Առողջական ինչ խնդիրների մասին է վկայում մեզի գույնի փոփոխությունը

18:19 • 23.01.19

Մեզի գույնը կարող է փոփոխվել՝ կախված մարդու սննդակարգից, ընդունած դեղամիջոցներից և խմած հեղուկի քանակությունից: Սա բավական հաճախ հանդիպող երևույթ է, որը մարդիկ սովորաբար անտեսում են: Սակայն մեզի գույնի փոփոխությունը շատ կարևոր ախտանշան է, որը չի կարելի անուշադրության մատնել, քանի որ որոշ դեպքերում այն հուշում է բավական լուրջ հիվանդությունների մասին:

Մեզի գույնի փոփոխությունը կարող է պայմանավորված լինել դրանում արյան (հեմատուրիա) կամ թարախի (պիուրիա) առկայությամբ: Նման ախտանշանը կարող է վկայել այնպիսի լուրջ հիվանդությունների մասին, ինչպիսին են ցիստիտը (միզապարկի բորբոքում), պիելիտը (երիկամի ավազանի բորբոքում) և ուրետրիտը (միզուկի բորբոքում):

Թարախի առկայության դեպքում մեզը պղտորվում է և նստվածք է ունենում: Հատկանշական է, որ ուրետրիտի ժամանակ միզելիս մեզը պղտոր է լինում և աստիճանաբար է պարզվում, մինչդեռ ցիստիտի դեպքում մեզը պարզ է լինում և աստիճանաբար պղտորվում է: Ծանր պիելիտի կամ հարակից օրգանների բորբոքման դեպքում թարախը կարող է լցվել միզապարկ, ինչի հետևանքով առաջանում է տոտալ պիուրիա (մեզն ամբողջությամբ պղտոր է լինում):

Մեզի գույնի փոփոխությունն ու դրանում թարախի կամ առավել ևս արյան առկայությունը շատ լուրջ ախտանշան է, որն անուշադրության մատնելը կարող է վտանգավոր հետևանքներ ունենալ: Նման խնդրի դեպքում հարկավոր է անհապաղ դիմել համապատասխան մասնագետին՝ ուրոլոգին, և անհրաժեշտության դեպքում բուժզննում անցնել:

Շատ դեպքերում հիվանդը չափազանց ուշ է դիմում բժշկին, ուստի ուշ է լինում նաև բուժումը սկսելու համար, իսկ հիվանդությունը ձեռք է բերում քրոնիկ բնույթ: Նման տհաճ հետևանքներից խուսափելու համար հարկավոր է տարվա ընթացքում մի քանի անգամ պրոֆիլակտիկ բուժզննում անցնել և ավելի ուշադիր լինել առողջության հանդեպ:

Հարկ է նաև հիշել, որ ոչ մի դեպքում չի կարելի զբաղվել ինքնաբուժությամբ, քանի որ դա կարող է խիստ վտանգավոր լինել առողջության համար և էլ ավելի վատացնել հիվանդի վիճակը: Միայն մասնագետը կարող է ճիշտ ախտորոշել հիվանդությունն ու նշանակել անհրաժեշտ բուժումը:

Նյութի աղբյուրը՝ eurolab.ua