Առողջական ինչ խնդիրների մասին կարող է վկայել լնդերի արյունահոսությունը

16:37 • 24.01.19

Լնդերի արյունահոսությունը բավական տարածված խնդիր է, սակայն քչերն են պատշաճ ուշադրություն դարձնում դրան: Առավել հաճախ լնդերի արյունահոսությունը պայմանավորված է լինում բերանի խոռոչի սխալ հիգիենայով, ատամնափառում բակտերիաների կուտակմամբ կամ ատամնաքարերով, իսկ նման խնդիրներ են առաջանում ատամները սխալ մաքրելու հետևանքով:

Բացի այդ, լնդերի արյունահոսությունը կարող է վկայել նաև ներզատական (էնդոկրին) համակարգի հետ կապված խնդիրների մասին: Օրինակ՝ նման ախտանշան է նկատվում շաքարային դիաբետից տառապողների մոտ, ինչպես նաև հորմոնալ ֆոնի խանգարումներով պայմանավորված շաքարի փոխանակության խանգարման դեպքում:

Առհասարակ լնդերի արյունահոսությունը կարող է պայմանավորված լինել առողջական լուրջ խնդիրներով, ուստի այն ոչ մի դեպքում չի կարելի անուշադրության մատնել: Սակայն նման խնդրի առաջացման պատճառը պարզելու համար հարկավոր է անպայման դիմել ատամնաբույժին: Արյունահոսությունը հաճախ պայմանավորված է լինում ատամնափառով, որը հիվանդը սկզբնական շրջանում կարող է անգամ չնկատել: Նման դեպքերում հարկավոր է ազատվել ատամնափառից և բուժել այտուցված լնդերը:

Սակայն եթե բերանի խոռոչի հիգիենայի հետ կապված որևէ խնդիր չկա, իսկ լնդերը շարունակում են արնահոսել, ապա խորհուրդ է տրվում խորհրդակցել ներզատաբանի հետ, քանի որ խնդիրը կարող է պայմանավորված լինել լուրջ հիվանդություններով և անտեսելու դեպքում էլ ավելի վտանգավոր հետևանքներ ունենալ:

Բացի այդ, նման խնդիր հաճախ նկատվում է հղիների մոտ: Այս դեպքում պատճառը գինգիվիտն է՝ լնդերի բորբոքումը, ինչը պայմանավորված է հորմոնալ ֆոնի փոփոխություններով:

Հարկ է հիշել, որ լնդերի արյունահոսության դեպքում հարկավոր է առաջին հերթին ավելի ուշադիր լինել բերանի խոռոչի ու ատամների հիգիենայի հանդեպ, ինչպես նաև օգտագործել բուժիչ դեղաբույսերի հյութահանուկ պարունակող ատամի մածուկներ: Բացի այդ, խորհուրդ է տրվում փոխել նաև ատամի խոզանակը, քանի որ չափազանց կոշտ խոզանակը կարող է վնասել լնդերը, իսկ շատ նուրբ խոզանակը բավականաչափ լավ չի մաքրի ատամները:

Նյութի աղբյուրը՝ aif.ru