Որոնք են քրոնիկական հոգնածության համախտանիշի առաջացման հիմնական պատճառներն ու ախտանշանները

Քրոնիկական հոգնածության համախտանիշը հիվանդություն է, որն առավել շատ տարածված է քաղաքակիրթ երկրներում: Այս հիվանդությունը դրսևորվում է երկարատև հոգնածության զգացումով, որից հիվանդը չի կարողանում ազատվել անգամ լիարժեք հանգստից հետո:

Հիվանդության առաջացման պատճառները

Քրենիկական հոգնածության համախտանիշը կարող է պայմանավորված լինել տարբեր գործոններով: Դրանց շարքին են դասվում.

·        որոշակի դեղամիջոցների ընդունումը (հակահիստամինային դեղամիջոցներ, քնաբեր դեղամիջոցներ, դեղորայք հազի ու մրսածության դեմ և այլն),

·        հիվանդությունները, որոնք նպաստում են հիվանդի շնչառության վատացմանը (քրոնիկական բրոնխաբորբ, ասթմա և այլն)

·        սրտային անբավարարությունը, որի դեպքում խանգարվում են սրտի կծկումների հաճախականությունն ու ինտենսիվությունը և այն պատշաճ կերպով չի կատարում իր գործառույթները,

·        դեպրեսիան ու տագնապը, վատ տրամադրությունն ու մռայլ մտքերը,

·        քնի և սննդի ընդունման ռեժիմի խանգարումները:

Հաճախ նման ախտանշան է ի հայտ գալիս վիրուսային վարակի բուժումից մեկ ամիս անց: Բացի այդ, գերհոգնածությունը կարող է լինել որոշ լուրջ հիվանդությունների վաղ ախտանշանը: Նման հիվանդությունների շարքին են դասվում հեպատիտը, քաղցկեղը, շաքարային դիաբետը, սակավարյունությունը (անեմիա), սրտի հիվանդությունները, ճարպակալումը, հիպոթիրեոզը, ռևմատոիդ արթրիտը և այլն:

Հիվանդության ախտանշանները

Սովորաբար գերհոգնածության զգացումից մարդիկ ազատվում են լիարժեք հանգստից կամ արձակուրդից հետո: Հաճախ նման դեպքերում պարզապես հարկավոր է լինում թույլ տալ օրգանիզմին հանգստանալ և վերականգնել ուժերը: Սակայն եթե այս խնդիրը շարունակում է անհանգստացնել բավական երկար ժամանակ, ապա հարկավոր է անպայման դիմել բժշկին:

Որպես կանոն՝ քրոնիկական հոգնածության համախտանիշի հիմնական ախտանշանը գերհոգնածությունն է, սակայն այս հիվանդությունը կարող է դրսևորվել նաև մի շարք այլ ախտանշաններով, որոնց շարքին են դասվում.

·        հիշողության վատացումն ու կենտրոնացման հետ կապված խնդիրները,

·        ֆարինգիտը,

·        պորանոցի և թևատակերի հատվածի ավշային հանգույցների բորբոքումը,

·        անբացատրելի մկանային ցավը,

·        հոդացավերը (այս դեպքում հոդերը չեն այտուցվում և այդ հատվածի մաշկը չի կարմրում),

·        սաստիկ գլխացավերը,

·        քնի հետ կապված խնդիրները,

·        սաստիկ հյուծումը (այս դեպքում մարդը չի կարողանում վերականգնել ուժերն անգամ աշխատանքային օրվանից հետո 24 ժամ անց):

Շատ հաճախ քրոնիկական հոգնածության համախտանիշը դժվար է լինում ախտորոշել, քանի որ դրա ախտանշանները շատ նման են մի շարք այլ հիվանդությունների ախտանշաններին: Այս դեպքում բժիշկը նախ պետք է բացառի հնարավոր մյուս հիվանդությունները, այնուհետև նշանակի անհրաժեշտ բուժումը:

Հարկ է հիշել, որ այս խնդրի ախտորոշման հիմնական չափորոշիչը 6 ամիս և ավել անհանգստացնող գերհոգնածությունն է և նշված ախտանշաններից 4-8-ի առկայությունը: Բացի այդ, այս խնդրի դեպքում հարկավոր է շատ ուշադիր լինել, քանի որ այն հաճախ ուղեկցվում է դեպրեսիայով, ինչը կարող է խիստ վտանգավոր լինել:

Նյութի աղբյուրը՝ healthinfo.ua