծերացումը բնական գործընթաց է, որին վաղ թե ուշ յուրաքանչյուրն է բախվում, սակայն կան սովորություններ, որոնք զգալիորեն արագացնում են այդ գործընթացը: Ձեր ուշադրությանն ենք ներկայացնում 5 տարածված ու վնասակար սովորություն, որոնք ծերացնում են մարդուն:

1. Քնի պակաս

Գիշերային քնի ժամանակ օրգանիզմում ընթանում են գործընթացներ, որոնք նպաստում են դրա վերականգնմանը: Ընդ որում՝ վերականգնվում է նաև մարդու մաշկը, ուստի լավ քնի ու հանգստի դեպքում մարդիկ միշտ թարմ տեսք են ունենում: Միևնույն ժամանակ քնի պակասը թուլացնում է իմունային համակարգը, խանգարում նյութափոխանակության գործընթացներն ու նպաստում է հոգեկան խանգարումների զարգացմանը, ինչի արդյունքում մարդն ավելի արագ է ծերանում:

2. Սննդակարգում մրգերի ու բանջարեղենի պակաս

Ուսումնասիրությունները ցույց են տվել, որ հասուն մարդկանց 70-80%-ը չի օգտագործում բավարար քանակությամբ միրգ ու բանջարեղեն, մինչդեռ դրանք պարունակում են հակաօքսիդանտներ, որոնք պայքարում են ազատ ռադիկալների դեմ՝ պահպանելով երիտասարդությունը: Ծերացման գործընթացը դանդաղեցնելու համար հարկավոր է օրական 5 բաժին միրգ ու բանջարեղեն ուտել:

3. Շաքարի չարաշահում

Շաքարով հարուստ մթերքի չարաշահումը նպաստում է արյան մեջ գլյուկոզայի մակարդակի բարձրացմանը, ինչն էլ կապված է օրգանիզմում, այդ թվում նաև մաշկի հյուսվածքներում, բորբոքային գործընթացների զարգացման հետ: Բացի այդ, շաքարի մոլեկուլները վնասում են բնական կոլագենը՝ դրանով իսկ արագացնելով ծերացման գործընթացը:

4. Ծխախոտի չարաշահում

Երկվորյակների մասնակցությամբ անցկացված ուսումնասիրությունը ցույց է տվել, որ ծխախոտի չարաշահումը բացասաբար է ազդում աչքերի շուրջը եղած մաշկի որակի վրա և նպաստում է խոշոր կնճիռների առաջացնանը: Միջինում չծխող և առողջ կենսակերպ վարող մարդիկ իրենց ծխող հասակակիցներից 5 տարով երիտասարդ տեսք են ունենում:

5. Ալկոհոլի չարաշահում

Ալկոհոլը նպաստում օրգանիզմում հակաօքսիդանտային նյութերի քանակության նվազմանը, իսկ այս նյութերը պաշտպանում են մաշկը ծերացումից: Բացի այդ, ալկոհոլային ըմպելիքները ջրազրկում են օրգանիզմը, իսկ հեղուկի պակասը չորացնում է մաշկն ու նպաստում է բորբոքումների ու կնճիռների առաջացմանը:

Նյութի աղբյուրը՝ medikforum.ru