Որոնք են երակների վարիկոզ լայնացման բուժման տարբեր մեթոդների հիմնական առանձնահատկությունները

Երակների վարիկոզ լայնացումը բավական տարածված ու տհաճ հիվանդություն է, որն առաջանում է արյան շրջանառության խանգարման հետևանքով: Այն հիմնականում բնորոշ է կանանց, սակայն երբեմն հանդիպում է նաև տղամարդկանց մոտ:

Հարկ է հիշել, որ սա միայն էսթետիկ խնդիր չէ և կարող է բավական լուրջ բարդություններ առաջացնել: Հիվանդությունը կարող է ախտահարել ցանկացած երակ, սակայն առավել զգայուն են ձեռքերի և ոտքերի երակները, ինչը զարմանալի չէ, քանի որ օրվա ընթացքում հենց վերջույթներն են ամենից շատ ծանրաբեռնվում:

Գոյություն ունեն երակների վարիկոզ լայնացումից ազատվելու տարբեր եղանակներ, ուստի ձեր ուշադրությանն ենք ներկայացնում դրանց առանձնահատկությունները:

·        Բուժիչ քսուքներ

Նման միջոցներն օգնում են խուսափել արյան լճացումից ու ազատվել անոթային ցանցից: Սովորաբար դրանց բաղադրության մեջ պարունակվում են հեպարին (արյան մակարդումը կանխող նյութ), ցավը մեղմող, ոտքերը հանգստացնող ու անոթներն ամրապնդող բնական բաղադրիչներ, ոչ ստերոիդային հակաբորբոքային միջոցներ ու հորմոնալ հակահիստամինային բաղադրիչներ:

·        Դեղամիջոցներ

Երակների վարիկոզ լայնացման ժամանակ շատ արդյունավետ կարող են լինել նաև դեղահաբերը, դեղապատիճները, իսկ երբեմն էլ ներարկումները: Օրինակ՝ ֆլեբոտոնիկներն արագացնում են արյան հոսքն ու ամրապնդում են անոթների պատերը, իսկ արյունը ջրիկացնող դեղամիջոցները բարելավում են արյան շրջանառությունն ու կանխում են թրոմբների առաջացումը: Բացի այդ, հաճախ նշանակվում են նաև հակաբորբոքային ու ցավազրկող դեղամիջոցներ, որոնք օգնում են կանխել թրոմբոցիտների միացումն ու հյուսվածքների այտուցվածությունը:

·        Լազերային թերապիա

Երակների վարիկոզ լայնացումը կարելի է բուժել նաև ժամանակակից լազերային թերապիայի միջոցով: Այս պրոցեդուրայի ընթացքում հեմոգլոբինը կլանում է լազերային ճառագայթները և փակում է վնասված անոթը ներսից: Արդյունքում արյունն այլևս այդ անոթով չի հոսում, այլ հոսում է ավելի խորանիստ անոթներով, որոնք արտաքինից տեսանելի չեն: Այս պրոցեդուրայից հետո վնասված անոթը փոխարինվում է շարակցական հյուսվածքով, իսկ հարակից հյուսվածքները չեն տուժում:

·        Հատուկ գուլպաներ ու զուգագուլպաներ

Երակների վարիկոզ լայնացման բուժման և կանխարգելման արդյունավետ ու շատ հարմարավետ միջոց են հատուկ ձգող զուգագուլպաները: Դրանք սեղմում են ոտքերը, բարելավում են արյան շրջանառությունն ու թույլ չեն տալիս, որ երակները լայնանան: Ընդ որում՝ նման զուգագուլպաներ կան անգամ տղամարդկանց ու հղի կանանց համար:

·        Վիրահատություն

Հիվանդությունը ժամանակին չբուժելու դեպքում այն կարող է այնքան խորանալ, որ միակ բուժումը կլինի վիրահատական միջամտությունը, որի ընթացքում դադարեցվում է արյան հոսքն ախտահարված անոթում: Այս պրոցեդուրան նման է լազերային թերապիային, սակայն այն շատ ավելի արդյունավետ է: Միևնույն ժամանակ վիրահատական միջամտության դեպքում փոքրիկ սպիներ են մնում, որոնք, սակայն, այնքան ակնհայտ չեն, որքան «անոթային աստղիկները»:

·        Ժողովրդական միջոցներ

Գոյություն ունեն նաև երակների վարիկոզ լայնացման բուժման ժողովրդական միջոցներ, որոնք ավելի անվտանգ են և չեն առաջացնում կողմնակի բարդություններ՝ ի տարբերություն դեղորայքի: Սակայն հարկավոր է հաշվի առնել, որ բուժման ժողովրդական միջոցներն արդյունավետ են լինում միայն հիվանդության վաղ փուլերում կամ կիրառվում են որպես հավելում հիմնական բուժմանը:

Օրինակ՝ շատ արդյունավետ միջոց է խնձորի քացախը, որը քսում են ախտահարված հատվածի մաշկին կամ օգտագործում են կոմպրեսների տեսքով՝ այտուցներից ազատվելու համար:

Շատ արդյունավետ կարող են լինել նաև կապույտ, կանաչ կամ սպիտակ կավով կոմպրեսները: Պարզապես հարկավոր է քսել կավը ոտքերին, փաթաթել պոլիէթիլենային թաղանթով, թողնել 1-1.5 ժամ, այնուհետև լվանալ սառը ջրով: Հարկ է հիշել, որ ջուրը պետք է անպայման սառը լինի, ինչը կօգնի բարելավել նյութափոխանակությունը, նեղացնել երակներն ու խթանել ավշի հոսքը:

Ավելի յուրահատուկ, սակայն ոչ պակաս արդյունավետ միջոց է սպիտակ ակացիայի ոգեթուրմը, որը կարելի է օգտագործել ինչպես շփումների համար, այնպես էլ կոմպրեսների: Այն ոչ միայն կօգնի ազատվել ցավից ու ծանրությունից, այլև շատ ավելի քիչ նկատելի կդարձնի «անոթային աստղիկները»: Ընդ որում՝ լավ արդյունքի հասնելու համար հարկավոր է հնարավորինս հաճախ կրկնել այս պրոցեդուրաները:

Սակայն հարկ է հիշել, որ երակների վարիկոզ լայնացումը կանխարգելելն ու վաղ փուլերում բուժելը շատ ավելի հեշտ է, քան հետագայում նաև դրա հետևանքով առաջացած բարդությունների դեմ պայքարելը, ուստի անհրաժեշտ է ավելի ուշադիր լինել, պարբերաբար բուժզննում անցնել, հոգ տանել անոթների մասին ու կանխարգելիչ միջոցներ ձեռնարկել (օրինակ՝ լինել ֆիզիկապես ակտիվ, հարստացնել սննդակարգը վիտամին C-ով և այլն):

Բացի այդ, ոչ մի դեպքում չի կարելի զբաղվել ինքնաբուժությամբ, քանի որ դա կարող է էլ ավելի վատացնել անոթների վիճակը: Հարկ է հիշել, որ միայն փորձառու մասնագետը կարող է ճիշտ ախտորոշել հիվանդությունն ու նշանակել համապատասխան բուժումը, որը կլինի և՛ արդյունավետ, և՛ անվնաս:

Նյութի աղբյուրը՝ krasota-medicina.ru