Որոնք են գրիպի առաջացման պատճառներն ու հիմնական ախտանշանները

Գրիպը սուր շնչառական վիրուսային վարակ է, որի հարուցիչները A, B կամ C խմբի վիրուսներն են: Հիվանդությունն ընթանում է ծանր տոքսիկոզով, տենդով ու վերին և ստորին շնչառական ուղիների ախտահարմամբ:

Մարդիկ հաճախ են գրիպը շփոթում մրսածության հետ, սակայն խնդիրն այն է, որ դրանք տարբեր հիվանդություններ են և գրիպը շատ ավելի վտանգավոր է, քան հասարակ մրսածությունը: Այս հիվանդությունների ճիշտ բուժումն անչափ կարևոր է, քանի որ գրիպի դեպքում հաճախ են ի հայտ գալիս տարբեր բարդություններ, որոնք կարող են անգամ մահվան հանգեցնել:

Նման լուրջ հետևանքներից խուսափելու համար հարկավոր է սովորել տարբերել գրիպը մրսածությունից, ուստի ձեր ուշադրությանն ենք ներկայացնում գրիպի առաջացման հիմնական պատճառներն ու ախտանշանները, որոնք կօգնեն ճիշտ կողմնորոշվել և ժամանակին քայլեր ձեռնարկել: 

Գրիպի առաջացման պատճառները

Գրիպի վիրուսը դասվում է սուր շնչառական վիրուսային վարակների շարքին, ուստի շատ նման է դրանց իր տարածման եղանակով ու հիվանդության ընթացքով: Սակայն գրիպի կլինիկական դրսևորումները, ընթացքն ու հնարավոր բարդությունները շատ ավելի վառ են արտահայտված:

Գրիպը շատ արագ է տարածվում, ուստի հազվադեպ երևույթ չէ նաև գրիպի համախարակը: Վարակման աղբյուրը սովորաբար հիվանդ մարդիկ են լինում, իսկ վարակումը տեղի է ունենում օդակաթիլային ճանապարհով:

Գրիպի կլինիկական դրսևորումները կարող են ի հայտ գալ վարակումից հետո 6-48 ժամվա ընթացքում: Վիրուսը կարող է օրգանիզմ ներթափանցել աչքերի ու շնչառական ուղիների լորձաթաղանթների միջոցով, սակայն հարկ է հիշել, որ երբեմն վարակման պատճառ կարող են դառնալ նաև հիգիենայի պարագաներն ու սպասքը:

Գրիպի ախտանշանները

Հիվանդության ախտանշանները սովորաբար ի հայտ են գալիս հանկարծակի: Կտրուկ վատանում է հիվանդի ինքնազգացողությունը, բարձրանում է մարմնի ջերմաստիճանը (մինչև 39-40°C), նկատվում է ուժեղ դող, օրգանիզմի ինտոքսիկացիա, ինչպես նաև վերին շնչուղիների լորձաթաղանթի բորբոքումներ (կարմրություն, կոկորդի ցավ և այլն):

Հիվանդության վառ ախտանշաններից մեկն է ուժեղ գլխացավը (հիմնականում ճակատի ու քթի հատվածում), որն էլ ավելի է ուժեղանում աչքերը շարժելիս: Մյուս տարածված ախտանշաններն են ընդհանուր թուլությունը, մկանային ցավերը, գոտկատեղի ու հոդերի ցավերը, ախորժակի վատացումն ու սրտխառնոցը:

Գրիպի դեպքում տենդը կարող է չանցնել 3-5 օր: Բացի այդ, հիվանդին անհանգստացնում է նաև հարբուխը, կոկորդի ցավն ու չորությունը, չոր հազը, աչքերի ցավը, կարմրածությունն ու արցունքահոսությունը, ինչպես նաև ձայնի խռպոտությունն ու ականջների փակվածությունը:

Ծանր դեպքերում հիվանդի մարմնի ջերմաստիճանը կարող է կտրուկ բարձրանալ (40°C-ից բարձր), կարող է առաջանալ փսխումով ուղեկցվող սաստիկ գլխացավ, հևոց, գիտակցության խանգարում, ջղաձգումներ, հեմոռագիկ մաշկային ցան և այլն: Բացի այդ, կարող են ի հայտ գալ նաև այնպիսի հեմոռագիկ դրսևորումներ, ինչպիսին են սկլերաների անոթների լայնացումը, մանր արյունազեղումները, քթային արյունահոսությունը և այլն:

Հարկ է հիշել, որ գրիպը հատկապես վտանգավոր ու ծանր է լինում մինչև երկու տարեկան երեխաների, որևէ ծանր հիվանդությամբ թուլացած մարդկանց, հղի կանանց ու տարեցների համար, ուստի ոչ մի դեպքում չի կարելի զբաղվել ինքնաբուժությամբ ու անուշադրության մատնել հիվանդությունը:

Նյութի աղբյուրը՝ healthinfo.ua